Indian Navy: గంట‌కు 3457 కి.మీలు దూసుకెళ్లే క్షిప‌ణి.. ఇండియ‌న్ నేవీకి శ‌క్తివంత‌మైన అస్త్రం

భారత నౌకాదళం బ్రహ్మోస్ సూపర్‌సోనిక్ క్రూయిజ్ క్షిపణిని విజయవంతంగా పరీక్షించింది. ఈ క్షిపణి శత్రువులను క్షణాల్లో ధ్వంసం చేసే సామర్థ్యాన్ని కలిగి ఉంది, దీనివల్ల పాకిస్తాన్ వంటి శత్రు దేశాలు ఆందోళన చెందుతున్నాయి.

పెహల్గాం ఉగ్రవాద దాడి తర్వాత భారత్, పాకిస్తాన్ మధ్య ఉద్రిక్తత నెలకొంది. ఈ నేపథ్యంలో భారత నౌకాదళం తన బలాన్ని ప్రదర్శించింది. పాకిస్తాన్, దాని నౌకాదళం భారతదేశం  బ్రహ్మోస్ సూపర్‌సోనిక్ క్రూయిజ్ క్షిపణిని చూసి వెన్నులో వణుకు పుట్టడం ఖాయం. ఈ  క్షిపణి అత్యంత శక్తివంతమైంది. క్షణాల్లో విధ్వంసం సృష్టిస్తుంది.

భారత నౌకాదళ యుద్ధనౌకలు సుదూర లక్ష్యాలను ఖచ్చితంగా ఛేదించే సామర్థ్యాన్ని ప్రదర్శించడానికి యాంటీ-షిప్ ఫైరింగ్‌ను విజయవంతంగా నిర్వహించాయి. ఈ సందర్భంగా యుద్ధనౌక నుంచి బ్రహ్మోస్ క్షిపణులను కూడా ప్రయోగించారు. బ్రహ్మోస్ క్షిపణిని భారత్, రష్యా సంయుక్తంగా అభివృద్ధి చేశాయి. భారత నౌకాదళ యుద్ధనౌకలు, జలాంతర్గాములను ఈ క్షిపణితో సన్నద్ధం చేశారు. ఈ క్షిపణికి అనేక వెర్షన్లు ఉన్నాయి. దీన్ని భూమి, యుద్ధనౌక, యుద్ధ విమానం, జలాంతర్గామి నుంచి ప్రయోగించవచ్చు.

శత్రువులకు తేరుకునే అవకాశం ఇవ్వదు బ్రహ్మోస్

బ్రహ్మోస్ ప్రపంచంలోనే అత్యంత ప్రమాదకరమైన క్రూయిజ్ క్షిపణి. ప్రారంభంలో దీని పరిధి 300 కి.మీ. దీన్ని 500 కి.మీ.కి పెంచారు. దీని వేగం 2.8 మాక్ (3457.44 కి.మీ./గం). ఇంత వేగం, క్రూయిజ్ క్షిపణి కావడంతో బ్రహ్మోస్‌ను అడ్డుకోవడం చాలా కష్టం. ప్రయోగించిన కొన్ని సెకన్లలోనే లక్ష్యాన్ని ధ్వంసం చేస్తుంది. దీంతో శత్రువులకు తేరుకునే సమయం ఉండదు.

భారత నౌకాదళ అధికారి మాట్లాడుతూ, "భారత నౌకాదళ నౌకలు సుదూర లక్ష్యాలను ఖచ్చితంగా ఛేదించేందుకు వేదికలు, వ్యవస్థలు, సిబ్బంది సంసిద్ధతను తిరిగి ధృవీకరించడానికి, ప్రదర్శించడానికి అనేక యాంటీ-షిప్ ఫైరింగ్‌లను విజయవంతంగా నిర్వహించాయి. దేశ సముద్ర ప్రయోజనాలను కాపాడటానికి నౌకాదళం ఎప్పుడైనా, ఎక్కడైనా, ఏ విధంగానైనా యుద్ధానికి సిద్ధంగా ఉంది" అని అన్నారు.