మ‌రో 5 రోజులు ఈ ప్రాంతాల్లో భారీ నుంచి అతి భారీ వ‌ర్షాలు.. ఐఎండీ హెచ్చ‌రిక‌లు

New Delhi: నైరుతి రుతుపవనాల మరో క్రియాశీల దశకు చేరుకున్నాయ‌నీ, ఈ వారంలో మోస్తారు నుంచి భారీ వ‌ర్షాలు కురుస్తాయ‌ని భారత వాతావరణ శాఖ (ఐఎండీ) పలు రాష్ట్రాలకు వర్షపాతం హెచ్చరికలు జారీ చేసింది. ఐఎండీ ఒక ప్ర‌క‌ట‌న‌లో "నైరుతి రుతుపవనాల క్రియాశీల దశ ఈ వారంలో ప్రారంభమవుతుంది. ఉత్తర ఒడిశా, దానిని ఆనుకుని ఉన్న గంగానది పశ్చిమ బెంగాల్, జార్ఖండ్ లలో ఏర్పడిన అల్పపీడనం రానున్న ఐదు రోజుల్లో మధ్య, దానిని ఆనుకుని ఉన్న తూర్పు భారతంలో భారీ, విస్తారంగా వర్షాలు కురిసే అవకాశం ఉందని" తెలిపింది.  

IMD issues ‘heavy’ rainfall alert: నైరుతి రుతుపవనాల మరో క్రియాశీల దశ ఈ వారంలో ప్రారంభమవుతుందని భారత వాతావరణ శాఖ తెలిపింది. హిమాచల్ ప్రదేశ్, ఉత్తరాఖండ్, జార్ఖండ్ సహా పలు రాష్ట్రాల్లో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. రుతుపవనాల ప్ర‌భావంతో కొన్ని రాష్ట్రాల్లో భారీ వ‌ర్షాలు, వరదలు, కొండచరియలు విరిగిపడినప్పటికీ, గత పక్షం రోజులుగా భారతదేశంలోని ఇతర ప్రాంతాల్లో వర్షపాతం లోటు కనిపించింది. అయితే, ప్ర‌స్తుతం అల్పపీడనం ఏర్పడిందనీ, మంగళవారం మరో తుఫాను ఏర్పడుతుందని ఐఎండీ వ‌ర్గాలు తెలిపాయి. ఫలితంగా మధ్య, ద్వీపకల్ప ప్రాంతంలో మంచి వర్షపాతం నమోదయ్యే అవకాశం ఉందని వాతావరణ శాఖ డైరెక్టర్ జనరల్ ఎం మహాపాత్ర తెలిపారు. పశ్చిమ రుతుపవనాల ప్ర‌భావంతో ఉత్తర భారతంలో కూడా వ‌ర్షాలు కురుస్తాయని తెలిపారు.

ఈ వారం రాష్ట్రాలకు వాతావరణ హెచ్చరికలు ఇలా ఉన్నాయి..

ఉత్తర ఒడిశా, దానిని ఆనుకుని ఉన్న పశ్చిమ బెంగాల్, జార్ఖండ్ ప్రాంతాల్లో అల్పపీడనం ఏర్పడింది. దీంతో రానున్న ఐదు రోజుల పాటు ఈ ప్రాంతాల్లో విస్తారంగా వర్షాలు కురిసే అవకాశం ఉంది. ఒడిశాలోని వివిధ జిల్లాల్లో 24 గంటల పాటు భారీ వర్షాలు కురుస్తాయని వాతావరణ శాఖ తెలిపింది. వీటిలో సుందర్ గఢ్, కియోంఝర్, ఝార్సుగుడా, సంబల్ పూర్, నువాపాడా, కంధమాల్, బోలంగీర్, సోనేపూర్, దేవ్ గఢ్, నబరంగాపూర్, కోరాపుట్, మల్కన్ గిరి, కలహండి, బార్ గఢ్ జిల్లాలు ఉన్నాయి. బాలాసోర్, భద్రక్, జాజ్పూర్, కేంద్రపారా, కటక్, కలహండి, కంధమాల్, నబరంగాపు, జగత్సింగ్పూర్, ఖోర్ధా, పూరీ, గంజాం, గజపతి, రాయగడ, కోరాపుట్, మల్కన్గిరి, నువాపడ జిల్లాల్లో మంగళవారం భారీ వర్షాలు కురిసే అవకాశం ఉంది.

రుతుపవనాల తాకిడితో తీవ్రంగా దెబ్బతిన్న హిమాచల్ ప్రదేశ్ కు ఇప్పట్లో ఉపశమనం లభించే అవ‌కాశం క‌నిపించ‌డం లేదు. రాగల ఐదు రోజుల పాటు రాష్ట్రంలో భారీ వర్షాలు కురుస్తాయని ఐఎండీ తెలిపింది. ఉత్తరాఖండ్, ఉత్తరప్రదేశ్, తూర్పు రాజస్థాన్ ల‌లో కూడా రానున్న మూడు రోజుల పాటు ఇదే తరహా వాతావరణ పరిస్థితులు ఉంటాయి. అలాగే, రాగల కొన్ని గంటల్లో హర్యానా-చండీగఢ్ లో భారీ వర్షాలు కురిసే అవకాశం ఉంది. ఇదిలా ఉండగా, కొన్ని ప్రాంతాల్లో వరద పరిస్థితిని ఎదుర్కొంటున్న ఢిల్లీలో సోమ‌వారం తేలికపాటి వర్షం, ఉరుములతో కూడిన వాన‌లు లేదా ఆకాశం సాధారణంగా మేఘావృతమై ఉంటుందని ఐఎండీ తెలిపింది.

అలాగే, బీహార్, పశ్చిమబెంగాల్, సిక్కింలో భారీ వర్షాలు కురుస్తాయని తెలిపింది. మధ్యప్రదేశ్, విదర్భ స‌హా ఛ‌త్తీస్ గ‌ఢ్ లో జూలై 17, 18 తేదీల్లో భారీ నుంచి అతి భారీ వర్షాలు కురుస్తాయని ఐఎండీ అంచనా వేసింది. జూలై 18 నుండి 21 వరకు కొంకణ్, గోవాలలో ప‌లు ప్రాంతాల్లో భారీ నుండి అతి భారీ వర్షాలు కురిసే అవకాశం ఉందని ఐఎండీ తెలిపింది. ఇదిలా ఉండగా, గుజరాత్, మధ్య మహారాష్ట్రలో కూడా జూలై 21 వరకు ప‌లు ప్రాంతాల్లో భారీ వర్షాలు కురుస్తాయని పేర్కొంది. అలాగే, తీవ్ర వరదలను ఎదుర్కొంటున్న అస్సాంలో సోమ‌వారం కూడా భారీ వర్షాలు కురుస్తాయి. మేఘాలయ, త్రిపురలలో కూడా ఇలాంటి వాతావరణ పరిస్థితులు ఉంటాయి.

దక్షిణ భారతదేశానికి సంబంధించి జులై 21 వరకు కోస్తా కర్నాటకలో తేలికపాటి నుండి మోస్తరుగా చెల్లాచెదురుగా విస్తారంగా వర్షాలు కురిసే అవకాశం ఉందని వాతావరణ కేంద్రం తెలిపింది. తెలంగాణలో కూడా జూలై 20 వరకు విస్తారంగా వర్షాలు కురుస్తాయి. జూలై 18-20 వరకు ఆంధ్రప్రదేశ్, కేరళలో కూడా వర్షాలు కురుస్తాయ‌ని వాతావ‌ర‌ణ శాఖ తెలిపింది.