New Parliament: ఇది రాజ్యాంగ విలువలకు అవమానం.. ప్రతిపక్షాల తీరుపై ఎన్డీయే ఆగ్రహం 

New Parliament: పార్లమెంటు ప్రారంభోత్సవాన్ని బహిష్కరించాలని విపక్షాలు తీసుకున్న నిర్ణయం రాజ్యాంగ విలువలకు విఘాతం కలిగిస్తోందని ఎన్డీఏ దుయ్యబట్టింది.

New Parliament: నూతన పార్లమెంట్ భవన ప్రారంభోత్సవంపై దేశవ్యాప్తంగా చర్చ జరుగుతోంది. ఈ ప్రారంభోత్సవం ప్రధాని మోడీ చేతుల మీదుగా కాకుండా భారత రాష్ట్రపతి ద్రౌపతి ముర్ము చే చేయించాలని డిమాండ్ చేస్తున్నాయి ప్రతిపక్షలు.మే 28న జరగనున్న వేడుకను అనేక రాజకీయ పార్టీలు బహిష్కరించగా, పలువురు మద్దతు తెలుపుతూ కార్యక్రమంలో పాల్గొంటారని ప్రకటించారు.ఇదిలా ఉంటే విపక్షాల తీరును బీజేపీ నేతృత్వంలోని నేషనల్ డెమోక్రాటిక్ అలయన్స్(ఎన్డీయే) తీవ్రంగా వ్యతిరేకిస్తుంది. బహిష్కరణ పార్టీలను లక్ష్యంగా చేసుకుని ఓ ప్రకటనను కూడా విడుదల చేసింది. ఈ చర్య కేవలం అవమానకరమైనది కాదనీ, ఇది మన దేశ  ప్రజాస్వామ్య నైతికత, రాజ్యాంగ విలువలకు ఘోర అవమానమని పేర్కొంది. 

ఎన్డీయే ప్రకటనలో ఏం పేర్కొంది?

>> గత తొమ్మిదేళ్లలో పార్లమెంటు విధానాల పట్ల ప్రతిపక్షం ఏమాత్రం గౌరవం చూపలేదు. పార్లమెంట్ సమావేశాలకు అంతరాయం కలిగించారు.

>> పార్లమెంటు పట్ల ప్రతిపక్షాల కఠోరమైన అగౌరవం మేధోపరమైన దివాళాకోరుతనాన్ని ప్రతిబింబిస్తుంది. ప్రజాస్వామ్యానికి ధిక్కారంగా పేర్కొంది.  

>> రాష్ట్రపతి ఎన్నికల్లో ద్రౌపది ముర్ము పోటీ చేయడంపై ప్రతిపక్షాల ఆమెను అవమానించాయి. ఇది షెడ్యూల్డ్ కులాలు, షెడ్యూల్డ్ తెగలకు ప్రత్యక్ష అగౌరవం .

>> కొత్త పార్లమెంట్ భవన ప్రారంభోత్సవాన్ని బహిష్కరించే నిర్ణయాన్ని ప్రతిపక్ష పార్టీలు పునరాలోచించుకోవాలని ప్రకటనలో కోరింది.

ప్రహ్లాద్ జోషి ప్రకటన.. 

అంతకుముందు, కొత్త పార్లమెంట్ హౌస్ ప్రారంభోత్సవాన్ని బహిష్కరించాలని 19 ప్రతిపక్ష పార్టీలు తీసుకున్న నిర్ణయం 'దురదృష్టకరం' అని కేంద్ర పార్లమెంటరీ వ్యవహారాల మంత్రి ప్రహ్లాద్ జోషి అభివర్ణించారు. ప్రతి ఒక్కరూ తమ వైఖరిని పునరాలోచించుకోవాలని ఆయన కోరారు. గతంలో కూడా ప్రధానమంత్రులు పార్లమెంట్‌ హౌస్‌ కాంప్లెక్స్‌లో భవనాలను ప్రారంభించారని, ప్రతిపక్షాలు నోరు మెదపకపోవడం విచారకరమన్నారు.

బహిష్కరించే పార్టీలివే.. 

కాంగ్రెస్, ద్రవిడ మున్నేట్ర కజగం (DMK), జనతాదళ్ (యునైటెడ్), ఆమ్ ఆద్మీ పార్టీ (AAP), నేషనలిస్ట్ కాంగ్రెస్ పార్టీ (NCP), శివసేన (ఉద్ధవ్ బాలాసాహెబ్ థాకరే), కమ్యూనిస్ట్ పార్టీ ఆఫ్ ఇండియా-మార్క్సిస్ట్ (CPI), సమాజ్ వాదీ పార్టీ ( SP), నేషనల్ జనతాదళ్ (RJD), కమ్యూనిస్ట్ పార్టీ ఆఫ్ ఇండియా (CPI), తృణమూల్ కాంగ్రెస్ (TMC), ఆల్ ఇండియా మజ్లిస్-ఇ-ఇత్తెహాదుల్ ముస్లిమీన్ (AIMIM), ఇండియన్ యూనియన్ ముస్లిం లీగ్, జార్ఖండ్ ముక్తి మోర్చా, నేషనల్ కాన్ఫరెన్స్, కేరళ కాంగ్రెస్, రివల్యూషనరీ సోషలిస్ట్ పార్టీ, విడుతలై చిరుతైగల్ కట్చి (VCK), మరుమలార్చి ద్రవిడ మున్నేట్ర కజగం (MDMK),రాష్ట్రీయ లోక్ దళ్.

హాజరయ్యే పార్టీలు

ఈ వేడుకలో తెలుగుదేశం పార్టీ, శిరోమణి అకాలీదళ్, బిజు జనతాదళ్ , యువజన శ్రామిక్ రైతు కాంగ్రెస్ పార్టీ రాజకీయ పార్టీలు పాల్గొంటున్నాయి. దీక్షకు హాజరవుతామని ఈ పార్టీలు బుధవారం ప్రకటించాయి.

నిరసన ఎందుకు?

వాస్తవానికి మే 28న మధ్యాహ్నం 12 గంటలకు ప్రధాని మోదీ కొత్త పార్లమెంటు భవనాన్ని ప్రారంభించనున్నారు. అయితే.. కాంగ్రెస్ నాయకులు, అనేక ఇతర ప్రతిపక్ష నాయకులు ఈ నిర్ణయాన్ని వ్యతిరేకిస్తున్నాయి. ప్రధానమంత్రికి బదులుగా రాష్ట్రపతి ప్రారంభించాలని డిమాండ్ చేస్తున్నాయి. కొత్త పార్లమెంట్‌ భవనాన్ని రాష్ట్రపతి మాత్రమే ప్రారంభించాలని కాంగ్రెస్‌ చెబుతోంది. ముర్ము చేత కొత్త పార్లమెంట్ హౌస్ ప్రారంభోత్సవం ప్రజాస్వామ్య విలువలు,రాజ్యాంగ ఆకృతికి ప్రభుత్వ నిబద్ధతకు చిహ్నంగా ఉంటుంది. ఇదిలా ఉండగా, అధ్యక్షురాలు ద్రౌపది ముర్ము, ఉపాధ్యక్షుడు జగదీప్ ధన్‌ఖర్‌లు ప్రారంభోత్సవం సందర్భంగా అభినందన సందేశాలను జారీ చేసే అవకాశం ఉందని వర్గాలు తెలిపాయి.