మాచర్ల దాడులపై గవర్నర్ బిశ్వభూషణ్ హరిచందన్‌ను కలిసి ఫిర్యాదు చేసిన టీడీపీ నేత‌లు

Vijayawada: మాచర్ల ఘటనపై టీడీపీ నేతలు బుధవారం రాష్ట్ర గవర్నర్ బిశ్వభూషణ్ హరిచందన్‌ను కలిసి గవర్నర్‌కు ఫిర్యాదు చేశారు. పోలీసుల సహకారంతో బ్రహ్మారెడ్డిపై హత్యాయత్నం జరిగిందని కొల్లు రవీంద్ర ఆరోపించారు. అంత‌కుముందు మాచర్ల ఘటనపై టీడీపీ పొలిట్‌బ్యూరో సభ్యుడు వర్ల రామయ్య జాతీయ మానవ హక్కుల కమిషన్ (ఎన్‌హెచ్‌ఆర్‌సీ)కి ఫిర్యాదు చేశారు.

Macherla attacks: మాచర్ల ఘటనపై తెలుగు దేశం పార్టీ (టీడీపీ) నేతలు ఆంధ్ర‌ప్ర‌దేశ్ గవర్నర్ బిశ్వభూషణ్ హరిచందన్ ను కలిసి ఫిర్యాదు చేశారు. అలాగే, దాడులకు సంబంధించిన ఆధారాలను కూడా ఆయ‌న‌కు అందజేశారు. సంబంధిత అధారాల‌ను సైతం చూపించారు. బాధితులైన టీడీపీ నేతలపై కేసులు బనాయించారని టీడీపీ నేతలు గవర్నర్ కు ఫిర్యాదు చేశారు. అక్ర‌మంగా టీడీపీ నాయ‌కులు, కార్య‌క‌ర్త‌ల‌పై కేసులు పెట్టి ఇబ్బందుల‌కు గురిచేస్తున్నార‌ని ఆరోపించారు. రాష్ట్ర శాంతిభ‌ద్ర‌త‌ల విష‌యం గురించి గ‌వ‌ర్న‌ర్ కు వివ‌రించారు. 

అనంతరం టీడీపీ నేతలు మీడియాతో మాట్లాడుతూ శాంతి భద్రతల గురించి  ఫిర్యాదు చేసిన‌ట్టు తెలిపారు. గవర్నర్ కు సమస్యల గురించి వివరించామ‌నీ, సంబంధిత‌ వివరాలను, ఆధారాల‌ను అందజేసినట్లు నక్కా ఆనంద్ బాబు తెలిపారు. చల్లా మోహన్ కత్తి పట్టుకుని ఉన్న ఫోటో చూసి గవర్నర్ ఆశ్చర్యపోయారనీ, ఇంటెలిజెన్స్ చీఫ్ ఏదో ఆశిస్తూ తెరవెనుక డ్రామా నడుపుతున్నారని వర్ల రామయ్య ఆరోపించారు. పోలీసుల సాయంతో బ్రహ్మారెడ్డిపై హత్యాయత్నం జరిగిందని కొల్లు రవీంద్ర ఆరోపించారు. రాష్ట్రంలో హత్యా రాజకీయాలకు జగన్ రెడ్డి తలుపులు తెరిచారని ఆగ్రహం వ్యక్తం చేశారు.

అంత‌కుముందు, మాచర్ల ఘటనపై టీడీపీ పొలిట్‌బ్యూరో సభ్యుడు వర్ల రామయ్య సోమ‌వారం నాడు జాతీయ మానవ హక్కుల కమిషన్ (ఎన్‌హెచ్‌ఆర్‌సీ)కి ఫిర్యాదు చేశారు. శాంతిభద్రతలతో రాష్ట్రం భారీగా నష్టపోతున్న రాష్ట్ర పోలీసుల నిర్లక్ష్య వైఖరి ఘోరంగా విఫలమైందని ఎన్‌హెచ్‌ఆర్‌సీకి రాసిన లేఖలో రామయ్య అన్నారు. రాష్ట్ర పోలీసులు కొందరు అధికార పార్టీ నేతలతో కుమ్మక్కయ్యారనీ, దీని వల్ల సామాన్యుల మానవ హక్కులు పూర్తిగా ప్రమాదంలో పడ్డాయనీ, ఇటీవల మాచర్లలో జరిగిన ఘటనలే ఇందుకు ఉదాహరణ అని పేర్కొన్నారు. స్థానిక ఎమ్మెల్యే, పిన్నెల్లి రామకృష్ణారెడ్డి సోదరుడు వెంకటరామ్‌రెడ్డి ప్రయివేటు గూండాలతో ప్రజలపై, ముఖ్యంగా ప్రధాన ప్రతిపక్ష పార్టీ టీడీపీ కార్యకర్తలపై దాడికి పాల్పడ్డారని రామయ్య లేఖలో పేర్కొన్నారు. ఈ గూండాలు టీడీపీ కార్యకర్తల ఇళ్లలోని మహిళలతో పాటు పిల్లలపై కూడా భౌతికంగా దాడి చేశారనీ, వారి ఇళ్లకు కూడా నిప్పు పెట్టారని అన్నారు.

టీడీపీ ఇంచార్జి బ్రహ్మారెడ్డి శాంతియుత ర్యాలీలో పాల్గొన్న వారిపై స్థానిక ఎమ్మెల్యే సోదరుడి కిరాయి గూండాలు దాడి చేశారని తెలిపారు. ఆరు గంటలకు పైగా కొనసాగిన దాడిపై స్థానిక పోలీసులు ప్రేక్షకుల పాత్ర మాత్రమే పోషించారని లేఖలో ఎత్తి చూపారు. పోలీసులు కోడన్ అండ్ సెర్చ్ ఆపరేషన్ చేసిన తర్వాత కూడా టీడీపీ కార్యకర్తలపై వైఎస్సార్సీపీ కార్యకర్తలు మారణాయుధాలతో దాడి చేయడాన్ని గమనించిన స్థానిక పోలీసులు టీడీపీ నేతలను అదుపులోకి తీసుకుని వెంటనే మాచర్ల నుంచి వెళ్లిపోవాలని ఆదేశాలు జారీ చేశారని రామయ్య లేఖలో పేర్కొన్నారు. స్థానిక పోలీసులు ఇలా వ్యవహరించడానికి కొంతమంది సీనియర్ పోలీసు అధికారులే బాధ్యత వహిస్తారని పేర్కొంటూ, అడిషనల్ డైరెక్టర్ జనరల్ ఆఫ్ పోలీస్ (ఇంటెలిజెన్స్), సీతారాంజనేయులు, పోలీసు సూపరింటెండెంట్ (ఎస్పీ) రవిశంకర్ రెడ్డి తీర్పును సంతృప్తి పరచడానికి మాత్రమే ప్రయత్నిస్తున్నారని అన్నారు.