UFO: ఇదే బెస్ట్ యూఎఫ్వో ఫొటో.. 50 ఏళ్ల క్రితం నాటి చిత్రం తాజాగా వెలుగులోకి.. సోషల్ మీడియాలో వైరల్
సారాంశం
ఇప్పటి వరకు అత్యంత క్లారిటీతో కెమెరాకు చిక్కిన యూఎఫ్వో చిత్రం ఇప్పుడు సోషల్ మీడియాలో వైరల్ అవుతున్నది. కొస్టారికా దేశం తీరంలో ఓ ప్రాజెక్ట్ కోసం సర్వే చేస్తుండగా ఈ ఆబ్జెక్ట్ కనిపించింది. దీని గురించి నిపుణులు కూడా ఇప్పటి వరకు తేల్చుకోలేకపోతున్నారు.
న్యూఢిల్లీ: ఏలియెన్స్ గురించిన టాపిక్ ఎప్పుడూ ఇంట్రెస్టింగ్గానే ఉంటుంది. చిన్నప్పుడు పేదరాశి పెద్దమ్మ కథల్లాగే.. ఏలియెన్స్ చుట్టూ అల్లుకున్న కథలు అన్నీ వినడానికి చాలా ఆసక్తిగా ఉంటాయి. అయితే, ఇది ఏలియెన్స్ గురించిన విషయం కాదు. కానీ, ఆ ఏలియెన్స్ (గ్రహాంతరవాసులు) ప్రయాణిస్తున్న లేదా వాటి వాహనంగా భావిస్తున్న ఓ గుర్తు తెలియని ఎగిరే ఆబ్జెక్ట్ గురించిన వార్త. వాటినే అన్ఐడెంటిఫైడ్ ఫ్లైయింగ్ ఆబ్జెక్ట్ (యూఎఫ్వో)గా పిలుచుకుంటుంటారు. ఈ యూఎఫ్వో గురించిన వదంతులు ఎక్కువగా వినిపిస్తుంటాయి. ఎందుకుంటే అందుకు సంబంధించి నిర్దిష్టమైన ఫొటోలు చాలా తక్కువ. కానీ, తాము చూశామన్న వాదనలే ఎక్కువ. అయితే, ఇందుకు భిన్నంగా 50 ఏళ్ల క్రితం తీసిన ఓ ఫొటో ఇప్పటి వరకు యూఎఫ్వోల చిత్రాల్లో ఎక్కువ క్లారిటీతో ఉన్నదని పేర్కొంటున్నారు. ఆ బెస్ట్ యూఎఫ్వో ఫొటో సోషల్ మీడియాలో వైరల్ అయింది.
ఆ ఫొటోను చాలా మీడియా సంస్థలు ప్రచురించాయి. ఇప్పటి వరకు యూఎఫ్వోలను అత్యంత క్లారిటీగా తీసిన ఫొటో ఇదేనని యూజర్లు పేర్కొంటున్నారు. ఈ ఫొటోను సెర్జియో లొయాజా 1971 సెప్టెంబర్లో తీశాడు. కోస్టారికా తీరంలో ఓ హైడ్రో ఎలక్ట్రిక్ ప్రాజెక్ట్ కోసం సర్వే చేస్తూ ఓ ఎయిర్క్రాఫ్ట్లో ఎగురుతూ ర్యాండమ్గా తీసిన ఫొటోల్లో ఇదీ ఒకటి.
కింద ఉన్న సరస్సుకు పది వేల అడుగుల ఎత్తు నుంచి హై రిజల్యూషన్ ఫొటోలు అనేకం తీశాడు. అందులో ఓ ఫొటోలో ఈ గుర్తు తెలియని వస్తువు కనిపించింది. ఈ ఫొటోను ఎన్హాన్స్ చేయగానే ఆ గుర్తు తెలియని వస్తువు మరింత స్పష్టంగా కనిపించింది.
అయితే, ఆ ఫొటో నేషనల్ జియోగ్రాఫిక్ కొస్టారికాకు ప్రాపర్టీ. ఆ సర్వే చేపట్టాలని ఆదేశించినది ఇదే. ఆ ఫొటోను ఇప్పుడు ఓ వ్యక్తి సంపాదించి సోషల్ మీడియాలో వదిలాడు.
ఈ ఫొటోలోని గుర్తు తెలియని వస్తువు గురించి కొన్నేళ్లుగా నిపుణులు చర్చిస్తున్నారు. కొస్టారికా యూఎఫ్వో రీసెర్చర్ రికార్డో విల్చెజ్, డాక్టర్ రిచర్డ్ హైనెస్, డాక్టర్ జాక్వస్ వాలీలు ఈ ఫొటోను పలుమార్లు విశ్లేషించారు. ఆ ఫొటోలో కనిపిస్తున్న వస్తువు నిజంగా ఆ సమయంలో అక్కడ ఎగురుతూ ఉన్నదేనని పేర్కొన్నారు. అంతకు మించి వారు మరేమీ చెప్పలేకపోయారు. ఫొటోలో కనిపిస్తున్న ఆ ఆబ్జెక్ట్ వ్యాసం 120 నుంచి 220 అడుగుల వరకు ఉంటుందని అంచనా వేస్తున్నారు.