KCR: మూడు గంటల కరెంట్ కావాలా లేదా 24 గంటలు కావాలో, తాగు, సాగు అవసరాలకు నిరంతరం నీటి సరఫరా కావాలో, కరువు, తీవ్ర నీటి ఎద్దడితో ఇబ్బందులు ఎదుర్కోవాలో, రైతుబంధు కావాలో వద్దో ప్రజలు నిర్ణయించుకోవాలని సీఎం కేసీఆర్ అన్నారు.
Telangana Assembly Elections 2023: ఉజ్వల తెలంగాణ ఏర్పాటుకు బీఆర్ఎస్ కు ఓటు వేయాలని కోరిన ముఖ్య‌మంత్రి కే.చంద్ర‌శేఖ‌ర్ రావు (కేసీఆర్).. 50 ఏళ్లకు పైగా పాలించిన కాంగ్రెస్ నీళ్లు, కరెంట్ ఇవ్వకుండా తెలంగాణను కరవులోకి నెట్టిందని విమర్శించారు. ఖమ్మంలోని అశ్వారావుపేట, పినాక అసెంబ్లీ సెగ్మెంట్లు, వరంగల్ లోని నర్సంపేట అసెంబ్లీ సెగ్మెంట్లలో జరిగిన ప్రజా ఆశీర్వాద సభల్లో ఆయన మాట్లాడుతూ 24 గంటల కరెంటు, రైతుబంధు, ధరణి పోర్టల్ పై కాంగ్రెస్ నేతలు ప్రతికూలంగా మాట్లాడుతున్నారని మండిప‌డ్డారు. తమ రాష్ట్రంలో వ్యవసాయ రంగానికి తాము ఐదు గంటల విద్యుత్ మాత్రమే ఇస్తున్నామని కర్ణాటక ఉపముఖ్యమంత్రి డీకే శివకుమార్ చెప్ప‌డాన్ని ప్ర‌స్తావిస్తూ.. "రైతులు సాధారణంగా 3 లేదా 5 హెచ్ పీ మోటార్లను ఉపయోగిస్తారు, కాని కాంగ్రెస్ నాయకులు 10 హెచ్ పీ మోటార్లను ఉపయోగించాలని రైతులకు సలహా ఇస్తున్నారు. దీని బ‌ట్టిచూస్తే కాంగ్రెస్ అధికారంలోకి వ‌స్తే మూడు గంటలకు విద్యుత్ సరఫరాను తగ్గించవచ్చు" అని అన్నారు.
అలాగే, రైతుబంధు, రైతుబీమా పథకాలు స‌హా ధరణి పోర్టల్ ను బంగాళాఖాతంలో పడేస్తామని కాంగ్రెస్ నేతలు చెప్ప‌డంపై కేసీఆర్ మండిప‌డ్డారు. గంగా నది ప్రవహిస్తున్న బీజేపీ పాలిత రాష్ట్రమైన ఉత్తరప్రదేశ్ లో కూడా బీజేపీ ప్రభుత్వం ఇంటింటికీ తాగునీరు సరఫరా చేయడం లేదన్నారు. ప్రధాని నరేంద్ర మోడీ పుట్టిన గుజరాత్ లో బీజేపీ వ్యవసాయ రంగానికి 24 గంటల కరెంటు ఇవ్వడం లేదని విమర్శించారు. ఖమ్మం జిల్లాలో బీఆర్ఎస్ పాలనలో అపారమైన అభివృద్ధి జరిగిందనీ, సీతారామ ప్రాజెక్టు పూర్తయితే ఉమ్మడి ఖమ్మం జిల్లాలోని 10 నియోజకవర్గాల్లో నీటి ఎద్దడి తీరుతుందని అన్నారు. పినపాక అసెంబ్లీ సెగ్మెంట్లో పైలట్ ప్రాజెక్టుగా దళితబంధును అమలు చేయడంతో పాటు భద్రాచలంలోని ప్రాంతాలు వరదల సమయంలో ముంపునకు గురికాకుండా ఉండేందుకు గోదావరి నదికి ఇరువైపులా రూ.1,000 కోట్లతో కరకట్టలు నిర్మిస్తామని హామీ ఇచ్చారు.
వచ్చే అసెంబ్లీ ఎన్నికల్లో నర్సంపేట బీఆర్ఎస్ అభ్యర్థి పెద్ది సుదర్శన్ రెడ్డిని ఓడించాలని చూస్తున్న వైఎస్ షర్మిల.. కాంగ్రెస్ అభ్యర్థికి డబ్బు సంచులు పంపి కుట్ర పన్నుతున్నారని ఆరోపించారు. బీఆర్ఎస్ అభ్యర్థి సుదర్శన్ రెడ్డి చేపట్టిన అభివృద్ధి పనులను వివరిస్తూ నర్సంపేట నియోజకవర్గంలో 1.34 లక్షల ఎకరాలను సాగులోకి తెచ్చామనీ, గోదావరి జలాలతో పాకాల ఆయకట్టు కింద రైతులు రెండు పంటలు పండించగలుగుతున్నారన్నారు. ఆయన వల్లే నర్సంపేటకు మెడికల్ కాలేజీ మంజూరైందనీ, త్వరలో నర్సంపేట పట్టణం చుట్టూ రింగ్ రోడ్డు నిర్మిస్తామన్నారు. మూడు గంటల కరెంట్ కావాలా లేదా 24 గంటలు కావాలో, తాగు, సాగు అవసరాలకు నిరంతరం నీటి సరఫరా కావాలో, కరువు, తీవ్ర నీటి ఎద్దడితో ఇబ్బందులు ఎదుర్కోవాలో, రైతుబంధు కావాలో వద్దో ప్రజలు నిర్ణయించుకోవాలని సీఎం కేసీఆర్ అన్నారు. ఓటు వేసే ముందు ప్రజలు చాలా జాగ్రత్తగా ఉండాలనీ, ఇది వారి భవిష్యత్తునే కాకుండా రాష్ట్ర భవిష్యత్తును కూడా నిర్ణయిస్తుందని, ఉజ్వల తెలంగాణను కలలు కంటుందని అన్నారు.