గుంటూరు విట్ యూనివర్సిటీలో విద్యార్థుల ఘర్షణ.. వీడియో వైరల్ కావడంతో వెలుగులోకి ఘటన..

గుంటూరు జిల్లాలోని వేలూరు ఇన్‌స్టిట్యూట్ ఆఫ్ టెక్నాలజీ(విట్) యూనివర్సిటీ విద్యార్థులు ఘర్షణకు దిగారు.యూనివర్సిటీ  ప్రాంగణంలోనే సీనియర్‌లు, జూనియర్‌లు విడిపోయి కొట్టుకున్నారు. పరస్పరం దాడులు చేసుకున్నారు. ఈ ఘర్షణను ఆపేందుకు యూనివర్సిటీ సెక్యూరిటీ సిబ్బంది, మరికొందరు విద్యార్థులు యత్నించినప్పటికీ లాభం లేకుండా పోయింది. అయితే హాస్టల్ గదుల కేటాయింపు గురించి సీనియర్లు, జూనియర్ల మధ్య వివాదం తలెత్తినట్లు తెలుస్తోంది.

అయితే ఈ ఘటన రెండు రోజుల క్రితం జరిగినట్టుగా చెబుతున్నారు. అయితే  ఇందుకు సంబంధించిన వీడియో బయటకు రావడంతో ఈ విషయం వెలుగులోకి వచ్చింది. ప్రస్తుతం ఈ వీడియో సోషల్ మీడియాలో వైరల్‌గా మారింది. ఇక, ఈ విషయంపై పోలీసులకు సమాచారం అందడంతో.. వారు ఘర్షణకు దిగిన విద్యార్థులను పిలిపించి మాట్లాడారు. అయితే విద్యార్థుల భవిష్యత్తు దృష్ణ్యా కేసు నమోదు  చేయకుండా.. కౌన్సిలింగ్ ఇచ్చి పంపించి వేసినట్టుగా తెలుస్తోంది.