హుజూరాబాద్ అసెంబ్లీ స్థానం నుండి పోటీ చేసే అభ్యర్ధులపై కాంగ్రెస్ పార్టీ కసరత్తు చేస్తోంది. కాంగ్రెస్ పార్టీ ఎన్నికల కమిటీ ఛైర్మెన్ దామోదర రాజనర్సింహ రెండు రోజుల క్రితం హుజూరాబాద్ లో పర్యటించారు.
హుజూరాబాద్ అసెంబ్లీ స్థానానికి జరిగే ఉప ఎన్నికల్లో పోటీ చేసే అభ్యర్ధి ఎంపిక విషయంలో కాంగ్రెస్ పార్టీ కసరత్తును ప్రారంభించింది.
2018 అసెంబ్లీ ఎన్నికల్లో హుజూరాబాద్ అసెంబ్లీ స్థానం నుండి కాంగ్రెస్ అభ్యర్ధిగా పోటీ చేసిన కౌశిక్ రెడ్డి ఆ పార్టీని వీడి టీఆర్ఎస్ లో చేరారు. దీంతో కాంగ్రెస్ పార్టీ కొత్త అభ్యర్ధి కోసం అన్వేషణ ప్రారంభించింది.
ఈ స్థానం నుండి పోటీ చేయడానికి మాజీ ఎంపీ పొన్నం ప్రభాకర్ ఆసక్తి చూపడం లేదు. టీపీసీసీ చీఫ్ గా రేవంత్ రెడ్డి నియామకం తర్వాత ఆ పార్టీ తొలిసారి ఈ ఉప ఎన్నికను ఎదుర్కొంటుంది.
ఎన్ఎస్‌యూఐ నేత విద్యార్ధి రాజకీయాల నుండి పొన్నం ప్రభాకర్ కాంగ్రెస్ పార్టీలో కొనసాగుతున్నారు. కరీంనగర్ ఎంపీ స్థానం నుండి ఆయన రెండు దఫాలు ప్రాతినిథ్యం వహించారు. హుజూరాబాద్ నుండి ఆయన పోటీ చేస్తే కాంగ్రెస్ కు కలిసివచ్చే అవకాశం ఉందని కొందరు నేతలు భావిస్తున్నారు. అయితే తాను పోటీకి దూరంగా ఉంటానని ఆయన తేల్చి చెప్పారు.
హుజూరాబాద్ అసెంబ్లీ నియోజకవర్గంలో 2.3 లక్షల ఓటర్లున్నారు. అయితే వీరిలో 35 నుండి 40వేల మంది దళిత ఓటర్లున్నారు. అయితే దళిత సామాజికవర్గం నుండి బలమైన నేత ఏ పార్టీలోనూ లేరు. దీంో రెడ్డి సామాజిక వర్గం నుండి ఈ నియోజకవర్గంలో రాజకీయాలను ప్రభావితం చేస్తున్న నేతలు ఎదిగారు.
2018 అసెంబ్లీ ఎన్నికల్లో కాంగ్రెస్ అభ్యర్ధిగా కౌశిక్ రెడ్డి పోటీ చేసి ఓటమి పాలయ్యాడు. ఆ ఎన్నికల్లో కౌశిక్ రెడ్డి 60 వేలకు పైగా ఓట్లు దక్కాయి.
గతంలో సిరిసిల్ల అసెంబ్లీ స్థానం నుండి కాంగ్రెస్ అభ్యర్ధిగా పోటీ చేసిన కెకె మహేందర్ రెడ్డి, వట్టి కృష్ణారెడ్డిల పేర్లు కాంగ్రెస్ లో ప్రముఖంగా విన్పిస్తున్నాయి. సిరిసిల్లలో టీఆర్ఎస్ బలోపేతంలో కెకె మహేందర్ రెడ్డి కీలకంగా వ్యవహరించారు. సిరిసిల్లలో టీఆర్ఎస్ కేటీఆర్ ను బరిలోకి దింపడాన్ని వ్యతిరేకిస్తూ మహేందర్ రెడ్డి ఇండిపెండెంట్ గా బరిలోకి దిగి స్వల్ప ఓట్ల తేడాతో ఓడిపోయాడు.
సీపీఎం నుండి పార్టీ ఫిరాయించిన కృష్ణ అనే వ్యక్తి పేరు కూడ కాంగ్రెస్ వర్గాల్లో విన్పిస్తోంది.కృష్ణకు కొన్ని ప్రాంతాల్లో స్థానికంగా పట్టుంది.
హుజూరాబాద్ ఉప ఎన్నికల్లో పోటీకి పొన్నం సహా కొందరు సీనియర్లు పోటీకి అంతగా ఇష్టపడడం లేదు. ఈ ఎన్నికల్లో కేసీఆర్ కు ఎదురు దెబ్బ తగలాలంటే ఈటల రాజేందర్ విజయం సాధించాలి
దీన్ని దృష్టిలో ఉంచుకొని హుజూరాబాద్ లో కాంగ్రెస్ బలమైన అభ్యర్ధిని బరిలోకి దింపకపోవచ్చనే అభిప్రాయాలను రాజకీయ విశ్లేషకులు వ్యక్తం చేస్తున్నారు
కాంగ్రెస్ పార్టీ ఎన్నికల కమిటీ ఛైర్మెన్ దామోదర రాజనర్సింహ నియోజకర్గంలో పర్యటించారు. ఎన్నికల్లో పోటీ చేసే అభ్యర్ధుల గురించి వాకబు చేశారు. ఎన్నికల కమిటీ త్వరలోనే సమావేశమై పోటీ చేసే అభ్యర్ధులను ఖరారు చేసే అవకాశం ఉంది.