Telangana: కౌలు రైతు వ్యతిరేక ప్రభుత్వం.. టీఆర్ఎస్ సర్కారుపై బండి సంజయ్ ఫైర్
సారాంశం
Telangana: తెలంగాణ భారతీయ జనతా పార్టీ (బీజేపీ) అధ్యక్షుడు, ఎంపీ బండి సంజయ్ కుమార్ ముఖ్యమంత్రి కేసీఆర్ నేతృత్వంలోని టీఆర్ఎస్ సర్కారుపై మరోసారి ఫైర్ అయ్యారు. సీఎం కేసీఆర్ సర్కారు కౌలు రైతు వ్యతిరేక ప్రభుత్వమనీ, కౌలు రైతుల పట్ల తెరాస ప్రభుత్వం చూపుతున్న వివక్ష క్షమించరానిదంటూ తీవ్ర స్థాయిలో విమర్శలు గుప్పించారు.
Telangana: వ్యవసాయ రంగానికి వర్తింపజేస్తున్న ఏ సంక్షేమ పథకమైనా లబ్ధి పొందని కౌలు రైతులు ఎదుర్కొంటున్న సమస్యలపై చర్చించేందుకు రాష్ట్ర ప్రభుత్వం అఖిలపక్ష సమావేశం నిర్వహించాలని తెలంగాణ భారతీయ జనతా పార్టీ (బీజేపీ) అధ్యక్షుడు, పార్లమెంట్ సభ్యులు బండి సంజయ్ కుమార్ డిమాండ్ చేశారు. Telangana ముఖ్యమంత్రి కేసీఆర్ నేతృత్వంలోని టీఆర్ఎస్ సర్కారుపై మరోసారి ఫైర్ అయ్యారు బండి సంజయ్. సీఎం కేసీఆర్ సర్కారు కౌలు రైతు వ్యతిరేక ప్రభుత్వమనీ, కౌలు రైతుల పట్ల తెరాస ప్రభుత్వం చూపుతున్న వివక్ష క్షమించరానిదంటూ తీవ్ర స్థాయిలో విమర్శలు గుప్పించారు. కౌలు రైతుల సమస్యలపై చర్చించేందుకు అఖిలపక్ష సమావేశానికి వివిధ రైతు సంఘాల ప్రతినిధులు, మేధావులను కూడా ఆహ్వానించాలని ముఖ్యమంత్రి కే చంద్రశేఖర్రావుకు రాసిన బహిరంగ లేఖలో డిమాండ్ చేశారు.
రాష్ట్రంలో దాదాపు 14 లక్షల మంది కౌలు రైతులు ఉన్నారని, ఇతర రైతుల నుంచి కౌలుకు తీసుకున్న భూముల్లో సాగుపై ఆధారపడి జీవిస్తున్నారని సంజయ్కుమార్ పేర్కొన్నారు. “ప్రభుత్వం నుండి రైతులుగా గుర్తింపు లేనందున, వారు ఇతర రైతులకు వర్తింపజేస్తున్న ఏ సంక్షేమ పథకాల ప్రయోజనాలను పొందేందుకు కౌలు రైతులు అనర్హులుగా మారారు” అని ఆయన అన్నారు. కౌలు రైతులు కూడా ఇతర రైతుల మాదిరిగానే వ్యవసాయంపై ఆధారపడి ఉన్నప్పటికీ, రైతు బంధు, రైతు బీమా, యంత్ర లక్ష్మి వంటి పథకాలు వారికి వర్తించవు. వారికి విత్తనాలు, ఎరువులపై సబ్సిడీ అందడం లేదు, బ్యాంకుల నుంచి పంట రుణాలు పొందే అర్హత లేదు'' అని పేర్కొన్నారు. అహోరాత్రులు కష్టపడుతున్న కౌలు రైతులకు సంక్షేమ పథకాలు అందకపోవడం దురదృష్టకరమనీ, జీవితంలో ఏనాడూ సాగు చేయని బడా రైతులకు రైతుబంధు కింద ఆర్థిక సాయం అందడం శోచనీయమన్నారు.
భూ యజమానుల హక్కులను హరించకుండా కౌలుదారీ చట్టంలో రాష్ట్రాలు తగిన సవరణలు చేయాలని 11వ పంచవర్ష ప్రణాళిక స్పష్టంగా సూచించిందని ఎంపీ బండి సంజయ్ కుమార్ గుర్తు చేశారు. కౌలు రైతులకు భద్రత, భూయజమానుల ప్రయోజనాల పరిరక్షణ కోసం కౌలుదారుల చట్టానికి సవరణ ఉద్దేశించబడిందని ఆయన చెప్పారు. అయితే రాష్ట్ర ప్రభుత్వం కౌలు రైతులకు ఎలాంటి హక్కులు కల్పించడం లేదని, వారిని రైతులుగా గుర్తించేందుకు కూడా నిరాకరిస్తోందనీ, ఇది చాలా విచారకరమని పేర్కొన్నారు. కౌలు రైతులకు 0.25 శాతం రుణంతో పంట రుణాలు ఇవ్వవచ్చని నేషనల్ బ్యాంక్ ఫర్ అగ్రికల్చర్ అండ్ రూరల్ డెవలప్మెంట్ (నాబార్డ్) సూచించిందని చెప్పారు. “ఆంధ్రప్రదేశ్ ప్రభుత్వం కూడా సాధారణ రైతుల తరహాలో కౌలు రైతులకు సంక్షేమ పథకాల ప్రయోజనాలన్నింటినీ అందజేస్తోంది. కానీ తెలంగాణ రాష్ట్ర సమితి (టీఆర్ఎస్) ప్రభుత్వం కౌలు సాగుపై ఆధారపడిన చిన్న, సన్నకారు రైతుల పట్ల వివక్ష చూపుతోంది. ఇది క్షమించరానిది” అని ఆయన అన్నారు.
భూమిని సాగుచేసేవాడే నిజమైన రైతు అని పేర్కొన్న బండి సంజయ్ కుమార్.. పంట బోనస్, సబ్సిడీ విత్తనాలు, ఎరువులు సహా అన్ని ప్రయోజనాలను అందించడం ప్రభుత్వ బాధ్యత అని అన్నారు. "అవసరమైతే, కౌలు రైతులను రక్షించడానికి ప్రభుత్వం కొత్త చట్టాన్ని రూపొందించాలి లేదా ప్రస్తుత చట్టాలను సముచితంగా సవరించాలి" అని ఆయన డిమాండ్ చేశారు.