సరూర్ నగర్‌ : కాంట్రాక్టర్ వేధింపులు.. పిల్లలతో సహా భార్యాభర్తల ఆత్మహత్యాయత్నం

కాంట్రాక్టర్ వేధింపులు తాళలేక ఓ వ్యక్తి తన కుటుంబంతో సహా ఆత్మహత్యాయత్నానికి పాల్పడ్డాడు. ఖమ్మానికి చెందిన అతను ఫ్యామిలీతో కలిసి హైదరాబాద్‌ సరూర్ నగర్ వచ్చి ఈ ఘాతుకానికి పాల్పడ్డాడు.   

హైదరాబాద్ (hyderabad) సరూర్‌నగర్ (saroornagar) పోలీసు స్టేషన్ పరిధిలో ఓ కుటుంబం ఆత్మహత్యాయత్నం చేసింది. ఇద్దరు పిల్లలకు నిద్రమాత్రలు వేసి దంపతులు ఆత్మహత్యాయత్నం చేశారు. అయితే పిల్లలు వాంతులు చేసుకోవడంతో ప్రాణాపాయం నుంచి బయటపడగా.. భార్యాభర్తల ఆరోగ్య పరిస్ధితి మాత్రం విషమంగా మారింది. రూ. 2 కోట్ల వరకూ రావాల్సిన కాంట్రాక్ట్​ బిల్లులు (contract bills) రాకుండా ఓ వ్యక్తి అడ్డుకోవడంతో ఆత్మహత్య చేసుకోవాలని నిర్ణయించుకున్నట్లు బాధితుడు సెల్ఫీ వీడియోలో ఆవేదన వ్యక్తం చేశారు.

వివరాల్లోకి వెళితే.. ఖమ్మంకు (khammam) చెందిన దంపతులు శశికుమార్​, శ్వేత తమ ఇద్దరు పిల్లలతో సహా హైదరాబాద్​ దిల్​సుఖ్​నగర్​(dilsukhnagar) లోని లాడ్జిలో దిగారు. అనంతరం పిల్లలకు నిద్ర మాత్రలు ఇచ్చి.. భార్య శ్వేతతో పాటు తానూ తీసుకున్నారు. అంతకుముందుగా సెల్ఫీ వీడియోలో ఆత్మహత్యకు గల కారణాలను వెల్లడిస్తూ సూసైడ్​ లెటర్​తో పాటు సెల్ఫీ వీడియో తీసుకున్నారు. తనకు రావాల్సిన కాంట్రాక్టు బిల్లులు రావడంలేదని... ఆ డబ్బులు ఇవ్వకుండా దినేష్​ రెడ్డి అనే కాంట్రాక్టర్​ వేధింపులకు గురిచేయడంతోపాటు... ఆర్థిక ఇబ్బందులు కూడా తోడవ్వడంతో మనస్తాపానికి గురైనట్లుగా తెలుస్తోంది. ఇందుకు సంబంధించిన మరిన్ని వివరాలు తెలియాల్సి వుంది.