కేరళలో దారుణం.. సొంత కుమారుడు సహా అతని కుంటుంబాన్ని చంపిన తండ్రి.. ఎందుకంటే..?
సారాంశం
Kerala: కేరళలో దారుణ ఘటన చోటుచేసుకుంది. ఆస్తి తగాదాల కారణంగా సొంత కుమారుడు సహా అతని కుటుంబాన్ని చంపాడు ఓ వ్యక్తి. కేరళలోని ఇడుక్కి జిల్లాలో ఈ ఘటన చోటుచేసుకుంది.
Kerala: ఆస్తి తగాదాల కారణంగా సొంత కుమారుడు సహా అతని కుటుంబాన్ని చంపాడు ఓ వ్యక్తి. కేరళలోని ఇడుక్కి జిల్లాలో ఈ ఘటన చోటుచేసుకుంది. కుమారుడు, అతని భార్య, ఇద్దరు పిల్లలు ఇంట్లో నిద్రిస్తున్న సమయంలో ఇంటికి నిప్పుపెట్టడంతో నలుగురు సజీవదహనమయ్యారు. ఈ ఘటన స్థానికంగా సంచలనంగా మారింది.
పోలీసులు తెలిపిన వివరాల ప్రకారం.. ఇడుక్కి జిల్లాలోని చీనికుజీలో నివాసముంటున్న హామీద్.. తన కొడుకు, కోడలు, ఇద్దరు మనవరాళ్లు నిద్రిస్తుండగా బెడ్రూమ్కు నిప్పంటించాడు. మంటల నుంచి వారు తప్పించుకోకుండా ముందుగా ఇంటికి సరఫరా అయ్యే నీటి సరఫరాను ఆపివేశాడు. అలాగే, వారున్న గదిలోకి పెట్రోల్ తో నిండిన బాటిళ్లను విసిరాడు. బాధితులు బాత్రూమ్లోకి పరుగులు తీశారు, కానీ ప్రాణాలతో బయటపడలేదు. ఇక బంధువుల ఇంటి నుంచి వస్తుండగా హమీద్ను పోలీసులు అదుపులోకి తీసుకున్నారు.
ఆస్తి తగాదాపై తన కొడుకు నలుగురు సభ్యుల కుటుంబాన్ని హత్య చేసేందుకు హమీద్ తన ఇంటికి నిప్పంటించి, బయటి నుంచి తలుపులు వేసి తాళం వేశాడని స్థానికులు పేర్కొన్నారు. అర్ధరాత్రి 12.45 గంటల సమయంలో హమీద్ పడకగదిని తగలబెట్టడంతో శిబు అలియాస్ మహ్మద్ షఫీ (50), అతని భార్య షీబా, 43, వారి పిల్లలు మెహ్రూ (16), అఫ్నా (13) చనిపోయారు. ఘటన జరిగిన వెంటనే పోలీసులు హమీద్ను అరెస్టు చేసి వాంగ్మూలం నమోదు చేశారు .
రెండో భార్యతో గొడవలు రావడంతో హమీద్ తన చిన్న కుమారుడు శిబుతో కలిసి కొంతకాలంగా ఇంట్లో నివసిస్తున్నాడు. మొదటి వివాహం నుండి అతని ఇద్దరు పిల్లలలో చిన్నవాడు. శిబు హమీద్ అతనికి ఇచ్చిన ఆస్తిలో ఉంటున్నాడు. ఈ ఆస్తికి సంబంధించిన వివాదమే హత్యకు దారి తీసిందని పోలీసులు తెలిపారు.
పోలీసులు సంఘటనా స్థలానికి చేరుకుని అర్ధరాత్రి ఒంటిగంటకు మంటలను ఆర్పినట్లు కరిమన్నోర్ ఎస్ఐ కెహెచ్ హషీం తెలిపారు. “నలుగురి మృతదేహాలను బాత్రూమ్లోంచి వెలికి తీశారు. బెడ్రూమ్లో మంటలు చెలరేగడంతో వారు బాత్రూమ్లో నీటిని తీసేందుకు ప్రయత్నించారని మేము భావిస్తున్నాము. అయితే, హమీద్ గదిని కాల్చే ముందు నీటి సరఫరాను డిస్కనెక్ట్ చేసాడు. పోస్ట్మార్టం నివేదిక వచ్చిన తర్వాత పూర్తి వివరాలు వెల్లడిస్తామని తెలిపారు.
నిందితుడు హమీద్ ముందస్తుగా పెట్రోల్ నిల్వ చేసుకోవడంతో పాటు ఇంటీ నీటి సరఫరాను కట్ చేయడం, అర్థరాత్రి వరకు వేచివుండి.. వారు పడుకున్న తర్వాత ఈ దారుణానికి పాల్పడటం చూస్తే.. ఇది ముందస్తుగానే ప్లాన్ ప్రకారం జరిగిన హత్యగా భావిస్తున్నామని పోలీసులు తెలిపారు. కాగా, శుక్రవారం మధ్యాహ్నం శిబు, హమీద్ల మధ్య జరిగిన గొడవే హత్యకు దారితీసిందని పోలీసులు తెలిపారు. నేరం చేసిన తర్వాత హమీద్ బంధువుల ఇంటికి వెళ్లాడు.. అక్కడి నుంచి తిరిగి వస్తుండగా అరెస్ట్ చేశాం.. పోలీస్ స్టేషన్లో లొంగిపోవాలని భావిస్తున్నట్లు బంధువులు తెలిపారు.
కాగా, శుక్రవారం కేరళ అసెంబ్లీలో ముఖ్యమంత్రి పినరయి విజయన్ సమర్పించిన నివేదికల ప్రకారం, రాష్ట్రంలో 2022 మార్చి 8 వరకు 70 హత్యలు జరిగాయి. 2021 సంవత్సరంలోనే 336 హత్యలు జరిగాయి.