Rahul Gandhi: ఒక వైపు పార్లమెంటు సమావేశాలు.. మరో వైపు విదేశాలకు రాహుల్ గాంధీ?

రాహుల్ గాంధీ వచ్చే నెల 9వ తేదీన విదేశీ పర్యటనకు వెళ్లబోతున్నట్టు తెలుస్తున్నది. ఇండోనేషియా, సింగపూర్, మలేషియా, వియత్నాం దేశాల్లో పర్యటించనున్నట్టు సమాచారం. మరో వైపు ఈ నెల 4వ తేదీ నుంచి 22వ తేదీ వరకు పార్లమెంటు శీతాకాల సమావేశాలు జరుగుతున్నాయి.  

న్యూఢిల్లీ: ఐదు రాష్ట్రాల ప్రచారాలు ముగిశాయి. నేటితో చిట్టచివరి తెలంగాణ అసెంబ్లీ ఎన్నికల ప్రచారానికీ తెరపడింది. దీంతో జాతీయ పార్టీలు త్వరలో జరగనున్న పార్లమెంటు సమావేశాలపైకి దృష్టి సారిస్తున్నాయి. ఈ తరుణంలో కాంగ్రెస్ అగ్రనేత రాహుల్ గాంధీ విదేశాలకు వెళ్లుతున్నట్టు సమాచారం అందింది.

డిసెంబర్ 4వ తేదీ నుంచి 22వ తేదీ వరకు పార్లమెంటు శీతాకాల సమావేశాలు జరగనున్నాయి. ఈ సమావేశాల్లో కీలకమైన బిల్లులు ప్రవేశపెట్టే అవకాశాలు ఉన్నాయి. ఎన్నికల కమిషనర్ నియామకం వంటి ముఖ్యమైన బిల్లులపై చర్చ జరిగే అవకాశం ఉన్నది. ఈ నేపథ్యంలో డిసెంబర్ 9వ తేదీన రాహుల్ గాంధీ విదేశీ పర్యటనకు వెళ్లబోతున్నట్టు రాజకీయ వర్గాల నుంచి సమాచారం అందింది. ఆయన 9వ తేదీ నుంచి ఇండోనేషియా, సింగపూర్, మలేషియా, వియత్నాం దేశాల్లో పర్యటించబోతున్నట్టు కాంగ్రెస్ పార్టీ వర్గాలు వివరించాయి.

సింగపూర్, మలేషియాల్లో ఎన్ఆర్ఐలను, దౌత్యవేత్తలను రాహుల్ గాంధీ కలుసుకుంటారని తెలిపాయి. అలాగే, వియత్నాంలో కమ్యూనిస్టు నాయకులతోనూ సమావేశం అవుతారని తెలిసింది.