Clay pot: మీ ఇంట్లోని మట్టికుండను శుభ్రం చేయాలా? ఈజీ టిప్స్ ఇవిగో

Clay pot: వేసవిలో మట్టి కుండలో నీళ్లు తాగితే చల్లగా ఉండటమే కాకుండా, ఆరోగ్యానికి కూడా మంచిది. అయితే ఎక్కువ కాలం నీళ్లు కుండలో ఉండిపోతే పాడైపోతుంది. కుండను నేచురల్ గా ఎలా శుభ్రం చేయాలో టిప్స్ తెలుసుకుందాం రండి. 

వేసవిలో దాహం తీర్చుకోవడానికి చాలామంది ఫ్రిడ్జ్ నీళ్ళనే తాగుతారు. కానీ మన పూర్వీకులు వాడిన మట్టికుండ నీళ్ళు సహజసిద్ధంగా చల్లగా ఉండటమే కాకుండా శరీరానికి కూడా మంచిది. మట్టికుండ నీళ్ళు కొంచెం క్షారగుణం కలిగి ఉండటం వల్ల, ఎసిడిటీని తగ్గించి జీర్ణక్రియను మెరుగుపరుస్తాయి. అంతేకాకుండా ఇందులో అవసరమైన ఖనిజాలు కూడా పుష్కలంగా ఉంటాయి.

కానీ మట్టికుండను సరిగ్గా శుభ్రం చేయకపోతే బాక్టీరియా పెరిగి ఆరోగ్య సమస్యలు వస్తాయి. అందుకే మట్టికుండను ఎలా శుభ్రం చేసుకోవాలో తెలుసుకోవడం చాలా ముఖ్యం. ముఖ్యంగా డిష్ సోప్ వాడకూడదు.

డిష్ సోప్ ఎందుకు వాడకూడదు?

మట్టికుండలు కంటికి కనిపించని రంధ్రాలు కలిగి ఉంటాయి. డిష్ సోప్, కెమికల్ క్లీనర్లు వాడితే ఆ కెమికల్స్ కుండలోని రంధ్రాలలోకి ఇంకిపోతాయి. దీనివల్ల నీటి రుచి మారిపోవడమే కాకుండా ఈ కెమికల్స్ దీర్ఘకాలంలో ఆరోగ్యానికి హాని కలిగిస్తాయి.

మట్టికుండను సరిగ్గా శుభ్రం చేసుకోవడం ఎలా?

కొత్తగా కుండ కొన్నప్పుడు దాన్నిండా దుమ్ము, మట్టి ఉంటుంది. దీన్ని తుడిచేయాలి. తర్వాత కుండను పూర్తిగా నీటిలో ముంచి 24 గంటలు నానబెట్టాలి. ఇలా చేయడం వల్ల మట్టి గట్టిపడుతుంది. నానబెట్టిన తర్వాత మళ్ళీ ఒకసారి కడిగి, ఎండలో ఆరబెట్టాలి. ఇప్పుడు మీ మట్టికుండ వాడటానికి సిద్ధమైనట్లే.

మట్టికుండను రోజూ శుభ్రం చేయాలా? 

మట్టికుండలో నీటిని ప్రతిరోజూ మార్చాలి. 24 గంటలకు మించి నీటిని ఉంచకూడదు. ముఖ్యంగా వేసవిలో అస్సలు ఉంచకూడదు. ఈ సమ్మర్ లో నిల్వ ఉన్న నీటిలో బాక్టీరియా బాగా పెరుగుతుంది. ప్రతిసారి నీటిని మార్చేటప్పుడు, కుండ లోపలి భాగాన్ని శుభ్రమైన నీటితో కడగాలి.

వారానికి ఒకసారి మరింత శుభ్రం చేయాలి

వారానికి ఒకసారి లేదా 3-4 రోజులకు ఒకసారి మట్టికుండను లోతుగా శుభ్రం చేయాలి. ఒక నిమ్మకాయ రసం తీసుకుని దానికి 1-2 స్పూన్ల బేకింగ్ సోడా కలిపి కుండ లోపల, బయట రుద్దాలి. తర్వాత శుభ్రమైన నీటితో బాగా కడిగి, ఎండలో ఆరబెట్టాలి. ఇది క్రిములను చంపి, దుర్వాసనను పోగొడుతుంది.

మట్టి కుండను శుభ్రం చేయడానికి ఏం వాడాలి? 

మట్టికుండను శుభ్రం చేయడానికి మెత్తటి బ్రష్ లేదా కొబ్బరి పీచు వాడొచ్చు. ఈ బ్రష్‌ను మట్టికుండ కోసం మాత్రమే వాడాలి. వంటగదిలోని ఇతర పాత్రలకు అస్సలు వాడకూడదు. శుభ్రం చేసిన తర్వాత మట్టికుండను ఎండలో కనీసం 4-5 గంటలు బాగా ఆరబెట్టడం చాలా ముఖ్యం. ఎండ సహజసిద్ధమైన క్రిమిసంహారిణిగా పనిచేస్తుంది. ఇది మిగిలిన బాక్టీరియా లేదా ఫంగస్‌ను తొలగించి, కుండను ఫ్రెష్ గా ఉంచుతుంది.

మట్టికుండ రక్షణ కోసం మరిన్ని చిట్కాలు

మట్టికుండను దుమ్ము, కీటకాలు, మురుగునీటి పైపుల నుండి దూరంగా పెట్టాలి. శుభ్రమైన, ఎత్తైన ప్రదేశంలో ఉంచాలి.

వడపోసిన లేదా మరిగించి చల్లార్చిన నీటిని నింపాలి.

కుండను ఎల్లప్పుడూ శుభ్రమైన మూతతో మూసి ఉంచాలి.

మట్టికుండ ఎక్కువ కాలం మన్నికగా ఉండాలంటే వేసవి ముగిసిన తర్వాత దాన్ని బాగా శుభ్రం చేసి, ఎండలో ఆరబెట్టి, జాగ్రత్తగా భద్రపరచాలి.

ఈ సులభమైన చిట్కాలను పాటిస్తే మీ మట్టికుండ ఎక్కువ కాలం పని చేస్తుంది.