"కాంగ్రెస్ పార్టీ హయాంలో కరెంట్ ఇవ్వలేదు.. అందుకే జనాభా పెరిగింది" : కేంద్ర మంత్రి సంచలన వ్యాఖ్యలు

కాంగ్రెస్ హయాంలో కరెంటు ఇవ్వలేదని, దీంతో జనాభా పెరిగిపోయిందని కేంద్రమంత్రి, బీజేపీ నేత ప్రహ్లాద్ జోషి ఆరోపించారు. ప్రస్తుతం ఆయన వ్యాఖ్యలు రాజకీయ వర్గాల్లో చర్చనీయంగా మారాయి.  

కర్ణాటక అసెంబ్లీ పదవీకాలం మే నెలతో ముగియనుంది. ఇలాంటి పరిస్థితుల్లో త్వరలో ఎన్నికల తేదీలు ప్రకటించే అవకాశముంది. ఈ నేపథ్యంలో రాజకీయ పార్టీలు జోరుగా ప్రచారం ప్రారంభించాయి. ఎన్నికల దృష్ట్యా, కేంద్ర మంత్రి ప్రహ్లాద్ జోషి "విజయ సంకల్ప్ యాత్ర" కింద హాసన్ జిల్లా జావగల్‌లో భారీ రోడ్‌షోలో పాల్గొన్నారు. అక్కడ ప్రజలను ఉద్దేశించి మాట్లాడుతున్నప్పుడు ఆయన నోరు జారారు.

కర్ణాటకలో అధికారంలోకి వస్తే ఉచిత విద్యుత్ అందిస్తామని కాంగ్రెస్ పార్టీ ఎన్నికల హామీపై కేంద్ర పార్లమెంటరీ వ్యవహారాల మంత్రి ప్రహ్లాద్ జోషి కాంగ్రెస్‌పై విరుచుకుపడ్డారు. కాంగ్రెస్ హయాంలో కరెంటు ఇవ్వలేదని, ఫలితంగా జనాభా పెరిగిందని ప్రహ్లాద్ జోషి సంచలన వ్యాఖ్యలు చేశారు. ఇప్పుడు ఎన్నికల ముందు  ఉచిత విద్యుత్ ఇస్తామని కాంగ్రెస్ చెబుతోందనీ, ఉచిత కరెంటు ఇస్తామంటే నమ్ముతారా? వారి కాలంలో కరెంటు ఇవ్వలేదు.

గ్రామాల్లో ఎప్పుడూ కరెంటు ఉండేది కాదు. ప్రధాని మోదీ అధికారంలోకి వచ్చిన తర్వాత మేము (బీజేపీ) 24 గంటల కరెంటు ఇవ్వగలుగుతున్నాం’’ అని ప్రహ్లాద్ జోషి అన్నారు. వాళ్లు (కాంగ్రెస్‌) తక్కువ కరెంటు ఇచ్చేవారు కాబట్టి మన జనాభా పెరిగిందని ఆయన ఆసక్తికర వ్యాఖ్యలు చేశారు. వచ్చే ఎన్నికల్లో గెలిస్తే ప్రతి నెలా 200 యూనిట్ల ఉచిత విద్యుత్ ఇస్తామని కర్ణాటక కాంగ్రెస్ హామీ ఇచ్చింది. అయితే ఈ ప్రకటనపై కాంగ్రెస్ నుంచి ఇంకా ఎలాంటి స్పందన లేదు. 

బీజేపీ నుంచి కాంగ్రెస్‌లో

వచ్చే అసెంబ్లీ ఎన్నికల్లో మొత్తం 224 సీట్లలో తమ పార్టీకి 140 కంటే ఎక్కువ సీట్లు వస్తాయని సర్వేలు చెబుతున్నాయని కర్ణాటక కాంగ్రెస్ రాష్ట్ర అధ్యక్షుడు డీకే శివకుమార్ పేర్కొన్నారు. ఇద్దరు మాజీ ఎమ్మెల్యేలు, మైసూర్ మాజీ మేయర్‌లను పార్టీలో చేర్చుకున్న అనంతరం ఆయన విలేకరులతో మాట్లాడారు.  బీజేపీని వీడి కాంగ్రెస్‌లో చేరిన ముగ్గురు నాయకుల్లో కొల్లేగల్ మాజీ ఎమ్మెల్యే జిఎన్ నంజుండస్వామి, బీజాపూర్ మాజీ ఎమ్మెల్యే మనోహర్ ఐనాపూర్‌తో పాటు మైసూర్ మాజీ మేయర్ పురుషోత్తం కూడా ఉన్నారు. 2022 గుజరాత్ ఎన్నికల ఫలితాల తర్వాత కర్ణాటకలో త్వరలో ఎన్నికలు నిర్వహించాలని బిజెపి భావించిందని, అయితే దాని చర్య నుండి వెనక్కి తగ్గిందని శివకుమార్ పేర్కొన్నారు.

అవినీతిలో ఇరుక్కున్న బీజేపీ ఎమ్మెల్యే

రూ.40 లక్షలు లంచం తీసుకుంటూ ఎమ్మెల్యే మాదాల్ విరూపాక్షప్ప కుమారుడు ప్రశాంత్ మాదాల్ని లోకాయుక్త అవినీతి నిరోధక శాఖ ఇటీవల అరెస్టు చేసింది. అనంతరం ఐదు రోజులుగా విరూపాక్షప్ప పరారీలో ఉన్నాడు. ప్రశాంత్ మండల్ తన కార్యాలయంలో లంచం తీసుకుంటుండగా లోకాయుక్త అధికారులు రెడ్ హ్యాండెడ్ గా పట్టుకున్నారు. అవినీతి విభాగం బీజేపీ ఎమ్మెల్యే కార్యాలయం నుంచి రూ.1.7 కోట్లు, ఆయన ఇంటి నుంచి రూ. ఎనిమిది కోట్లు స్వాధీనం చేసుకుంది. లోకాయుక్త చర్య తర్వాత, మాదాల్ విరూపాక్షప్ప కర్ణాటక సోప్ , డిటర్జెంట్ లిమిటెడ్ అధ్యక్ష పదవికి రాజీనామా చేశారు.