లాస్ వెగాస్ ఎయిర్ పోర్టులో 2 విమానాలు ఢీ.. న‌లుగురు మృతి

ఎయిర్ పోర్టులో రెండు విమానాలు ఢీకొన్నాయి. ఈ ప్రమాదంలో నలుగురు చనిపోయారు. ఈ ఘటన అమెరికాలోని లాస్ వెగాస్ లో చోటు చేసుకుంది. 

అమెరికాలోని నార్త్ లాస్ వెగాస్ విమానాశ్రయంలో రెండు చిన్న విమానాలు ఎదురెదురుగా ఆదివారం ఢీకొన్నాయి. ఈ ఘ‌ట‌న‌లో న‌లుగురు మృతి చెందారు. ఈ విష‌యాన్ని స్థానిక అధికారులు ధృవీక‌రించారు. ఫెడరల్ ఏవియేషన్ అడ్మినిస్ట్రేషన్ తెలిపిన వివ‌రాల ప్ర‌కారం.. ఆదివారం మధ్యాహ్నం సమయంలో ఒకే ఇంజన్ పైపర్ PA-46, సింగిల్ ఇంజిన్ సెస్నా-172 ఢీకొన్నాయని తెలిపారు.

‘‘ సెస్నా 172తో ఢీకొన్నప్పుడు పైపర్ PA-46 ల్యాండ్ కావడానికి ప్రయత్నిస్తోంది. ఈ స‌మ‌యంలోనే ప్ర‌మాదం జ‌రిగింద‌ని ప్రాథ‌మిక స‌మాచారం తెలుపుతోంది ’’ అని FAA ఒక ప్రకటనలో తెలిపింది. ‘‘పైపర్... రన్‌వే -30 కుడివైపు తూర్పున ఉన్న మైదానంలోకి దూసుకెళ్లింది. సెస్నా నీటిని నిలుపుకునే చెరువులో పడిపోయింది.’’ అని పేర్కొంది. 

సిటీ ఫైర్ డిపార్ట్ మెంట్ ఆఫీస‌ర్లు తెలిపిన వివ‌రాల ప్ర‌కారం.. ఒక్కో విమానంలో ఇద్దరు ఉన్నారు. ఈ ప్ర‌మాదం జ‌ర‌గ‌డంతో న‌లుగురు మ‌ర‌ణించారు. అయితే బాధితుల పేర్లు, వయస్సు, స్వస్థలాలు ఎక్క‌డ‌నే విష‌యం ఇంకా విడుద‌ల చేయ‌లేదు. కాగా ఈ ప్ర‌మాదానికి అస‌లు కార‌ణం ఏంట‌నే విష‌యాన్ని నేషనల్ ట్రాన్స్‌పోర్టేషన్ సేఫ్టీ బోర్డ్, FAA క్రాష్‌కి ప‌రిశీలిస్తున్నాయి.