ఓ వ్యక్తి పోరాటాన్ని ప్రజాస్వామ్య పోరాటంగా ఎందుకు చిత్రీకరిస్తున్నారు- కాంగ్రెస్ పై జ్యోతిరాదిత్య సింధియా ఫైర్

కేంద్ర మంత్రి జ్యోతిరాదిత్య సింధియా కాంగ్రెస్ పై మండిపడ్డారు. ఓ వ్యక్తి న్యాయ పోరాటాన్ని కాంగ్రెస్ ప్రజాస్వామ్య పోరాటంగా ఎందుకు చిత్రీకరిస్తోందని అన్నారు. అనర్హత వేటు పడిన వారిలో రాహుల్ గాంధీ మొదటి వ్యక్తి కాదని తెలిపారు. 

రాహుల్ గాంధీ వ్యక్తిగత న్యాయ పోరాటాన్ని ప్రజాస్వామ్యం కోసం చేస్తున్న పోరాటంగా కాంగ్రెస్ ఎందుకు చిత్రీకరించాలని చూస్తోందని కేంద్ర మంత్రి జ్యోతిరాదిత్య సింధియా ప్రశ్నించారు. కొత్త స్థాయికి చేరుకోవడానికి, భారత ప్రజాస్వామ్యంతో ఆడుకోవడానికి కాంగ్రెస్ ఏ మాత్రం వెనకడుగు వేయదని ఇప్పుడు స్పష్టమైందని విమర్శించారు. ‘‘రాజకీయంగా నిలదొక్కుకునేందుకు అన్ని రకాలుగా ప్రయత్నిస్తోంది. ఇది ప్రజాస్వామ్యం కోసం జరిగే పోరాటం కాదు. కేవలం వ్యక్తి పోరాటం’’ అని అన్నారు.

లోక్ సభ నుంచి అనర్హత వేటు పడిన వారిలో రాహుల్ గాంధీ మొదటి వ్యక్తి కాదని సింధియా అన్నారు. గతంలో జయలలిత, ఆజంఖాన్ లపై అనర్హత వేటు వేశారన్నారు. కానీ ఈసారి ఎందుకింత హడావుడి చేస్తున్నారని, ప్రజలు నలుపు రంగు దుస్తులు ఎందుకు ధరిస్తున్నారని తెలిపారు.‘‘రాహుల్ గాంధీకి ప్రత్యేక ట్రీట్ మెంట్ ఇస్తున్నారు. ఆయన కోర్టుకు వెళ్లగానే కాంగ్రెస్ నేతల సైన్యం వచ్చింది. ఇది న్యాయవ్యవస్థపై ఒత్తిడి తెచ్చే ప్రయత్నం కాకపోతే ఇంకేంటి ? ఇదే గాంధేయ రాజకీయమా? ఇది ఒక వ్యక్తి కోసమే చేస్తున్నారా ?’’ అని ప్రశ్నించారు.

రాహుల్ గాంధీ తాను గాంధీనని చెబుతూనే, క్షమాపణలు చెప్పనని అనడం ఆశ్చర్యంగా ఉందని సింధియా అన్నారు. గాంధీ కుటుంబ సభ్యులకు ప్రత్యేక నిబంధనలు ఉండాలని కాంగ్రెస్ సీనియర్ నేత ఒకరు అన్నారని ఆయన తెలిపారు. కాంగ్రెస్ సిద్ధాంతాలను 'జాతి వ్యతిరేకులు'గా అభివర్ణించిన సింధియా.. క్షమాపణలు చెప్పడం వల్ల ఎవరూ చిన్నవారైపోరని అన్నారు. కానీ కొన్ని పార్టీలు దేశం కంటే ముందు తామే ముందున్నామని భావిస్తున్నాయని చెప్పారు.

జ్యోతిరాదిత్య సింధియా వ్యాఖ్యలపై కాంగ్రెస్ ఎంపీ అధిర్ చౌధురి స్పందించారు. అదానీ కుంభకోణంపై జేపీసీ విచారణ జరిపించాలన్న పార్టీ డిమాండ్ ఎందుకు తప్పో సింధియా కాంగ్రెస్ కు వివరించాలని డిమాండ్ చేశారు. ‘‘ మమ్మల్ని విమర్శించడానికి బీజేపీ మాజీ కాంగ్రెస్ వాదులను రంగంలోకి దింపింది. నలుపు రంగుతో మీ సమస్య ఏమిటి? ప్రధాని మోడీ బాడీగార్డులు కూడా నలుపు రంగు దుస్తులు ధరిస్తారు. మీలా కుంకుమపువ్వు మాత్రమే కాకుండా మేము అన్ని రంగులను ప్రేమిస్తాము. చూడండి.. మా జుట్టు కూడా నల్లగా ఉంటుంది. మా జుట్టు తెల్లబడటం ప్రారంభించినప్పుడు మేము బాధపడతాము’’ అని అధీర్ చౌధురి అన్నారు.