సీఎంగా కేటీఆర్: ప్లాన్ రెడీ,కేసీఆర్ భవిష్యత్తు ఆచరణ ఇదీ?

కేటీఆర్ కు ముఖ్యమంత్రి పదవిని ఇస్తే కేసీఆర్ జాతీయ రాజకీయాలపై కేంద్రీకరిస్తారని అంటున్నారు. జాతీయ రాజకీయాల్లోకి వెళ్లేందుకు వీలుగా రాజ్యసభకు కసీఆర్ వెళ్తారని అంటున్నారు. 

హైదరాబాద్: తెలంగాణలో నూతన ముఖ్యమంత్రిగా యువనేత కేటీఆర్  పదవీ బాధ్యతలు చేపడితే ముఖ్యమంత్రి కేసీఆర్ ఏం చేస్తారన్న ప్రశ్న రాజకీయ వర్గాల్లో మొదలైంది.

ఆరేళ్ల పాటు ముఖ్యమంత్రిగా కొనసాగిన కేసీఆర్ గత ఎన్నికలకు ముందు జాతీయ స్థాయిలో ఫెడరల్ ఫ్రంట్ తెరపైకి తెచ్చి  ప్రాంతీయ పార్టీలను ఏకం చేసే యత్నం చేశారు. అయితే ఇది పెద్దగా ఫలితం ఇవ్వలేదు. 

కేంద్రంలో సంపూర్ణ మెజారిటీ తో బిజెపి అధికార పగ్గాలు చేపట్టడంతో ఫ్రంట్ అటకెక్కింది. తాజాగా రాష్ట్రంలో యువనేతకు రాష్ట్ర ప్రభుత్వ పగ్గాలు కట్ట పెడతారన్న ప్రచారం  ప్రచారంతో కెసిఆర్  రాజ్యసభకు వెళ్తారనే ప్రచారం మొదలైంది.

రాబోయే ఏప్రిల్ నెలలో రెండు రాజ్యసభ స్థానాలు తెలంగాణలో ఖాళీ కానున్నాయి. ఆ రెండు కూడా అధికార పార్టీ అభ్యర్థులకే దక్కనున్నాయి. ముఖ్యమంత్రిగా కేటీఆర్ కు మార్చి నెలలోపే పట్టం కడతారని ప్రచారం ఉన్న నేపధ్యంలో  ఆ వెంటనే వచ్చే రాజ్యసభ ఎన్నికల్లో కెసిఆర్ రాజ్యసభ కు వెళ్లే అవకాశాలు ఉంటాయని అధికార పార్టీ నేతలు అంటున్నారు.

ఈ విడత ఢిల్లీ కేంద్రంగా ఉంటూ ఫెడరల్ ఫ్రంట్  ముందుకు తీసుకెళ్తే జాతీయ నాయకుడిగా కేసిఆర్ కు ప్రత్యేకంగా గుర్తింపు దక్కే అవకాశం ఉంటుందని నేతలు అంటున్నారు.

 గతంలో హైదరాబాద్ కేంద్రంగా నే ఫెడరల్ ఫ్రంట్ రాజకీయాలు చేసిన కెసిఆర్ ఈ విడత మాత్రం ఢిల్లీకి మారి అక్కడి నుంచే చక్రం తిప్పుతారని టిఆర్ఎస్ వర్గాల్లో టాక్ వినిపిస్తోంది. కేటీఆర్ ముఖ్యమంత్రి గా పదవీ బాధ్యతలు చేపడితేనే కెసిఆర్ ప్రత్యామ్నాయ రాజకీయాలను నడిపించే అవకాశం ఉంటుందని గులాబీ నేతలు అంటున్నారు.