వామన్రావు దంపతుల హత్య: రంగంలోకి తమిళిసై, కేసీఆర్ ప్రభుత్వానికి లేఖ
సారాంశం
తెలంగాణ ప్రభుత్వానికి గవర్నర్ తమిళిసై లేఖ రాశారు. లాయర్ వామన్ రావు దంపతుల హత్యపై విచారణ వేగవంతం చేయాలని లేఖలో పేర్కొన్నారు. దోషులకు శిక్షపడేలా చూడాలని.. బాధిత కుటుంబానికి న్యాయం జరిగేలా చూడాలని గవర్నర్ కోరారు.
లాయర్ వామన్ రావు దంపతుల హత్య కేసులో తెలంగాణ గవర్నర్ తమిళిసై రంగంలోకి దిగారు. ముఖ్యమంత్రి కెసిఆర్ ప్రభుత్వానికి ఆమె లేఖ రాశారు.లాయర్ వామన్ రావు దంపతుల హత్యపై విచారణ వేగవంతం చేయాలని లేఖలో పేర్కొన్నారు. దోషులకు శిక్షపడేలా చూడాలని.. బాధిత కుటుంబానికి న్యాయం జరిగేలా చూడాలని గవర్నర్ కోరారు.
కాగా, వామన్ రావు దంపతుల హత్య కేసులో న్యాయస్థానం నిందితులను పోలీస్ కస్టడీకి అనుమతించింది. పోలీసులు దాఖలు చేసిన కస్టడీ పిటిషన్పై మంథని కోర్టు బుధవారం విచారణ జరిపింది. ఈ సందర్భంగా ముగ్గురు నిందితులను 7 రోజుల పాటు కస్టడీకి అనుమతించింది. దీంతో వీరిని పోలీసులు విచారించనున్నారు.
వామన్రావు కేసులో ప్రధాన నిందితుడు బిట్టు శ్రీనును పోలీసులు అరెస్ట్ చేసిన సంగతి తెలిసిందే. హంతకులకు ఆయుధాలతో పాటు కారు సమకూర్చినట్లు పోలీసుల దర్యాప్తులో తేలింది. వామన్ రావు దంపతుల హత్యకు బిట్టు శ్రీను కుట్ర చేసినట్లు తేల్చారు.
Also Read:వామన్రావు కేసు: నిందితులకు ఏడు రోజుల కస్టడీ, మంథని కోర్టు ఆదేశాలు
శ్రీను నడుపుతున్న పుట్టా ట్రస్ట్పై వామన్ రావు కేసులు వేశారు. పిటిషన్లతో బిట్టు శ్రీను ఆదాయం కోల్పోయాడని.. దాంతో వామన్ రావుపై కక్ష పెంచుకున్నాడని చెప్పారు పోలీసులు.
ఆదాయ మార్గాలు గండి కొట్టినందుకు వామన్ రావును హత్య చేసేందుకు బిట్టు శ్రీను కుట్ర చేశాడని ఐజీ నాగిరెడ్డి తెలిపారు. మరోవైపు ఈ కేసులో మరో నిందితుడి కోసం పోలీసులు గాలింపు చర్యలు చేపట్టారు.
ఈ రోజు లేదా రేపు అతనిని అదుపులోకి తీసుకునే అవకాశం వుందని సమాచారం. ఈ హత్య కేసులో మొత్తం ఐదుగురి ప్రమేయం వున్నట్లు పోలీసులు తేల్చారు. కుంట శ్రీను, బిట్టు శ్రీను, చిరంజీవి, కుమార్లను ఇప్పటికే ఖాకీలు అరెస్ట్ చేశారు.
గత వారం మంథని నుంచి హైదరాబాద్ వెళ్తున్న వామన్ రావు దంపతులను రోడ్డుపై అడ్డగించిన నిందితులు వారిని కత్తులతో దారుణంగా నరికి చంపిన విషయం తెలిసిందే.