ఒడిశాలో ఘోర ప్రమాదం: ఏడుగురు మృతి, 40 మందికి గాయాలు

ఒడిశా రాష్ట్రంలో ఓ బస్సు లోయలో పడింది.ఈ ఘటనలో ఏడుగురు అక్కడికక్కడే మృతి చెందారు. పలువురు తీవ్రంగా గాయపడ్డారు. 

భువనేశ్వర్:ఒడిశా రాష్ట్రంలోని గంజాం జిల్లాలో బుధవారం నాడు జరిగిన రోడ్డు ప్రమాదంలో ఏడుగురు మృతి చెందారు. మరో 40 మంది తీవ్రంగా గాయపడ్డారు.

ఒడిశా రాష్ట్రంలోని తప్తాని ఘాట్ జిల్లాలోని పాలుకోలా వద్ద బ్రిడ్జి నుండి లోయలో ఓ బస్సు పడింది. ఈ ప్రమాదంలో ఏడుగురు అక్కడికక్కడే మృతి చెందారు. గాయపడినవారిని దిగంపహడి, బెర్హంపురి ఆసుపత్రులకు తరలించారు. 

పాటపూర్ పోలీసులు, సహాయక బృందాలు ఘటన స్థలంలో సహాయక చర్యలు చేపట్టారు.టికిరి నుండి బస్సు బెర్హంపుర్ కు వెళ్తున్న సమయంలో ఈ ప్రమాదం చోటు చేసుకొంది. ఈ ప్రమాదంలో మృతి చెందిన వారిలో ఎక్కువగా మహిళలు, చిన్నపిల్లలు ఉన్నారని స్థానికులు చెప్పారు.

ఈ ప్రమాదం బుధవారం నాడు తెల్లవారుజాము మూడు గంటలకు జరిగిందని స్థానికులు చెప్పారు. ప్రమాదం జరిగిన ప్రదేశం అటవీ ప్రాంతంలో ఉంది. ఈ ప్రాంతం చుట్టూ నీరు ఉన్నందున సహాయక చర్యలు చేపట్టేందుకు ఇబ్బందులు ఏర్పడుతున్నట్టుగా అధికారులు చెప్పారు.

లోయలో బస్సుపడినందు ప్రమాద తీవ్రత ఎక్కువగా ఉందని అధికారులు ప్రకటించారు. ఈ ప్రమాదంలో మృతుల సంఖ్య మరింత పెరిగే అవకాశం ఉందని అధికారులు అభిప్రాయపడుతున్నారు.

నాలుగు అగ్నిమాపక సిబ్బంది సమీప ప్రాంతాల నుండి ఘటన స్థలానికి చేరుకొని సహాయక చర్యలను చేపట్టారు. డిప్యూటీ ఫైర్ ఆఫీసర్ సహాయక చర్యలను పర్యవేక్షిస్తున్నారు.