ప్రతి నియోజకవర్గంలోనూ పార్టీ ఆఫీస్ పెడతా.. బీఆర్ఎస్ అధిష్టానంతో పోరుకు పొంగులేటి రెడీ

బీఆర్ఎస్ అధిష్టానంతో తాడోపేడో తేల్చుకునేందుకు మాజీ ఎంపీ పొంగులేటి శ్రీనివాస్ రెడ్డి సిద్ధమయ్యారు. దీనిలో భాగంగా ఉమ్మడి ఖమ్మం జిల్లాలోని ప్రతీ నియోజకవర్గంలో పార్టీ ఆఫీస్‌ను ప్రారంభిస్తామని ఆయన ప్రకటించారు. 

ఖమ్మం మాజీ ఎంపీ , బీఆర్ఎస్ నేత పొంగులేటి శ్రీనివాస్ రెడ్డి మరోసారి సొంత పార్టీపై విమర్శలు గుప్పించారు. ఎవరెన్ని ఇబ్బందులు పెట్టినా.. తన అభిమానులకు అండగా వుంటానని అన్నారు. ఉమ్మడి ఖమ్మం జిల్లాలోని ప్రతీ నియోజకవర్గంలో పార్టీ ఆఫీస్‌ను ప్రారంభిస్తామని ఆయన తెలిపారు. తన కుటుంబ సభ్యులను కాపాడుకునేందుకు తగ్గేది లేదన్నారు. అధికారం ఎవరి సొత్తు కాదని పొంగులేటి శ్రీనివాస్ రెడ్డి తీవ్ర వ్యాఖ్యలు చేశారు. 

ఇకపోతే.. బీఆర్ఎస్‌ను వీడాలని నిర్ణయించుకున్న శ్రీనివాస్ రెడ్డి స్పీడ్ పెంచారు. దీనిలో భాగంగా బుధవారం తన అనుచరులు, మద్దతుదారులతో ఆత్మీయ సమావేశం నిర్వహించారు. ఈ సందర్భంగా పొంగులేటి మాట్లాడుతూ.. గ్రామ సర్పంచ్‌లకు బిల్లులు ఇవ్వడం లేదని ఆరోపించారు. ఏదైనా ఇబ్బంది పెడతారనే వాళ్లు నా సమావేశానికి రాలేదని శ్రీనివాస్ రెడ్డి అన్నారు. ఇలాంటి వాటికి శీనన్న నొచ్చుకోడని మీరు రాకపోయినా పర్లేదని ఆయన తెలిపారు. ఏ గూటి పక్షి ఆ గూటికి చేరుకుంటుందన్న ఆయన.. సందర్భం వచ్చినప్పుడు శీనన్న గూటికి కాలమే చేరుస్తుందని వ్యాఖ్యానించారు. 

ఇదిలావుండగా.. ఖమ్మం జిల్లా బీఆర్ఎస్‌లో మాజీ ఎంపీ పొంగులేటి వర్గంపై పార్టీ హైకమాండ్ ఆగ్రహం వ్యక్తం చేసింది. సీఎం కేసీఆర్‌పై తిరుగుబాబు చేసిన వైరా నియోజకవర్గానికి చెందిన 20 మంది నేతలపై బీఆర్ఎస్ అధిష్టానం బహిష్కరణ వేటు వేసింది. వీరిలో రాష్ట్ర మార్క్‌ఫెడ్ వైస్ ఛైర్మన్ బొర్రా రాజశేఖర్ , వైరా పురపాలక ఛైర్మన్ జైపాల్ సహా మరో 18 మంది వున్నారు. బీఆర్ఎస్ పెద్దలతో పొంగులేటికి గ్యాప్ వచ్చిన సంగతి తెలిసిందే. ఈ నేపథ్యంలో ఆయన మండల స్థాయి నాయకులతో చర్చలు జరుపుతున్నారు. ఈ క్రమంలో ఆదివారం ఐదు మండలాలకు చెందిన నేతలతో శ్రీనివాస్ రెడ్డి సమావేశమయ్యారు. దీనిపై ఆగ్రహం వ్యక్తం చేసిన పార్టీ అధిష్టానం.. పొంగులేటితో సమావేశమైన నేతలను సస్పెండ్ చేసింది. 

అయితే తన అనుచరులను సస్పెండ్ చేయడంపై పొంగులేటి శ్రీనివాస్ రెడ్డి ఆగ్రహం వ్యక్తం చేశారు. వాళ్లను, వీళ్లను సస్పెండ్ చేయడం కాదని.. దమ్ముంటే తనను సస్పెండ్ చేయాలని సవాలు విసిరారు. మొన్నటివరకు బీఆర్ఎస్ పార్టీ  కార్యక్రమాలకు తనను ఆహ్వానించారని.. వాళ్ల గెలుపు కోసం తనను ప్రాధేయపడ్డారని అన్నారు. తనకు బీఆర్ఎస్ సభ్యత్వం లేదని ఎవరో అంటున్నారని.. అలాంటప్పుడు డిసెంబర్ వరకు పార్టీ కార్యక్రమాల్లో తన బొమ్మ ఎందుకు వేశారని ప్రశ్నించారు. తన అనుచరుల అభీష్టం మేరకే పార్టీ మారుతున్నట్టుగా చెప్పారు.