ఏ1గా చంద్రబాబు: ఇంటికి లాయర్లు, కోర్టులో సవాల్ చేసే యోచన

ఏపీ సీఐడి ఇచ్చిన నోటీసులపై ఎలా ముందుకు వెళ్లాలనే విషయంపై టీడీపీ అధినేత చంద్రబాబు న్యాయనిపుణులతో చర్చిస్తున్నారు. సీనియర్ న్యాయవాదులతో ఆయన హైదరాబాదులో చర్చలు జరుపుతున్నారు.

హైదరాబాద్: అమరావతి భూముల వ్యవహారంలో ఏపీ సీఐడి ఇచ్చిన నోటీసులపై టీడీపీ అధినేత నారా చంద్రబాబు నాయుడు న్యాయవాదులతో చర్చలు జరుపుతున్నారు. చంద్రబాబు ఇంటికి సీనియర్ న్యాయవాదులు చేరుకున్నారు. విచారణకు హాజరు కావాలా, వద్దా అనే విషయంపై చంద్రబాబు వారితో చర్చలు జరుపుతున్నారు.

చంద్రబాబుపై పది కేసులు నమోదు చేశారు. వీటిలో ఎస్సీ, ఎస్టీ అట్రాసిటీస్ కేసు కూడా ఉంది. విచారణకు హాజరు కాకుండా చంద్రబాబు కోర్టుకు వెళ్లే యోచన చేస్తున్నట్లు తెలుస్తోంది. విచారణకు స్వయంగా హాజరు కాకుండా ప్రత్యామ్నాయం ఉందా ఆనే ఆలోచన కూడా సాగుతోంది.

ఈ నెల 23వ తేదీన విచారణకు హాజరు కావాలని సీఐడి అధికారులు నోటీసులు ఇచ్చారు. విచారణలో చంద్రబాబు వాంగ్మూలాన్ని రికార్డు చేస్తారు. మాజీ మంత్రి నారాయణకు కూడా సీఐడి అధికారులు నోటీసులు జారీ చేశారు. విచారణకు హాజరు కాకుండా ఉండడానికి గల అవకాశాలపై చంద్రబాబు న్యాయనిపుణులతో ఆలోచిస్తున్నారు. కోర్టులో సిఐడి ఇచ్చిన నోటీసులను కూడా సవాల్ చేసే విషయంపై చంద్రబాబు చర్చిస్తున్నారు.

ఇదిలావుంటే, గుంటూరు జిల్లా వంగంళగిరి శానససభ్యుడు ఆళ్ల రామకృష్ణా రెడ్డి (ఆర్కె) అమరావతి భూములపై గత నెల 24వ తేీదన ఫిర్యాదు చేశారు. ఆ మర్నాడే దానిపై విచారణకు ఆదేశించారు. సిఐడి డీఎస్పీ సూర్యభాస్కర్ రావు నేతృత్వంలోని బృందం విచారణ జరిపింది. సూర్యభాస్కర్ రావు బృదం ఈ నెల 12వ తేదీన నివేదికను సమర్పించింది.

ఆ నివేదిక ఆధారంగా సీఐడి కేసులు నమోదు చేసింది. దీంతో టీడీపీ అధినేత నారా చంద్రబాబు నాయుడికి చిక్కులు వచ్చి పడ్డాయి. చంద్రబాబుపై పది సెక్షన్ల కింద కేసులు నమోదు చేశారు. ఈ నెల 23వ తేదీన విచారణకు హాజరు కావాలని సీఐడి ఆదేశాలు జారీ చేసింది. చంద్రబాబుపై పెట్టిన కేసుల్లో ఎస్టీ, ఎస్టీ అట్రాసిటీస్ కేసు కూడా ఉండడం గమనార్హం. దానికి ప్రాతిపదిక ఆళ్ల రామకృష్ణా రెడ్డి ఇచ్చిన ఫిర్యాదే.

సీఐడి డీఎస్పీ సూర్య భాస్కర రావు ఇచ్చిన ఫిర్యాదు మేరకు కేసులు నమోదు చేసినట్లు తెలుస్తోంది. రాజధానిలోనూ రాజధాని ప్రాంతంలోనూ ఎస్సీ, ఎస్టీల భూములను బెదిరించి కుట్ర చేసి ఆక్రమించుకున్నారని ఆళ్ల రామకృష్ణా రెడ్డి ఫిర్యాదు చేశారు. భూములు ఇవ్వకపోతే పరిహారం కూడా ఇవ్వకుండా ప్రభుత్వం స్వాధీనం చేసుకుంటుందని బెదిరించి ఐసైన్డ్ భూములను లాక్కున్నారని ఆయన ఫిర్యాదు చేశారు. 

అక్రమాలు జరిగినట్లు సూర్యబాస్కర్ రావు నివేదిక సమర్పించిన రోజునే కేసుల నమోదుకు ఉన్నతాధికారులు ఆదేశాలు జారీ చేశారు. దీంతో చంద్రబాబు మెడకు ఐసైన్డ్ భూముల వ్యవహారం చుట్టుకుంది.