PMLA : ఈడీ అరెస్టులు సరైనవే.. పోలీసు విభాగం కాకపోయినా అది చట్టబద్దమే : సుప్రీంకోర్టు

పిఎంఎల్ఏ యాక్ట్ ప్రకారం ఈడీ చేసే అరెస్టులు సరైనవేనని సుప్రీంకోర్టు తేల్చింది.   

న్యూఢిల్లీ : మనీలాండరింగ్ (పిఎంఎల్ఏ) ప్రకారం విచారణ,  అరెస్టులు, ఆస్తుల జప్తు చేపట్టేందుకు ఎన్ఫోర్స్మెంట్ డైరెక్టరేట్ అధికారాలను సుప్రీంకోర్టు సమర్థించింది. ఈ మేరకు దాఖలైన పిటిషన్ పై బుధవారం కీలక వ్యాఖ్యలు చేసింది. పిఎంఎల్ఏ చట్టంలోని నిబంధనల చట్టభద్రతను సవాలు చేస్తూ దాఖలైన పిటిషన్లపై జస్టిస్ ఎంఏ ఖాన్విల్కర్ నేతృత్వంలోని ధర్మాసనం విచారణ చేపట్టింది. ఎన్ఫోర్స్మెంట్ డైరెక్టరేట్ కు అధికారాలు కల్పించే.. పిఎంఎల్ఏ చట్టంలోని సెక్షన్లు 5, 8(4), 15,17,19లు చట్టబద్ధమేనని ధర్మాసనం స్పష్టం చేసింది. బెయిల్ విషయంలోనూ సెక్షన్ 45 సరైనదేనని నొక్కిచెప్పింది.

ఈడీ అధికారులు పోలీసులు కాదు.. కానీ…
పిఎంఎల్ఏ లోని పలు సెక్షన్లను సవాలు చేస్తూ దాఖలైన పిటిషన్లపై విచారణ సందర్భంగా ధర్మాసనం కీలక వ్యాఖ్యలు చేసింది. దర్యాప్తు సంస్థ అయిన ఈడీ, తీవ్ర నేరాల దర్యాప్తు కార్యాలయం (ఎస్ఎష్ఐఓ), డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ)వంటివి పోలీసు విభాగాలు కాదని ధర్మాసనం స్పష్టం చేసింది. అయితే విచారణలో భాగంగా ఆయా సంస్థలు నమోదుచేసే వాంగ్మూలాలు ఆధారాలే అని పేర్కొంది.

ఈసీఐఆర్.. ఎఫ్ఐఆర్ కాదు..
- మనీలాండరింగ్ కేసులో నిందితులను అదుపులోకి తీసుకుంటున్న సమయంలో అరెస్టు సంబంధించిన విషయాలను ఈడీ అధికారులు వెల్లడించటం తప్పనిసరి కాదని పేర్కొంది సుప్రీంకోర్టు.

- ఫిర్యాదు పత్రాన్ని నిందితులకు ఇవ్వాల్సిన అవసరం లేదని పేర్కొంది. పీఎంఎల్ఏ చట్టం పరిధిలో మనీలాండరింగ్ అనేది తీవ్రమైన నేరమని ధర్మాసనం తెలిపింది

- ఎఫ్ఐఆర్ కు ఈసీఐఎల్ సమానం కాదు. ముందస్తుగా ఎఫ్ఐఆర్ నమోదు చేయకపోవడం ఈడీ విచారణకు అడ్డంకి కాదు.. అని పేర్కొంది.

- మరోవైపు.. పీఎంఎల్ఏ చట్టంలో బెయిల్ కోసం జంట నిబంధనలు చట్టబద్ధమేనని, ఏకపక్షం కాదని ధర్మాసనం పేర్కొంది. ఈ నిబంధనలు బెయిల్ పొందటంలో కఠినంగా మారినట్లు పిటిషనర్లు పేర్కొనటాన్ని తోసిపుచ్చింది. 

- పీఎంఎల్ఏ చట్టంలో పలు సవరణలు చేయాలని వచ్చిన ప్రశ్నలకు బదులుగా.. తమ బెంచ్ దీనిమీద నిర్ణయం తీసుకోలేదని, ఏడుగురు సభ్యుల బెంచ్ విచారిస్తుందని జస్టిస్ ఖాన్విల్కర్ పేర్కొన్నారు. 

- పీఎంఎల్ఏ చట్టంలోని నిబంధనలమీద వందకు పైగా పిటిషన్లు దాఖలయ్యాయి. వాటన్నింటిని ఒకేసారి విచారిస్తోంది సుప్రీంకోర్లు.

- పోలీస్ అధికారులను దర్యాప్తు ఏజెన్సీలు ఉపయోగిస్తున్నాయని, దర్యాప్తులో సీఆర్పీసీని అనుసరించాలని పిటిషనర్లు కోరారు. 

- ఈ సందర్భంగా అరెస్టులు, బెయిల్ మంజూరు, ఆస్తుల జప్తు అనేవి కోడ్ ఆఫ్ క్రిమినల్ ప్రొసీజర్ (సీఆర్పీసీ)కిందకు రావని పేర్కొంది.