పండుగలా 'తెలంగాణ దశాబ్ధి ఉత్సవాలు' .. 21 రోజుల షెడ్యూల్‌ విడుదల .. పూర్తి వివరాలు.. 

Telangana Decade Celebrations: తెలంగాణ రాష్ట్ర అవతరణ దశాబ్ది ఉత్సవాలను జూన్ 2 నుంచి 22 వరకు 21 రోజుల పాటు ఘనంగా నిర్వహించాలని తెలంగాణ రాష్ట్ర ప్రభుత్వం నిర్ణయించింది. ఈ నేపథ్యంలో రోజువారీ కార్యక్రమాల షెడ్యూల్ ను సీఎం కేసీఆర్ విడుదల చేశారు. 

Telangana Decade Celebrations: తెలంగాణ రాష్ట్ర అవతరణ దశాబ్ది ఉత్సవాల షెడ్యూల్ ను  రాష్ట్ర ప్రభుత్వం మంగళవారం ప్రకటించింది. రాష్ట్ర అవతరణ దినోత్సవం జూన్ 2వ తేదీ నుండి 22వ తేదీ వరకు  అంటే.. 21 రోజుల పాటు ఘనంగా నిర్వహించాలని రాష్ట్ర ప్రభుత్వం నిర్ణయించింది. ఈ క్రమంలో ఉత్సవాల రోజువారీ కార్యక్రమాలకు సంబంధించిన షెడ్యూల్ ను సీఎం కేసీఆర్  ఖరారు చేశారు. 

1వ రోజు 'జాతీయ పతాకావిష్కరణ'

జూన్ 2న హైదరాబాద్ లోని గన్ పార్క్ వద్ద అమరవీరుల స్థూపం వద్ద సీఎం కేసీఆర్ నివాళులర్పిస్తారు. అనంతరం డాక్టర్ బీఆర్ అంబేద్కర్ తెలంగాణ సచివాలయం ప్రాంగణంలో సీఎం కేసీఆర్ చేతుల మీదుగా జాతీయ పతాకావిష్కరణ చేశారు. అనంతరం దశాబ్ధి ఉత్సవాల గురించి సందేశం ఇవ్వనున్నారు. అదే రోజు రాష్ట్రంలోని అన్ని జిల్లాల్లో మంత్రుల ఆధ్వర్యంలో జాతీయ పతాక వందనం, దశాబ్ధి ఉత్సవ కార్యక్రమాల ప్రారంభం జరుగనున్నది. 

2 వ రోజు ‘తెలంగాణ రైతు దినోత్సవం

జూన్ 3న రాష్ట్ర వ్యాప్తంగా ఉన్న అన్ని రైతు వేదిక కేంద్రాల్లో రాష్ట్ర వ్యవసాయ రంగంలో సాధించిన విజయాలను, ఉచిత కరెంట్, రైతు బంధు, రైతు బీమా తదితర పథకాల విశిష్టతను తెలియజేసే కార్యక్రమాలను నిర్వహించనున్నారు. 

3 వ రోజు ‘సురక్షా దినోత్సవం’

జూన్ 4న  పోలీసుశాఖ ఆధ్వర్యంలో శాంతిభద్రతల పరిరక్షణకు పోలీసులు చేస్తున్న కృషిని, ఫ్రెండ్లీ పోలీస్ విధానాన్ని, రాష్ట్ర పోలీసు శాఖ సమర్థవంతంగా సేవలను వివరించే విధంగా రాష్ట్ర, జిలాస్థాయిలో కార్యక్రమాలను నిర్వహించనున్నారు. 

4 వ రోజు ‘తెలంగాణ విద్యుత్తు విజయోత్సవం’

జూన్ 5వ తేదీ సోమవారం రోజున రాష్ట్రవ్యాప్తంగా విద్యుత్ రంగంలో సాధించిన గుణాత్మక మార్పును వివరిస్తూ నియోజకవర్గ స్థాయిలో  రైతులు, వినియోగదారులు, విద్యుత్ ఉద్యోగులు, ప్రజాప్రతినిధులతో సమావేశాల ఏర్పాటు చేయనున్నారు.   

5 వ రోజు‘తెలంగాణ పారిశ్రామిక ప్రగతి ఉత్సవం’

జూన్ 6న మంగళవారం నాడు ఆయా రంగాల్లో సాధించిన ప్రగతిని వివరిస్తూ పారిశ్రామిక వాడలు, ఐటీ కారిడార్లలో సభలు సమావేశాల ఏర్పాటు చేయనున్నారు. 

 6 వ రోజు ‘సాగునీటి దినోత్సవం’

 జూన్  7న బుధవారం రోజున సాగునీటి రంగంలో సాధించిన రికార్డు స్థాయి ప్రగతిని వివరిస్తూ ప్రతి నియోజకవర్గంలో సభలు, సమావేశాల ఏర్పాటు చేయనున్నారు.   

7 వ రోజు  ‘ఊరూరా చెరువుల పండుగ’

జూన్ 8 గురువారం డప్పులు, బోనాలు, బతుకమ్మలతో కూడిన సాంస్కృతిక కార్యక్రమాలను ఏర్పాటు చేయనున్నారు. అలాగే.. చెరువు కట్టలపై సభలతో పాటు స్థానిక నాయకులు, ప్రజలు కలిసి చెరువు కట్టమీద సహాపంక్తి భోజనాల ఏర్పాటు చేయనున్నారు. 

8 వ రోజు ‘తెలంగాణ సంక్షేమ సంబురాలు’ 

జూన్ 9 శుక్రవారం రోజున రాష్ట్ర వ్యాప్తంగా నియోజకవర్గాల వారిగా ప్రభుత్వం అందిస్తున్న ఆసరా పింఛన్లు, కల్యాణ లక్ష్మి తదితర సంక్షేమ పథకాల లబ్ధిదారులతో సమావేశాల ఏర్పాటు చేయనున్నారు.

9 వ రోజు ‘తెలంగాణ సుపరిపాలన దినోత్సవం’

జూన్ 10 శనివారం రోజున అన్ని జిల్లా కేంద్రాల్లో సమావేశాలు ఏర్పాటు చేసి, రాష్ట్రంలో పరిపాలన సంస్కరణల ద్వారా ప్రభుత్వ వ్యవస్థలను ప్రజలకు మరింత చేరువ చేయడం ద్వారా కలిగిన మేలును తెలియజేసే కార్యక్రమాల ఏర్పాటు చేయనున్నారు.

10 వ రోజు ‘తెలంగాణ సాహిత్య దినోత్సవం’

జూన్ 11 ఆదివారం రోజున జిల్లాస్థాయిలో కవి సమ్మేళనాలు, రవీంద్రభారతిలో రాష్ట్ర స్థాయి కవి సమ్మేళనం ఏర్పాటు చేయనున్నారు. తెలంగాణ అస్తిత్వం, తెలంగాణ సాధించిన ప్రగతి ప్రతిబింబించేలా జిల్లా, రాష్ట్రస్థాయిలో కవితల పోటీలు నిర్వహించి, విజేతలకు బహుమతులందజేయనున్నారు. 

11 వ రోజు ‘తెలంగాణ రన్’

జూన్ 12 సోమవారం రోజున రాష్ట్ర వ్యాప్తంగా అన్ని నియోజకవర్గ కేంద్రాల్లో యువకులు, విద్యార్థులు, ప్రజా ప్రతినిధులు, అధికారులు, తదితరులతో ఉదయం 6 గంటలకు పోలీసుశాఖ ఆధ్వర్యంలో  తెలంగాణ రన్ కార్యక్రమ నిర్వహించనున్నారు.  

12 వ రోజు  ‘తెలంగాణ మహిళా సంక్షేమ దినోత్సవం’

జూన్ 13 మంగళవారం రోజున రాష్ట్ర వ్యాప్తంగా మహిళా సంక్షేమం కోసం ప్రభుత్వం తీసుకుంటున్న కార్యక్రమాలు, అమలు చేస్తున్న సంక్షేమ పథకాలపై అవగాహన సదస్సు ఏర్పాటు చేయనున్నారు.ఉత్తమ మహిళా ఉద్యోగులకు సన్మాన కార్యక్రమాలు. 

13 వ రోజు ‘తెలంగాణ వైద్యారోగ్య దినోత్సవం’

జూన్‌ 14 బుధవారం రోజున రాష్ట్ర వ్యాప్తంగా వైద్య, ఆరోగ్యరంగంలో జరిగిన విప్లవాత్మక అభివృద్ధి గురించిన సమాచారాన్ని, సందేశాలను రాష్ట్రవ్యాప్తంగా ప్రజలకు తెలియజేయనున్నారు. అదే రోజునిమ్స్‌లో 2వేల పడకల సూపర్ స్పెషాలిటీ దవాఖానా నూతన భవన నిర్మాణానికి, నిమ్స్ విస్తరణ పనులకు సీఎం కేసీఆర్‌ శంకుస్థాపన చేయనున్నారు.

14 వ రోజు ‘తెలంగాణ పల్లె ప్రగతి దినోత్సవం’

జూన్ 15 గురువారం రోజున దేశానికి ఆదర్శంగా నిలిచిన తెలంగాణ పల్లెలు సాధించిన ప్రగతిని తెలిపే పలు కార్యక్రమాలు ఏర్పాటు చేయనున్నారు.

15వ రోజు  ‘తెలంగాణ పట్టణ ప్రగతి దినోత్సవం’

జూన్ 16 శుక్రవారం రోజున పట్టణ ప్రగతి ద్వారా ప్రతి కార్పొరేషన్, మున్సిపాలిటీలు, పట్టణాలు సాధించిన ప్రగతిని, రాష్ట్ర ప్రభుత్వ పథకాల ద్వారా ప్రజలకు చేకూరిన లబ్ధిని తెలిపే కార్యక్రమాల ఏర్పాటు చేయనున్నారు. 

16వ రోజు ‘తెలంగాణ గిరిజనోత్సవం’

జూన్ 17 శనివారం రోజున నూతనంగా ఏర్పడిన గిరిజన గ్రామాల్లో సభల ద్వారా  గిరిజన సంక్షేమం కోసం ప్రభుత్వం తీసుకున్న చర్యల గురించి వివరణ

17వ రోజు ‘తెలంగాణ మంచి నీళ్ల పండుగ’

జూన్‌ 18  ఆదివారం రోజున మిషన్ భగీరథ ద్వారా ఇంటింటికి నల్లాలు బిగించి ఉచితంగా స్వచ్ఛమైన సురక్షితమైన నీటిని సరఫరా చేస్తున్న తీరును వివరించే కార్యక్రమాలు..

18 వ రోజు  ‘తెలంగాణ హరితోత్సవం’

జూన్ 19 సోమవారం రోజున రాష్ట్రవ్యాప్తంగా అన్ని గ్రామాలు, పట్టణాల్లో పెద్ద ఎత్తున మొక్కలు నాటే కార్యక్రమం 

19 వ రోజు ‘తెలంగాణ విద్యాదినోత్సవం’

జూన్ 20 మంగళవారం రోజున రాష్ట్రవ్యాప్తంగా అన్నిరకాల విద్యా సంస్థల్లో సభల ద్వారా  విద్యారంగంలో తెలంగాణ సాధించిన విజయాలపై ప్రచారం

20 వ రోజు  ‘తెలంగాణ ఆధ్యాత్మిక దినోత్సవం’

జూన్ 21 బుధవారం రోజున రాష్ట్రవ్యాప్తంగా ఉన్న  దేవాలయాలు, మసీదులు, చర్చీలు, ఇతర మత ప్రార్థనా మందిరాల్లో వివిధ కార్యక్రమాలు

21వ రోజు ‘అమరుల సంస్మరణ’ కార్యక్రమం'

జూన్ 22 గురువారం రోజున తెలంగాణవ్యాప్తంగా పల్లెపల్లెనా, పట్టణాలు, నగరాల్లో, విద్యాలయాల్లో అమరులకు శ్రద్ధాంజలి ఘటించి, మౌనం పాటించే కార్యక్రమం.