నాంపల్లి అగ్ని ప్రమాదం: ఆధారాలను సేకరిస్తున్న క్లూస్ టీమ్, రమేష్ జైస్వాల్ ను అదుపులోకి తీసుకోనున్న పోలీసులు

నాంపల్లి అగ్ని ప్రమాదంపై  క్లూస్ టీమ్  ఆధారాలను సేకరిస్తుంది. అగ్ని ప్రమాద తీవ్రత పెరగడానికి కెమికల్ డబ్బాలు కారణమని  అగ్నిమాపక శాఖ  అభిప్రాయపడుతుంది.

హైదరాబాద్:నాంపల్లి అగ్ని ప్రమాదంపై క్లూస్ టీమ్  ఆధారాలను సేకరిస్తుంది.  ఈ నెల  13వ తేదీన  నాంపల్లిలోని  బజార్ ఘాట్ లో  ఓ భవనంలో అగ్ని ప్రమాదం  జరిగింది.ఈ ప్రమాదంలో  తొమ్మిది మంది మృతి చెందారు. మరో  ఎనిమిది  మంది  ఈ ఘటనలో తీవ్రంగా గాయపడ్డారు. గాయపడిన  వారు ఉస్మానియా ఆసుపత్రిలో  చికిత్స పొందుతున్నారు. 

అగ్ని ప్రమాదం జరిగిన  భవనంలో ఫోరెన్సిక్ టీమ్  ఆధారాలను సేకరిస్తుంది. మరో వైపు ఈ ప్రమాదం జరగడానికి గల కారణాలపై  క్లూస్ టీమ్  ఆరా తీస్తుంది. ప్రమాదం జరిగిన భవనంతో పాటు ఎదురుగా  ఉన్న భవనం కూడ స్వల్వంగా దెబ్బతింది . ఎదురుగా ఉన్న భవనంలో నివసిస్తున్న వారు  సహాయక చర్యల్లో పాల్గొన్నారు. అగ్ని ప్రమాదం జరిగిన సమయంలో  చోటు చేసుకున్న పరిణామాల గురించి క్లూస్ టీమ్  బృందం  ఆరా తీస్తుంది.

అగ్ని ప్రమాదం జరిగిన  భవనంలో  రసాయన డబ్బాలను నిల్వ చేశారు.  ఈ డబ్బాల కారణంగా అగ్ని ప్రమాద తీవ్రత పెరిగిందని  అగ్నిమాపక శాఖ అభిప్రాయపడింది.   అయితే  రసాయనాలను ఈ భవనంలో  నిల్వ చేసినందుకు  రమేష్ జైస్వాల్ పై పోలీసులు కేసు నమోదు చేశారు. ఈ అగ్ని ప్రమాదం జరిగిన విషయం తెలిసన తర్వాత రమేష్ జైస్వాల్ అస్వస్థతకు గురయ్యారు. ఆయన ఓ ఆసుపత్రిలో చికిత్స పొందుతున్నారు.  ఆసుపత్రి నుండి డిశ్చార్జ్ అయిన వెంటనే  రమేష్ జైశ్వాల్ ను  పోలీసులు అదుపులోకి తీసుకొంటారు.

మరోవైపు  అగ్ని ప్రమాదం జరిగిన  భవనాన్ని జేఎన్‌టీయూ  ఇంజనీర్ల బృందం పరిశీలించనుంది. భవనాన్ని పరిశీలించిన తర్వాత  భవన పటిష్టతపై  ఇంజనీర్ల బృందం  ఓ నివేదికను ఇవ్వనున్నారు. ఈ నివేదిక ఆధారంగా  భవనం కూల్చివేతపై నిర్ణయం తీసుకొంటారు.

ఇదిలా ఉంటే ఈ ప్రమాదంలో  గాయపడిన  వారికి మెరుగైన వైద్య సహాయం అందించాలని ప్రభుత్వం  వైద్యులను ఆదేశించింది.  ఉస్మానియా ఆసుపత్రిలో చికిత్స పొందుతున్న క్షతగాత్రుల పరిస్థితి విషమంగానే ఉందని సమాచారం.