ప్రపంచంలోనే అత్యంత శక్తివంతమైన పాస్ పోర్ట్ కలిగిన దేశంగా సింగపూర్.. భారత్ ర్యాంక్ ఎంతంటే ?

192 దేశాలకు వీసా రహిత ప్రవేశాన్ని కల్పిస్తున్న సింగపూర్.. ప్రపంచంలోనే అత్యంత శక్తివంతమైన వీసా కలిగిన దేశంగా నిలిచింది. గతేడాది మొదటి స్థానంలో ఉన్న జపాన్.. ఈ సారి మూడు మూడో స్థానానికి పడిపోయింది.

ప్రపంచంలోనే అత్యంత శక్తివంతమైన పాస్ పోర్ట్ కలిగిన దేశంగా సింగపూర్ నిలిచింది. జపాన్ ను వెనక్కి నెట్టి సింగపూర్ ఆ స్థానాన్ని భర్తీ చేసింది. ఆ దేశం 192 దేశాలకు వీసా రహిత ప్రవేశాన్ని కల్పించింది. అన్ని దేశాల పాస్ పోర్టుల ర్యాకింగ్స్ ను హెన్లీ పాస్ పోర్ట్ ఇండెక్స్ మంగళవారం విడుదల చేసింది.

తాజా ర్యాంకింగ్స్ లో గత ఐదేళ్లుగా అగ్రస్థానంలో ఉన్న జపాన్ ప్రపంచవ్యాప్తంగా 189 దేశాలకు వీసా రహిత ప్రవేశంతో మూడో స్థానానికి పడిపోయింది.  గత ఏడాదితో పోలిస్తే 5 స్థానాలు మెరుగుపరుచుకున్న భారత్ ప్రస్తుతం 57 దేశాలకు వీసా రహిత ప్రవేశంతో టోగో, సెనెగల్ లతో పాటు సూచీలో 80వ స్థానంలో ఉంది.

దాదాపు దశాబ్దం క్రితం ఈ ర్యాంకింగ్ లో అగ్రస్థానంలో ఉన్న అమెరికా ఇప్పుడు రెండు స్థానాలు దిగజారి ఎనిమిదో స్థానానికి పడిపోయింది. బ్రెగ్జిట్ ప్రేరేపిత తిరోగమనం తర్వాత బ్రిటన్ రెండు స్థానాలు ఎగబాకి నాలుగో స్థానానికి ఎగబాకింది. 27 గమ్యస్థానాలకు సులభంగా చేరుకునే ఆప్ఘనిస్థాన్ ఈ జాబితాలో అట్టడుగున ఉంది. యెమెన్ (99), పాకిస్థాన్ (100), సిరియా (101), ఇరాక్ (102) చివరి ఐదు స్థానాల్లో నిలిచాయి.