40 ఏండ్ల తర్వాత ఎన్నో రోగాలు వస్తుంటాయి. అయితే కొన్ని పోషకాలు ఈ అనారోగ్య సమస్యలను దూరం చేయడానికి ఎంతో సహాయపడతాయని ఆరోగ్య నిపుణులు చెబుతున్నారు. అవేంటంటే..
40 ఏళ్ల తర్వాత మహిళల జీవితాల్లో ఎన్నో మార్పులు వస్తాయి. ఈ సమయంలో జీవితంతో పాటు శరీరం కూడా అనేక మార్పులకు లోనవుతుంది. హార్మోన్లలో మార్పులు, బరువు పెరగడం, రుతువిరతి సమయం వంటి ఈ మార్పులు శరీరంలో సంభవిస్తాయి. కానీ ఇవి వారి మానసిక ఆరోగ్యంపై ఎంతో ప్రభావం చూపుతాయి. ఆరోగ్యకరమైన దినచర్య, వ్యాయామంతో ఈ మార్పుల లక్షణాలను కొంతవరకు తగ్గించొచ్చు. 40 ఏళ్ల తర్వాత మహిళలు కొన్ని పోషకాలను తీసుకుంటే ఎన్నో రోగాల ముప్పు తప్పుతుందంటున్నారు నిపుణులు.
మహిళల వయస్సు పెరిగేకొద్దీ.. వారికి పోషక అవసరాలు మారుతాయి. 40 ఏండ్లు పైబడిన మహిళలు తమ ఆహారంలో కొన్ని పోషకాలను తప్పకుండా చేర్చుకోవాలని నిపుణులు చెబుతున్నారు. ఒమేగా -3 కొవ్వు ఆమ్లాలు శరీరమంతా రక్త ప్రవాహాన్ని పెంచుతాయి. నొప్పిని ఎదుర్కోవడానికి సహాయపడతాయి. మహిళలు ఎలాంటి పోషకాలను తీసుకోవాలో ఇప్పుడు తెలుసుకుందాం..
కాల్షియం
40 ఏళ్లు పైబడిన మహిళలకు బోలు ఎముకల వ్యాధి వచ్చే ప్రమాదం ఉంది. అందుకే వీళ్లు ఎముకల ఆరోగ్యాన్ని కాపాడుకోవడానికి తగినంత కాల్షియాన్ని తీసుకోవడం చాలా ముఖ్యం. పాల ఉత్పత్తులు, ఆకుకూరలు, బలవర్థకమైన ఆహారాలు కాల్షియానికి మంచి వనరులు.
విటమిన్ డి
ఎముక ఆరోగ్యానికి విటమిన్ డి చాలా అవసరం. ఎందుకంటే ఇది శరీరం కాల్షియాన్ని గ్రహించడానికి సహాయపడుతుంది. 40 ఏళ్లు పైబడిన మహిళలు కేవలం సూర్యరశ్మి నుంచే తగినంత విటమిన్ డి ని పొందలేరు. అందుకే కొవ్వు చేపలు, బలవర్థకమైన ఆహారాలు వంటి విటమిన్ డి ఎక్కువగా ఉండే ఆహారాన్ని తినండి. లేదా విటమిన్ డి సప్లిమెంట్లను తీసుకోండి.
మెగ్నీషియం
ఎముక ఆరోగ్యంతో పాటుగా కండరాల, నరాల పనితీరుకు మెగ్నీషియం ముఖ్యమైనది. గింజలు, విత్తనాలు, తృణధాన్యాలు, ఆకుకూరల్లో మెగ్నీషియం పుష్కలంగా ఉంటుంది.
ఒమేగా -3 కొవ్వు ఆమ్లాలు
ఒమేగా -3 కొవ్వు ఆమ్లాలు గుండెను ఆరోగ్యంగా ఉంచడానికి, మెదడు పనితీరును మెరుగుపర్చడానికి, మంటను తగ్గించడానికి అవసరం. కొవ్వు చేపలు, అవిసె గింజలు, చియా విత్తనాలు, వాల్ నట్స్ వంటి గింజల్లో ఒమేగా 3 కొవ్వు ఆమ్లాలు పుష్కలంగా ఉంటాయి.
ఫైబర్
మహిళలు వయస్సు పెరిగే కొద్దీ వారి జీర్ణక్రియ మందగిస్తుంది. దీంతో వీళ్లు విపరీతంగా బరువు పెరిగిపోతారు. ఫైబర్ ఎక్కువగా ఉన్న ఆహారాన్ని తింటే జీర్ణవ్యవస్థను ఆరోగ్యంగా ఉంటుంది. బరువు పెరిగే అవకాశం కూడా ఉండదు. పండ్లు, కూరగాయలు, తృణధాన్యాలు, చిక్కుళ్లలో ఫైబర్ ఎక్కువగా ఉంటుంది.