సిక్ లీవ్‌ పెట్టి.. పబ్ లో చిందులు.. మద్యం మత్తులో మహిళకు వేధింపులు.. ఓ పోలీసు అధికారి నిర్వాకం..

ఓ పబ్‌లో ఓ మహిళతో అసభ్యంగా ప్రవర్తించినందుకు గోవా డిప్యూటీ ఇన్‌స్పెక్టర్ జనరల్ (డీఐజీ)పై విచారణ చేపట్టారు.  

గోవా : గోవా డిప్యూటీ ఇన్‌స్పెక్టర్ జనరల్ (డిఐజి) బాగా పట్టణంలోని పబ్‌లో ఒక మహిళతో అసభ్యంగా ప్రవర్తించినట్లు వీడియోలు వెలుగు చూడడంతో.. దీనిమీద విచారణను ఎదుర్కొంటున్నారు. ఢిల్లీ పోలీసు మాజీ అధికారి ఎ కోన్‌గా గుర్తించిన డిఐజి ఈ గొడవ సమయంలో మద్యంమత్తులో ఉండటంతో గొడవకు దారి తీసింది.

రాష్ట్రంలోని బాగా పట్టణంలోని ఓ పబ్‌లో ఓ మహిళతో సోమవారం రాత్రి అసభ్యంగా ప్రవర్తించారు. దీనికి సంబంధించిన  విషయం వెలుగు చూడడంతో గోవా డిప్యూటీ ఇన్‌స్పెక్టర్ జనరల్ (డీఐజీ)పై విచారణ చేపట్టారు. ఎ కోన్‌గా గుర్తించబడిన డిఐజి ఇంతకుముందు ఢిల్లీ పోలీస్ డిపార్ట్ మెంట్ లో ముఖ్యమైన పదవులను నిర్వహించారు.

ఈ సంఘటన సోమవారం రాత్రి జరిగింది. సమాచారం ప్రకారం, సంఘటన సమయంలో కోన్ మద్యం మత్తులో ఉన్నాడు. రాష్ట్రంలోని ప్రముఖ రాజకీయ నాయకుడికి చెందినదిగా చెబుతున్న ఓ క్లబ్‌లో ఒక మహిళతో వాగ్వాదానికి దిగాడు. ఆమెతో అనుచితంగా ప్రవర్తించాడని సమాచారం. 

ఈ ఘటనకు సంబంధించిన వీడియోలు ఇప్పుడు సోషల్ మీడియాలో వైరల్‌గా మారాయి, డీఐజీ, మహిళ గొడవకు దిగారు. ఈ సమయంలో మహిళ పోలీసును చెప్పుతో కొట్టడంతో కలకలం రేగింది. ఘటన జరిగిన సమయంలో డీఐజీ మెడికల్ లీవ్‌లో ఉన్నారు. కేసు దర్యాప్తులో ఈ విషయం తేలింది.

ఈ ఘటన మీద స్పందిస్తూ ముఖ్యమంత్రి ప్రమోద్ సావంత్ అధికారిపై కఠిన చర్యలు తీసుకుంటామని హామీ ఇచ్చారు. ఈ విషయం గోవా శాసనసభలో కూడా ప్రస్తావనకు వచ్చింది. అనుచితంగా ప్రవర్తించి.. డిపార్ట్ మెంటుకు చెడ్డపేరు తెచ్చిన సదరు పోలీసు సస్పెన్షన్ చేయాలంటూ డిమాండ్లు వెల్లువెత్తాయి.