Heavy Rain: ఒడిశాలో వరద పరిస్థితి భయంకరంగా ఉంది. దాదాపు 1.5 లక్షలకు పైగా ప్రజలు ముంపు ప్రాంతాల్లో చిక్కుకున్నారు. ఈ సీజన్‌లోని మొదటి వరద 10 జిల్లాల్లో రెండు లక్షల మందికి పైగా ప్ర‌భావితం చేసింది.
Odisha Floods: రుతుప‌వ‌నాల ప్ర‌భావంతో గత కొంతకాలంగా ఒడిశా, పశ్చిమ బెంగాల్‌లో భారీ వర్షాలు కురుస్తున్నాయి. కుండపోతగా కురుస్తున్న వర్షాల కారణంగా ఒడిశాలోని మహానదికి వరద పోటెత్తింది. మంగళవారం నాటికి పరిస్థితి భయంకరంగా ఉంది. 10 జిల్లాల్లో 2 లక్షల మందికి పైగా ప్రజలు విపత్తు బారిన పడ్డారు. ఇప్ప‌టికే పెద్ద సంఖ్య‌లో ప్రజలను అధికారులు సుర‌క్షిత ప్రాంతాల‌కు త‌ర‌లించారు. సుందర్‌బన్స్‌లోని గోసాబా, కక్‌ద్వీప్ ప్రాంతాలతో సహా గత కొన్ని రోజులుగా వివిధ ఉత్తర, దక్షిణ బెంగాల్ జిల్లాల్లో కూడా భారీ వర్షాలు కురిశాయి. దీంతో నది కట్టలు తెగిపోవడంతో పలు గ్రామాల్లోకి నీరు చేరింది.
ఒడిశాలోని మహానది నదీ వ్యవస్థలో వరద పరిస్థితి భయంకరంగా ఉందని, 237 గ్రామాలలో సుమారు 1.5 లక్షల మంది ప్రజలు చిక్కుకుపోయారని సీనియర్ అధికారి బుధవారం తెలిపారు. ఈ సీజన్‌లో వచ్చిన మొదటి వరద 10 జిల్లాల్లో రెండు లక్షల మందికి పైగా ప్రభావితమయ్యార‌ని తెలిపారు. "ఇప్పటివరకు 27,000 మందికి పైగా ప్రజలను ఖాళీ చేసి తాత్కాలిక ఆశ్రయాలకు తరలించామని ఆయన చెప్పారు. హిరాకుడ్ డ్యామ్‌లో నీటిమట్టం 626.47 అడుగులకు చేరుకుంది. పూర్తిస్థాయి రిజర్వాయర్‌ మట్టం 630 అడుగులకుగాను 630 అడుగుల నీటిమట్టం ఉంది. కటక్‌ సమీపంలోని ముండలి బ్యారేజీ వద్ద రీడింగ్‌ మంగళవారం నాటికి 12 లక్షల క్యూసెక్కులకుగాను 11,77,024 క్యూసెక్కులకు తగ్గింది. ఈ నీటిమట్టం మరో 24 గంట‌ల వరకు కొనసాగుతుందని భావిస్తున్నాం" అని జలవనరుల శాఖ ఇంజనీర్ ఇన్ చీఫ్ బీకే మిశ్రా చెప్పార‌ని ఎన్డీటీవీ నివేదించింది. ముండలి బ్యారేజీకి సమీపంలోని మహానది రివ‌ర్ ఉప్పొంగుతూనే ఉందని, పూరీ, జగత్‌సింగ్‌పూర్, కేంద్రపరా, ఖుర్దా జిల్లాలతో కూడిన డెల్టా ప్రాంతంలో పరిస్థితి మరింత అధ్వాన్నంగా ఉంటుందని ఆయన అన్నారు.
రిజర్వాయర్‌లోకి 6.24 లక్షల క్యూసెక్కులకు పైగా వరద నీరు వచ్చి చేరుతుండగా, హిరాకుడ్ డ్యాం వద్ద 40 గేట్ల ద్వారా 6.81 లక్షల క్యూసెక్కులను వదులుతున్నట్లు తెలిపారు. మహానది పరీవాహక ప్రాంతంలోని 10 జిల్లాల్లోని 1,366 గ్రామాలు, తొమ్మిది పట్టణ స్థానిక సంస్థలలో 2 లక్షల మంది ప్రజలు ఇప్పటివరకు వారం రోజుల పాటు అల్పపీడనం-ప్రేరిత వర్షాల కారణంగా సంభవించిన వరదలతో ప్రభావితమయ్యారు. మంగళవారం అర్ధరాత్రి దాటిన తర్వాత మహానది డెల్టా ప్రాంతంలో వరద నీటి ప్రవాహం గరిష్ట స్థాయికి చేరుకుందని స్పెషల్ రిలీఫ్ కమిషనర్ (ఎస్‌ఆర్‌సి) పీకే.జెనా తెలిపారు. ఇదిలావుండగా, శుక్రవారం నాటికి ఉత్తర బంగాళాఖాతంలో తాజా అల్పపీడనం ఏర్పడుతుందని, దీనివల్ల రాష్ట్రంలో విస్తారంగా.. మోస్తారు నుంచి భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. ఉత్తర కోస్తా ఒడిశాలోని 10 జిల్లాల్లో బుధవారం భారీ వర్షాలు కురుస్తాయని వాతావరణ శాఖ ‘ఎల్లో వార్నింగ్’ జారీ చేసింది.
భారత వాతావరణ శాఖ (IMD) ప్రకారం.. రాబోయే ఐదు రోజుల పాటు తూర్పు రాష్ట్రాలైన ఒడిశా, జార్ఖండ్, బీహార్, పశ్చిమ బెంగాల్, సిక్కింలలో మోస్తారు నుంచి భారీ వర్షాలు కురుస్తాయి. గంగా నది పశ్చిమ బెంగాల్, ఒడిశా, జార్ఖండ్‌లలో గురువారం నుండి ఆదివారం వరకు (ఆగస్టు 18-21) వరకు తేలికపాటి లేదా మోస్తరు వర్షపాతం చాలా విస్తృతంగా ఉంటుంది. శుక్రవారం నుంచి ఆదివారం (ఆగస్టు 19-21) మధ్య ఒడిశాలో భారీ నుండి అతి భారీ వర్షాలు (115.5 మిమీ-204 మిమీ) కురుస్తాయని ఐఎండీ అంచనా వేసింది. శుక్రవారం నుండి ఆదివారం వరకు (ఆగస్టు 19-21) పశ్చిమ బెంగాల్‌లో, బీహార్‌లో శని, ఆదివారాల్లో (ఆగస్టు 20-21) వివిక్త భారీ వర్షాలు (64.5 మిమీ-115.5 మిమీ) కురుస్తాయని భారత వాతారణ శాఖ అంచనా వేసింది.