ఏపీలో ఏ సామాజికవర్గానికి అత్యధిక మంత్రి పదవులు దక్కాయో తెలుసా..?
సారాంశం
ఏపీలో కొత్త ప్రభుత్వం కొలువుదీరనుంది. నాలుగోసారి సీఎం పీఠమెక్కనున్న చంద్రబాబు... తన కేబినెట్ ను సిద్ధం చేసుకున్నారు. మంత్రివర్గంలో సామాజిక వర్గాల వారీగా ప్రధాన్యమిచ్చారిలా....
ఆంధ్రప్రదేశ్ లో తెలుగుదేశం- జనసేన- భారతీయ జనతా పార్టీ కూటమి ప్రభంజనం సృష్టించింది. 164 అసెంబ్లీ స్థానాలతో రాష్ట్రంలో తిరుగులేని శక్తిగా అవతరించింది. ఈసారి 135 సీట్లు గెలుచుకొని రాష్ట్రంలో అతిపెద్ద పార్టీ టీడీపీ అవతరించింది. జనసేన 21 స్థానాల్లో పోటీ చేసి వంద శాతం స్ట్రైక్ రేటుతో 21 స్థానాలనూ గెలుచుకుంది. 10 నియోజకవర్గాల్లో ఎన్నికల బరిలోకి దిగిన భారతీయ జనతా పార్టీ అభ్యర్థులు 8 చోట్ల పాగా వేశారు. మూడు పార్టీలు సీట్ల కేటాయింపు విషయంలో ఎంతో జాగ్రత్త తీసుకున్నాయి. గట్టి పోటీ ఇచ్చే వారినే అభ్యర్థులుగా నిలబెట్టి... అఖండ విజయాన్ని సాధించాయి.
ఇక నేడు (బుధవారం) చంద్రబాబు నాలుగో సారి ముఖ్యమంత్రి పీఠాన్ని అధిరోహించబోతున్నారు. ఇందులో భాగంగా తన జట్టును సిద్ధం చేసుకున్నారు. సీనియర్లతో పాటు అత్యధిక మంది కొత్తవారికి తన కేబినెట్ లో అవకాశమిచ్చారు. సామాజిక వర్గాల వారీగా చూసినా బలమైన వ్యక్తులకు మంత్రివర్గంలో చోటిచ్చారనే అంశం అర్థమవుతుంది.
ఈసారి చంద్రబాబు మంత్రివర్గంలో ఎనిమిది బీసీలతో పాటు 17 మంది కొత్త వారికి అవకాశమిచ్చారు. సామాజిక వర్గాల వారీగా చూస్తే చంద్రబాబు కేబినెట్ ఇలా ఉంది.
| మంత్రి | సామాజిక వర్గం |
| కొణిదెల పవన్ కళ్యాణ్ | కాపు |
| కింజరాపు అచ్చెన్నాయుడు | బీసీ (కొప్పుల వెలమ) |
| కొల్లు రవీంద్ర | బీసీ (మత్స్యకార) |
| నాదెండ్ల మనోహర్ | ఓసీ (కమ్మ) |
| పొంగూరు నారాయణ | కాపు |
| వంగలపూడి అనిత | ఎస్సీ (మాదిగ) |
| సత్యకుమార్ | బీసీ (యాదవ) |
| నిమ్మల రామానాయుడు | కాపు |
| NMD ఫరూక్ | ముస్లిం మైనారిటీ |
| ఆనం రామనారాయణ రెడ్డి | ఓసీ (రెడ్డి) |
| పయ్యావుల కేశవ్ | ఓసీ (కమ్మ) |
| అనగాని సత్యప్రసాద్ | బీసీ (గౌడ) |
| కొలుసు పార్థసారథి | బీసీ (యాదవ) |
| డోలా బాల వీరాంజనేయ స్వామి | ఎస్సీ (మాల) |
| గొట్టిపాటి రవికుమార్ | ఓసీ (కమ్మ) |
| గుమ్మడి సంధ్యారాణి | ఎస్టీ |
| బీసీ జనార్ధన్ రెడ్డి | ఓసీ (రెడ్డి) |
| టీజీ భరత్ | ఓసీ (ఆర్యవైశ్య) |
| ఎస్ సవితమ్మ | కురబ |
| వాసంశెట్టి సుభాష్ | బీసీ (శెట్టిబలిజ) |
| కొండపల్లి శ్రీనివాస్ | బీసీ (తూర్పు కాపు) |
| మండిపల్లి రామ్ ప్రసాద్ | ఓసీ (రెడ్డి) |
| నారా లోకేశ్ | ఓసీ (కమ్మ) |
| కందుల దుర్గేష్ | కాపు |
| నారా చంద్రబాబు నాయుడు | ఓసీ (కమ్మ) |
| సామాజికవర్గం | మంత్రి పదవులు |
| ఓసీ | 14 |
| బీసీ | 08 |
| ఎస్సీ | 02 |
| ఎస్టీ | 01 |
| ముస్లిం మైనారిటీ (బీసీ) | 01 |
| పార్టీ | మంత్రి పదవులు |
| తెలుగుదేశం పార్టీ | 21 |
| జనసేన పార్టీ | 03 |
| భారతీయ జనతా పార్టీ | 01 |
ఇక, మంగళవారం టీడీపీ రాష్ట్ర అధ్యక్షుడు అచ్చెన్నాయుడు, జనసేన పీఏసీ ఛైర్మన్ నాదెండ్ల మనోహర్, బీజేపీ రాష్ట్ర అధ్యక్షురాలు దగ్గుబాటి పురందేశ్వరి రాజ్ భవన్ లో గవర్నర్ జస్టిస్ అబ్దుల్ నజీర్ ను కలిశారు. కూటమి తరఫున శాసనసభా పక్ష నేతగా ఎన్నుకున్నట్లు తెలిపారు. రాష్ట్రంలో ప్రభుత్వాన్ని ఏర్పాటు చేసేందుకు తమను ఆహ్వానించాలని కోరారు.
అలాగే, చంద్రబాబు కూడా గవర్నర్ తో భేటీ అయ్యారు. రాజ్ భవన్ లో గవర్నర్ జస్టిస్ అబ్దుల్ నజీర్ తో మర్యాదపూర్వకంగా కలిశారు. ఈ సందర్భంగా ప్రభుత్వం ఏర్పాటు చేయాలని చంద్రబాబును గవర్నర్ ఆహ్వానించారు.