ఎవరెస్టు బేస్ క్యాంపు వద్ద భారత పర్వతారోహకురాలు మృతి.. రికార్డు సృష్టించాలనే లక్ష్యంతో వెళ్లినా.. అస్వస్థతతో

ఎవరెస్టు శిఖరాన్ని అధిరోహించి రికార్డు నెలకొల్పానే లక్ష్యంతో ఉన్న 59 ఏళ్ల భారత పర్వతారోహకురాలు సుజానే లియోపోల్డినా జీసస్ మరణించారు. బేస్ క్యాంప్ వద్ద తీవ్ర అస్వస్థతకు గురైన ఆమె చికిత్స పొందుతూ చనిపోయారు. 

ఎవరెస్ట్ శిఖరాన్ని అధిరోహించిన ఆసియాలోనే తొలి మహిళగా రికార్డు సృష్టించాలనే లక్ష్యంతో ఉన్న 59 ఏళ్ల భారత పర్వతారోహకురాలు సుజానే లియోపోల్డినా జీసస్ అస్వస్థతకు గురై గురువారం కన్నుమూశారు. ఆ శిఖరం బేస్ క్యాంప్ వద్ద ఆమె కన్నుమూశారు. మౌంట్ ఎవరెస్ట్ బేస్ క్యాంపులో విన్యాసాల సమయంలో సుజానే లియోపోల్డినా జీసస్ ఇబ్బందులు ఎదుర్కొన్నారని, తరువాత ఆమె సోలుఖుంబు జిల్లాలోని లుక్లా పట్టణంలోని హాస్పిటల్ లో చేరారని, పరిస్థితి విషమించి గురువారం మరణించారని నేపాల్ పర్యాటక శాఖ డైరెక్టర్ యువరాజ్ ఖతివాడ తెలిపారు.

పేస్ మేకర్ అమర్చిన సుజానే బేస్ క్యాంపులో విన్యాసాల సమయంలో సాధారణ వేగాన్ని కొనసాగించడంలో విఫలమై, అధిరోహించడానికి ఇబ్బంది పడటంతో ఎవరెస్ట్ శిఖరాన్ని అధిరోహించే ప్రయత్నాన్ని విరమించుకోవాలని తాము కోరినట్లు ఖతివాడ తెలిపారు. కానీ 8,848.86 మీటర్ల ఎత్తైన శిఖరాన్ని అధిరోహించాల్సి ఉందని, దీని అనుమతి కోసం ఇప్పటికే ఫీజు చెల్లించానని ఆ ప్రతిపాదనను సుజానే మొండిగా తిరస్కరించిందని చెప్పారు.

మౌంట్ ఎవరెస్ట్ బేస్ క్యాంప్ నుంచి 5,800 మీటర్ల ఎత్తుకు ఎక్కిన సుజానేను బుధవారం సాయంత్రం బలవంతంగా లుక్లా పట్టణానికి తరలించి చికిత్స కోసం ఆసుపత్రిలో చేర్పించినట్లు యాత్ర నిర్వాహకుడు గ్లేసియర్ హిమాలయన్ ట్రెక్ చైర్మన్ డెండి షెర్పా తెలిపారు. ఆమెను బలవంతంగా లుక్లాకు తీసుకెళ్లాల్సి వచ్చిందని, ఆమెను తరలించేందుకు హెలికాప్టర్ ను అద్దెకు తీసుకున్నామని చెప్పారు.

ఐదు రోజుల క్రితమే పర్వతారోహణను విరమించుకోవాలని ఆమెకు చెప్పామని, అయితే ఆమె ఎవరెస్టు శిఖరాన్ని అధిరోహించాలని గట్టిగా నిర్ణయించుకుందని, కానీ పర్వతాన్ని అధిరోహించే అర్హత సుజానేకు లేదని శిక్షణ సమయంలో తేలిందని ఆయన చెప్పారు. కేవలం 250 మీటర్ల పొడవున్న బేస్ క్యాంపునకు ఎగువన ఉన్న క్రాంప్టన్ పాయింట్ చేరుకోవడానికి 5 గంటలకు పైగా సమయం పట్టిందని, కాబట్టి ఎవరెస్ట్ శిఖరాన్ని అధిరోహించే స్థితిలో సుజానే లేరని పేర్కొంటూ షెర్పా పర్యాటక శాఖకు లేఖ రాశారు.

పర్వతారోహకులు సాధారణంగా 15 నుండి 20 నిమిషాల్లో ఈ దూరాన్ని దాటుతారని, కానీ సుజానే మొదటి ప్రయత్నంలో ఐదు గంటలు, రెండో ప్రయత్నంలో ఆరు గంటలు, మూడవ ప్రయత్నంలో 12 గంటలు తీసుకుందని షెర్పా పేర్కొన్నారు. కానీ పేస్ మేకర్ తో ఎవరెస్ట్ శిఖరాన్ని అధిరోహించిన తొలి ఆసియా మహిళగా రికార్డు సృష్టించాలని ఆమె భావించిందని, గొంతు నొప్పితో ఇబ్బందులు ఎదుర్కొంటోందని, ఆహారం కూడా మింగలేకపోతోందని ఆయన తెలిపారు.

కాగా.. సుజానే మృతదేహాన్ని గురువారం మధ్యాహ్నం ఖాట్మండుకు తరలించి పోస్టుమార్టం నిమిత్తం మహారాజ్ గంజ్ మున్సిపాలిటీలోని త్రిభువన్ యూనివర్సిటీ టీచింగ్ ఆసుపత్రికి తరలించినట్లు షెర్పా తెలిపారు. ఆమె మరణ వార్త కుటుంబ సభ్యులకు సమాచారం అందించారు. వారు శుక్రవారం సాయంత్రానికి ఖాట్మండుకు చేరుకోనున్నారు. ఇదిలా ఉండగా.. గురువారం ఉదయం ఎవరెస్టు శిఖరాన్ని అధిరోహించే క్రమంలో చైనా పర్వతారోహకుడు కూడా మరణించాడు. దీంతో ఈ సీజన్ లో ఎవరెస్టుపై మరణించిన వారి సంఖ్య ఎనిమిదికి చేరింది. అంతకు ముందు ఎవరెస్టుపై నలుగురు షెర్పా పర్వతారోహకులు, ఒక అమెరికన్ వైద్యుడు, ఒక మోల్డోవా పర్వతారోహకుడు చనిపోయారు.