సిబ్బంది పొరపాటు: మహబూబాబాద్‌ ఆసుపత్రిలో శిశువులు తారుమారు, చివరికి...

మహబూబాబాద్ ఆసుపత్రిలో సిబ్బంది పొరపాటు కారణంగా  శిశువులు తారుమారయ్యారు.  అయితే  చివరికి  కథ సుఖాంతమైంది.  

మహబూబాబాద్: జిల్లా కేంద్రంలోని  ఆసుపత్రిలో  శిశువుల తారుమారు ఘటన కలకలం రేపుతుంది. అయితే  ఈ విషయాన్ని ఆలస్యంగా గుర్తించి  ఆసుపత్రి సిబ్బంది  ఎవరి శిశువులను వారికే  అప్పగించడంతో  పేరేంట్స్  శాంతించారు.మహబూబాబాద్ జిల్లా గొల్లపల్లి గ్రామానికి  చెందిన  సుమిత్ర ఈ ఏడాది జూలై  31న  మహబూబాబాద్ ప్రభుత్వాసుపత్రిలో  డెలీవరి అయింది.  సుమిత్రకు  కొడుకు పుట్టాడు. పుట్టిన చిన్నారికి పచ్చకామెర్లు  రావడంతో  చిన్నారిని ఇంక్యుబేటర్ లో  ఉంచారు.

 అయితే  అదే ఆసుపత్రిలో మరో మహిళ డెలీవరి అయింది.  ఈ మహిళ  పాపకు జన్మనిచ్చింది. ఈ చిన్నారికి  శ్వాస సంబంధమైన  సమస్య తలెత్తడంతో  సుమిత్ర  కొడుకు స్థానంలో  ఈ చిన్నారిని ఉంచారు.  అయితే తన కొడుకు  పాలు పట్టేందుకు సుమిత్ర  ఇంక్యుబేటర్ ఉన్న ప్రాంతానికి వెళ్లింది. కొడుకు స్థానంలో కూతురు ఉండడంతో షాక్ కు గురైంది.  ఈ విషయాన్ని ఆమె కుటుంబ సభ్యులకు తెలిపింది. సుమిత్ర భర్త, సుమిత్ర తల్లి ఇతర కుటుంబ సభ్యులు  ఆసుపత్రి సిబ్బందిని నిలదీశారు.  కొడుకు పుడితే  బిడ్డగా ఎలా మారిందని ఆసుపత్రి సిబ్బందిని నిలదీశారు.

ఆసుపత్రి  సిబ్బంది ఈ విషయమై  విచారణ జరిపారు.  పొరపాటున  సుమిత్ర కొడుకు స్థానంలో  మరో మహిళ కూతురుకు చికిత్స అందిస్తున్న విషయం తేలింది.  పొరపాటును ఆసుపత్రి సిబ్బంది అంగీకరించారు.  ఈ విషయమై  సుమిత్ర  కుటుంబ సభ్యులు  పోలీసులకు ఫిర్యాదు  చేశారు.ఈ ఫిర్యాదు మేరకు  పోలీసులు  విచారణ జరిపారు.  భవిష్యత్తులో  ఈ తరహా  ఘటనలు జరగకుండా చూసుకుంటామని ఆసుపత్రి సిబ్బంది హామీ ఇచ్చారు. సుమిత్రకు  కొడుకును అప్పగించారు.  మరో మహిళకు పుట్టిన కూతురును ఆమెకు అప్పగించారు