రష్యా అధ్యక్షుడు వ్లాదిమిర్ పుతిన్ స్వీయ నిర్భంధంలోకి వెళ్లాడు. పుతిన్ వ్యక్తిగత సిబ్బందిలో కొందరికి కరోనా సోకింది. దీంతో పుతిన్ స్వీయ నిర్భంధంలోకి వెళ్లాడు. పుతిన్ ఆరోగ్యంగా ఉన్నాడని క్రెమ్లిన్ అధికార ప్రతినిధి తెలిపారు.
మాస్కో: రష్యా అధ్యక్షుడు వ్లాదిమిర్ పుతిన్ స్వీయ నిర్భంధంలోకి వెళ్లాడు.పుతిన్ వ్యక్తిగత సిబ్బందిలో కొందరికి కరోనా సోకడంతో పుతిన్ ఐసోలేషన్ కి వెళ్లాడు. ఈ మేరకు క్రెమ్లిన్ ఓ ప్రకటనను మంగళవారం విడుదల చేసింది.తజకిస్తాన్ లో వచ్చే వారంలో జరిగే ప్రాంతీయ భద్రతా మండలి సమావేశానికి పుతిన్ హాజరుకావడంపై సందిగ్థత నెలకొంది. తజకిస్తాన్ అధ్యక్షుడు ఎమోమమలి రాఖ్ మాన్ తో ఆయన ఫోన్ లో మాట్లాడినట్టు ఆ ప్రకటన తెలిపింది.క్రెమ్లిన్ అధికార ప్రతినిధి దిమిత్రి పెస్కోవ్ మీడియాతో మాట్లాడారు. పుతిన్ ఆరోగ్యంగానే ఉన్నాడని మీడియాకు చెప్పారు. పుతిన్ ఎంతకాలం స్వీయ నిర్భంధంలో ఉంటాడనే విషయమై స్పష్టత ఇవ్వలేదు.
స్పుత్నిక్ వ్యాక్సిన్ రెండో డోస్ ను పుతిన్ ఈ ఏడాది ఏప్రిల్ మాసంలోనే తీసుకొన్నారు. సోమవారం నాడు ఆయన పలు కార్యక్రమాల్లో పాల్గొన్నారు.పారా ఒలంపియన్స్ తో జరిగిన సమావేశంలో పుతిన్ పాల్గొన్నారు. బెలారస్ అధ్యక్షుడితో కలిసి సైనిక విన్యాసాలను ఆయన తిలకించారు.కరోనా పరీక్షల్లో పుతిన్ కు నెగిటివ్ వచ్చినట్టుగా పెస్కోవ్ చెప్పారు.