పార్లమెంటులో కొన‌సాగుతున్న‌ గందరగోళం.. ఉభయ సభలు వాయిదా

New Delhi: పార్లమెంట్ బడ్జెట్ సమావేశాల్లో అధికార-ప్ర‌తిప‌క్షాల మ‌ధ్య మాట‌ల యుద్ధం కొన‌సాగుతోంది. ఈ క్ర‌మంలోనే మ‌రోసారి పార్లమెంట్ లో గందరగోళం కొనసాగుతుండగా, ఉభయ సభలు మధ్యాహ్నం 2 గంటల వరకు వాయిదా పడ్డాయి.  

Parliament Budget Session: రాహుల్ గాంధీ వ్యాఖ్యలతో పాటు అదానీ ఇష్యూపై నిరసనలు, నినాదాల కారణంగా ఉభయ సభలు మధ్యాహ్నం 2 గంటల వరకు వాయిదా పడ్డాయి. భారత విప్లవకారులు భగత్ సింగ్, రాజ్ గురు, సుఖ్ దేవ్ లను బ్రిటీష్ వారు ఉరితీసిన రోజును పురస్కరించుకుని అమరవీరుల దినోత్సవం (షహీద్ దివస్) సందర్భంగా ఉభయ సభలు ఒక క్షణం మౌనం పాటించాయి. అమ‌ర‌వీరుల‌కు నివాళులు అర్పించారు.

ఇదిలావుండ‌గా, నేడు లోక్ సభలో కేంద్ర బడ్జెట్ కు సంబంధించిన వివిధ అనుబంధ డిమాండ్లు సహా చర్చ, ఓటింగ్ అంశాలు చర్చకు రానున్నాయి. మరోవైపు జౌళి మంత్రిత్వ శాఖ, రైల్వే మంత్రిత్వ శాఖ సహా పలు మంత్రిత్వ శాఖల పనితీరుపై రాజ్యసభలో చర్చ జరగనుంది. దేశవ్యాప్తంగా ఉగాది, గుడి పడ్వా తదితర పండుగల కారణంగా నిన్న (బుధవారం) సభా సమావేశాలు జరగలేదు. మార్చి 21న పార్లమెంట్ బడ్జెట్ సమావేశాల రెండో దశలో జ‌మ్మూకాశ్మీర్ అప్రాప్రియేషన్ బిల్లు 2023, అప్రాప్రియేషన్ బిల్లు (నెం.2) 2023లను ఆమోదించిన లోక్ స‌భ‌ తొలి విడత శాసనసభా కార్యకలాపాలను నిర్వహించింది. అయితే రాజ్యసభ ఎలాంటి శాసనపరమైన అంశాలను చేపట్టకుండానే వాయిదా పడింది.

నిరసనలు, నినాదాలతో ఉభయ సభలు పదేపదే వాయిదా పడటంతో బడ్జెట్ సమావేశాలు ప్రారంభమైనప్పటి నుంచి పార్లమెంటు ప్రతిష్టంభనలో ఉంది. అదానీ గ్రూప్ వ్యవహారంపై సంయుక్త పార్లమెంటరీ కమిటీ విచారణ జరిపించాలని ప్రతిపక్షాలు డిమాండ్ చేస్తుండగా, ప్రజాస్వామ్యంపై రాహుల్ గాంధీ చేసిన వ్యాఖ్యలకు క్షమాపణ చెప్పాలని అధికార పార్టీ వ‌ర్గాలు డిమాండ్ చేస్తున్నాయి. కాగా, బడ్జెట్ పత్రాలను సమీక్షించడానికి విరామం తర్వాత మార్చి 13 న బడ్జెట్ సమావేశాలు తిరిగి ప్రారంభమయ్యాయి. రెండో దశ స‌మావేశాలు 2023 ఏప్రిల్ 6న ముగియనున్నాయి.