Liquor ban: మ‌ద్యం అమ్మకాలపై సీఎం యోగి సంచ‌ల‌న ప్ర‌క‌టన‌.. ఆ ప్రాంతాల్లో ఆ షాపులు ఉండోద్దు..

Liquor ban: ఉత్తరప్రదేశ్ ముఖ్యమంత్రి యోగి ఆదిత్యనాథ్ కీల‌క నిర్ణ‌యం తీసుకున్నారు.  అయోధ్య, మథురలో  మద్యం అమ్మకాలపై పూర్తి నిషేధం విధించారు. అయోధ్యలోని రామమందిరం, మథురలోని కృష్ణ జన్మభూమికి సమీపంలోని ప్రాంతాల్లో మద్యం విక్రయాలపై నిషేధం విధిస్తూ.. ఉత్తరప్రదేశ్ ప్రభుత్వం ఆదేశించింది.  

Liquor ban: ఉత్తర ప్రదేశ్ సీఎం యోగి ఆదిత్యానాథ్ సంచ‌ల‌న నిర్ణ‌యం తీసుకున్నారు. పుణ్య‌క్షేత్రాలైన అయోధ్యలోని రామమందిరం, కృష్ణ జన్మభూమి మథుర దేవాలయాల ప‌రిస‌రా ప్రాంతాల్లో మద్యం అమ్మకాలపై పూర్తి నిషేధం విధించారు. ఈ ప్రాంతాల్లో 10 కిలోమీట‌ర్ల ప‌రిధిలో మద్యం అమ్మ‌కాల‌ను చేప‌ట్ట‌కూడ‌ద‌ని ఆదేశించారు. అదే విధంగా అక్కడ ఉన్న మద్యం దుకాణాల యజమానుల లైసెన్స్‌లను ప్రభుత్వం రద్దు చేసింది. 

ఉత్తరప్రదేశ్‌లోని మథుర జిల్లాలో శ్రీకృష్ణ జన్మస్థలం చుట్టూ 10 కిలోమీటర్ల పరిధిలోని మ‌ద్యం అమ్మ‌కాల‌ను నిషేధించారు. మథుర మున్సిపల్ కార్పొరేషన్‌లోని 22 వార్డుల్లోని 37 షాపుల్లో మద్యం, బీరు, గంజాయి తదితర విక్రయాలను బుధవారం నుంచి పూర్తిగా నిలిపివేశారు. ఈ సమాచారాన్ని అధికారులు అందించారు. జూన్ 1నుంచి మాదక ద్రవ్యాల విక్రయాలను నిలిపివేయాలని ఎక్సైజ్ శాఖకు ఆదేశాలు అందాయి. దీంతో ఈ శాఖ మొత్తం 37 దుకాణాలకు తాళాలు వేసి ఉంది.

అలాగే.. అయోధ్యలోని రామమందిరం చుట్టుపక్కల ఉన్న మద్యం దుకాణాల యజమానుల లైసెన్స్‌లను యోగి ప్రభుత్వం రద్దు చేసింది. భారీ మొత్తంలో జంతువుల పాలను ఉత్పత్తి చేసే మథురలో వ్యాపారులు పాల విక్రయాలను చేపట్టి పరిశ్రమను పునరుద్ధరించవచ్చని రాష్ట్ర ప్రభుత్వం సూచించింది. 

గత ఏడాది యోగి  ప్ర‌భుత్వం మథురలో మద్యం, మాంసం విక్రయాలపై పూర్తి నిషేధం విధించారు. గతేడాది సెప్టెంబరు 10న శ్రీకృష్ణ జన్మాష్టమి సందర్భంగా మథుర వచ్చిన ముఖ్యమంత్రి యోగి ఆదిత్యనాథ్ బహిరంగ సభలో ప్రసంగిస్తూ.. 10 కిలోమీట‌ర్ల ప్రాంతాన్ని తీర్థయాత్రగా ప్రకటించారు. ఈ ప్రాంతంలో మద్యం, మాంసం అమ్మకాలు నిషేధించాలని ఆదేశించారు. కానీ పూర్తి స్థాయిలో అమ‌లు చేయ‌లేక‌పోయారు. 

ఈ సంద‌ర్భంలో జిల్లా ఎక్సైజ్ అధికారి ప్రభాత్ చంద్ మాట్లాడుతూ.. బుధవారం నుంచి మ‌థుర‌ నగరంలో మద్యం, మాంసం విక్రయాలు పూర్తిగా నిలిచిపోయాయి. మద్యం షాపులను తక్షణమే మూసివేయాలని రెండు రోజుల క్రితం ప్రభుత్వ స్థాయి నుంచి ఉత్తర్వులు అందాయన్నారు. దీంతో ఆయా షాపుల్లో మద్యం విక్రయాలను పూర్తిగా నిషేధించినట్లు తెలిపారు. జూన్ 1 నుంచి ఈ మద్యం దుకాణాలను పూర్తిగా మూసివేస్తున్నట్లు తెలిపారు.

అలాగే మున్సిపల్ కమిషనర్ అనునయ్ ఝా మీడియాతో మాట్లాడుతూ.. నగరంలోని 22 వార్డుల్లో మద్యం, బీరు, గంజాయి, బార్లు, మోడల్ షాపుల మూసివేతకు ఎక్సైజ్ శాఖ చర్యలు చేపట్టిందని తెలిపారు. గ‌తంలో వారణాసి, బృందావనం, అయోధ్య, చిత్రకూట్, దేవ్‌బంద్, దేవా షరీఫ్, మిస్రిఖ్-నైమిశారణ్య వంటి అన్ని ప్రార్థనా స్థలాలలో మద్యం దుకాణాలపై నిషేధం, మాంసాహార విక్రయాలను నిషేధిస్తున్నట్లు సీఎం యోగి ప్రకటించారు.