పాము నుంచి కుటుంబాన్ని కాపాడిన పిల్లులు.. మ్యావ్ అంటూ పామును వారి ముందుకు రప్పించి..!

కర్ణాటకలో పెంపుడు కవల పిల్లులు యజమాని కుటుంబాన్ని పాము బారిన పడకుండా కాపాడాయి. బయటికి వెళ్లిన యజమాని కుటుంబం ఇంటికి తిరిగి రాగానే.. అప్పటికే ఇంటిలోకి వచ్చి కిచెన్‌లో దాక్కున్న పాము గురించి అలర్ట్ చేశాయి.  

బెంగళూరు: కర్ణాటకలో రెండు పెంపుడు పిల్లలు ఆ కుటుంబ సభ్యులను కాపాడాయి. ఇంట్లోకి పాము దూరి కిచెన్‌లోకి వెళ్లడాన్ని ఆ పిల్లలు గమనించాయి. ఆ తర్వాత కాసేపటికి ఇంటికి యజమాని సహా ఇతర కుటుంబ సభ్యులు వచ్చారు. వారు రాగానే ఆ పిల్లలు మ్యావ్.. మ్యావ్ అంటూ వారిని అలర్ట్ చేసే ప్రయత్నం చేశాయి. కానీ, తొలుత ఆ పిల్లులు ఏం సమాచారం చేరవేసే ప్రయత్నం చేస్తున్నాయో యజమానికి అర్థం కాలేదు. కానీ, కిచెన్‌లోకి వెళ్లిన తర్వాత ఆ పిల్లులు పామును బయటకు రప్పించడంతో విషయం అర్థమైంది. ఈ ఘటన కర్ణాటకలోని గడగ్ జిల్లా నార్గుండ్‌లో బుధవారం చోటుచేసుకుంది.

నార్గుండ్‌లో అంబేద్కర్ నగర్‌లో లక్ష్మణ్ చలవాడి కుటుంబం నివసిస్తున్నది. ఆరు బుధవారం ఓ కార్యక్రమం కోసం బయటకు వెళ్లారు. ఇంట్లో ఈ రెండు కవల పిల్లులే ఉన్నాయి. లక్ష్మణ్ కుటుంబం బయటకు వెళ్లిన తర్వాత ఓ పాము ఇంటిలోకి చొరబడింది. అది మెల్లగా కిచెన్‌లోకి వెళ్లి దాక్కుంది.

కొంత సేపటికి లక్ష్మణ్ కుటుంబం తిరిగి ఇంటికి వచ్చింది. ఇంటి తలుపులు తీయగానే రెండు పిల్లులు అలర్ట్ చేశాయి. అవి ఎందుకు అరుస్తున్నాయో వారికి అర్థం కాలేదు. ఆ తర్వాత కొద్దిసేపటికి వారు కిచెన్‌లోకి వెళ్లారు. అప్పుడు పిల్లులు వారి కంటే ముందు కిచెన్‌లోకి పరుగెత్తి మ్యావ్.. మ్యావ్ అంటూ గట్టిగా అరిచాయి. దీంతో ఆ పాము భయంతో బయటకు వచ్చింది. ఎదురుగా ఆ కుటుంబమంతా ఉన్నది. ఆ పామును చూసిన లక్ష్మణ్ కుటుంబానికి ఆ పెంపుడు పిల్లులు ఎందుకు అరుస్తున్నాయో అర్థం అయింది.

వారు వెంటనే పామును రెస్క్యూ చేసే వారికి కాల్ చేశారు. వెంటనే స్నేక్ క్యాచర్ బీఆర్ సురేబాన్ అక్కడికి వచ్చారు. ఆ పామును అక్కడి నుంచి కాపాడి తీసుకెళ్లి అటవీ ప్రాంతంలో వదిలిపెట్టారు.

ఈ రెండు పిల్లులు తమ ప్రాణాలను కాపాడాయని లక్ష్మణ్ సగర్వంగా చెప్పాడు.