Ball Tampering చెన్నైపై బాల్ ట్యాంపరింగ్ ఆరోపణలు! అదీ అసలు విషయం..

ఐపీఎల్ మొదలై రెండ్రోజులే అయ్యింది. అప్పుడే ఓ కొత్త వివాదం మొదలైంది. గతంలో ఎన్నడూ లేని బాల్ ట్యాంపరింగ్ తెరపైకి వచ్చింది. 

Ball Tampering Allegation: చెన్నై సూపర్ కింగ్స్ (Chennai Super Kings) మీద బాల్ ట్యాంపరింగ్ ఆరోపణలు వచ్చాయి. ముంబైతో మ్యాచ్ జరుగుతుండగా చెన్నై కెప్టెన్ రుతురాజ్ గైక్వాడ్, పేసర్ ఖలీల్ అహ్మద్ చేతులు మార్చుకున్న దాని గురించి సందేహాలు మొదలయ్యాయి. అయితే ఈ ఆరోపణలకు సమాధానం కూడా వచ్చేసింది (CSK ball tampering 2025 news).

సోషల్ మీడియాలో ఒక వీడియో వైరల్ అవుతోంది. ఖలీల్ అహ్మద్ బౌలింగ్ చేయడానికి ముందు రుతురాజ్ గైక్వాడ్‌ను పిలుస్తున్నాడు. రుతురాజ్ రాగానే తన జేబులోంచి ఏదో తీసి అతని చేతికి ఇచ్చాడు. ఆ తర్వాత రుతురాజ్ దాన్ని తన జేబులో వేసుకుని ఖలీల్ బౌలింగ్ చేయమని చెప్పాడు.

ఈ వీడియో బయటకు రావడంతో చెన్నై సూపర్ కింగ్స్ బాల్ ట్యాంపరింగ్ చేసిందని ఆరోపణలు వస్తున్నాయి. ఖలీల్ జేబులో ఏదో ఉందని, దానితో బంతిని ట్యాంపర్ చేయడానికి ప్రయత్నించాడని అంటున్నారు. ఒకసారి దక్షిణాఫ్రికాపై ఆస్ట్రేలియాకు చెందిన కామెరాన్ బాన్‌క్రాఫ్ట్ తన జేబులో శాండ్‌పేపర్‌తో బంతిని ట్యాంపర్ చేయడానికి ప్రయత్నించాడు. కానీ దొరికిపోవడంతో 9 నెలలు నిషేధానికి గురయ్యాడు. ఆ విషయాన్ని కూడా ఇప్పుడు గుర్తు చేస్తున్నారు నెటిజన్లు. ఆ సమయంలో ఆస్ట్రేలియా జట్టు కెప్టెన్ స్టీవ్ స్మిత్, వైస్ కెప్టెన్ డేవిడ్ వార్నర్‌లను కూడా ఏడాది పాటు నిషేధించారు.

అయితే ఖలీల్ చేతికి ఉంగరం ఉందని, బౌలింగ్ చేసే ముందు ఆ ఉంగరాన్ని తీసి రుతురాజ్ దగ్గర పెట్టాడని కొందరు అంటున్నారు. ముంబై ఇన్నింగ్స్ మొదలయ్యే ముందు ఈ సంఘటన జరిగిందని, అప్పుడే ఎవరైనా బంతిని ఎందుకు ట్యాంపర్ చేస్తారని వారు ప్రశ్నిస్తున్నారు. దీని గురించి చెన్నై, ముంబై లేదా భారత క్రికెట్ బోర్డు బీసీసీఐ ఇంకా ఏమీ చెప్పలేదు.