Mobile Safety Tips: మీ స్మార్ట్‌ఫోన్ హ్యాక్ అవ్వకుండా ఉండాలా? ఈ సింపుల్ టిప్స్ ఫాలో అవ్వండి

Mobile Safety Tips : స్మార్ట్‌ఫోన్ వాడుతున్నారా? ఈ తప్పులు చేస్తే మీ బ్యాంక్ ఖాతా ఖాళీ అవ్వడంతో పాటు మీ పర్సనల్ డేటా కూడా హ్యాకర్ల బారిన పడే ప్రమాదం ఉంది. అయితే, మీ ఫోన్ హ్యాకర్ల బారిన పడకుండా డేటా సేఫ్‌గా ఉంచడానికి ఈ సింపుల్ టిప్స్ ఫాలో అవ్వండి..

ప్రతి ఒక్కరూ తెలుసుకోవాల్సిన మొబైల్ సెక్యూరిటీ టిప్స్

ఈ రోజుల్లో మీ జీవితంలో మీ గురించి ఎవరికీ తెలియని విషయాలు కూడా మీ స్మార్ట్‌ఫోన్‌కు తెలుసు. మీ బ్యాంక్ అకౌంట్ వివరాలు, మీ ఈమెయిల్స్, మీ లొకేషన్ హిస్టరీ, పర్సనల్ ఫోటోలు, పాస్‌వర్డ్‌లు, మీ చాటింగ్స్.. ఇలా ఒకటేమిటి అన్ని మీ ఫోన్‌లోనే ఉంటున్నాయి.

అయితే, చాలా మంది తమ ఫోన్ దానంతట అదే రక్షణగా ఉంటుందని భ్రమపడుతుంటారు. ఇప్పటివరకు తమకు ఎలాంటి నష్టం జరగలేదు కాబట్టి, మున్ముందు కూడా ఏమీ కాదులే అని చాలా కూల్‌గా లైట్ తీసుకుంటారు. సరిగ్గా యూజర్ల ఈ అజాగ్రత్తనే సైబర్ అటాకర్లు ఆసరాగా చేసుకుంటారు. అయితే, మీ ఫోన్ హ్యాకర్ల బారినపడకుండా తీసుకునే కొన్ని సింపుల్ టిప్స్ మీకోసం..

లాక్ స్క్రీన్‌తోనే అసలైన సెక్యూరిటీ స్టార్ట్

మీ ఫోన్ భద్రతలో ఉండే అతి పెద్ద లోపం వీక్ పిన్ నంబర్ పెట్టుకోవడం. చాలా మంది ఈ సెక్యూరిటీ ఫీచర్‌ను అస్సలు పట్టించుకోరు. సాధారణంగా మీ స్మార్ట్‌ఫోన్‌కు ఉండే నాలుగు అంకెల సెక్యూరిటీ పిన్ నంబర్‌ను హ్యాక్ చేయడానికి వేల రకాల కాంబినేషన్లు ఉంటాయి. అందుకే, ఎప్పుడైనా సరే కనీసం ఆరు అంకెలు ఉండేలా చూసుకోవాలి. అది కూడా ఆల్ఫాన్యూమరిక్ పిన్ ఉపయోగించడం చాలా మంచిది.

దీనితో పాటు, మీ పిన్ నంబర్‌కు అదనంగా ఫేస్ అథెంటికేషన్ లేదా ఫింగర్‌ప్రింట్ లాక్‌ను కూడా ఎనేబుల్ చేసుకోండి. బయోమెట్రిక్స్ అనేవి 100 శాతం ఫుల్‌ప్రూఫ్ కాకపోయినప్పటికీ, అవి మీ ఫోన్‌ను ఇతరులు అంత సులభంగా ఓపెన్ చేయకుండా అడ్డుకుంటాయి. మీ రోజువారీ ఫోన్ వాడకానికి ఎలాంటి ఇబ్బంది లేకుండా, ఒక గట్టి సెక్యూరిటీ లేయర్‌ను ఇవి అందిస్తాయి.

టూ ఫ్యాక్టర్ అథెంటికేషన్ కచ్చితంగా ఆన్ చేయండి

మనం అస్సలు నిర్లక్ష్యం చేయకూడని మరో ముఖ్యమైన ఫీచర్ టూ ఫ్యాక్టర్ అథెంటికేషన్. ఈ సెక్యూరిటీ ఫీచర్ వల్ల లాభం ఏంటంటే, ఎవరైనా మీ పాస్‌వర్డ్‌ను దొంగిలించినా కూడా, సెకండ్ స్టెప్ వెరిఫికేషన్ లేకుండా వారు మీ అకౌంట్‌ను ఓపెన్ చేయలేరు. టూ ఫ్యాక్టర్ అథెంటికేషన్ ఆన్‌లో ఉంటే, మీ స్మార్ట్‌ఫోన్‌కు ఒక ఓటీపీ వస్తుంది లేదా అథెంటికేటర్ యాప్ ద్వారా ఒక కోడ్ జనరేట్ అవుతుంది. ఒకవేళ ఎవరికైనా మీ ఈమెయిల్ ఐడీ దొరికితే, వారు మీ మిగతా అన్ని అకౌంట్ల పాస్‌వర్డ్‌లను రీసెట్ చేసే ప్రమాదం ఉంది.

అందుకే మీ బ్యాంకింగ్ యాప్‌లు, సోషల్ మీడియా అకౌంట్లు, అలాగే ముఖ్యమైన ఆర్థిక లేదా వ్యక్తిగత సమాచారం ఉన్న ప్రతి అకౌంట్‌కు టూ ఫ్యాక్టర్ అథెంటికేషన్‌ను వెంటనే ఎనేబుల్ చేసుకోండి. ఎస్ఎమ్ఎస్ ద్వారా వచ్చే కోడ్‌ల కంటే గూగుల్ అథెంటికేటర్ లేదా ఆథీ వంటి యాప్‌లను ఉపయోగించడం చాలా సురక్షితం. ఎందుకంటే ఎస్ఎమ్ఎస్ కోడ్‌లను సిమ్ స్వాపింగ్ అటాక్స్ ద్వారా హ్యాకర్లు దారి మళ్లించే అవకాశం ఉంది.

యాప్ పర్మిషన్లపై ఓ కన్నేసి ఉంచండి

వెంటనే మీ ఫోన్ ప్రైవసీ లేదా పర్మిషన్స్ సెట్టింగ్స్‌లోకి వెళ్లి, ఏయే యాప్‌లు మీ లొకేషన్, కెమెరా, మైక్రోఫోన్, కాంటాక్ట్‌లు, స్టోరేజ్‌లను యాక్సెస్ చేస్తున్నాయో ఒక్కసారి చెక్ చేయండి. చాలా యాప్‌లకు వాటి పనికి సంబంధం లేని పర్మిషన్లు ఉన్నట్లు మీరు గమనిస్తారు.

ఉదాహరణకు, ఒక ఫ్లాష్ లైట్ యాప్‌కు మీ కాంటాక్ట్ లిస్ట్ అవసరం లేదు. ఒక ఫోటో ఎడిటర్ యాప్‌కు మీ లొకేషన్ డేటాతో పనే లేదు. కాబట్టి, ఆయా యాప్‌ల పనితీరుకు అవసరం లేని పర్మిషన్లను వెంటనే రివోక్ చేయండి. అలాగే, మీ ఫోన్ యాక్సెసిబిలిటీ సెట్టింగ్స్‌ను ఏ యాప్‌లు వాడుతున్నాయో కూడా జాగ్రత్తగా చూసుకోండి. ఎందుకంటే మాల్వేర్‌లు, వైరస్ యాప్‌లు ఎక్కువగా ఈ యాక్సెసిబిలిటీ పర్మిషన్ల ద్వారానే ఫోన్‌ను తమ కంట్రోల్‌లోకి తెచ్చుకుంటాయి.

సాఫ్ట్‌వేర్ అప్‌డేట్లను అస్సలు నిర్లక్ష్యం చేయొద్దు

కొత్త ఫీచర్లతో పోలిస్తే సాఫ్ట్‌వేర్ అప్‌డేట్లు బోర్ కొట్టేలా అనిపించవచ్చు. కానీ ఆ అప్‌డేట్లతో పాటు వచ్చే సెక్యూరిటీ ప్యాచులు చాలా ముఖ్యమైనవి. పాత ఆపరేటింగ్ సిస్టమ్‌లు, యాప్‌లలో ఉండే లోపాలను హ్యాకర్లు టార్గెట్ చేస్తారు. సాఫ్ట్‌వేర్‌లో ఒక లోపం బయటపడిన తర్వాత, దాన్ని ఉపయోగించి హ్యాకర్లు దాడి చేయడానికి కొన్ని నెలల సమయం పట్టదు, కేవలం కొన్ని రోజుల వ్యవధిలోనే అంతా జరిగిపోతుంది.

అందుకే, హ్యాకర్లకు ఆ అవకాశం ఇవ్వకుండా ఉండాలంటే మీ ఆపరేటింగ్ సిస్టమ్, యాప్‌ల కోసం ఆటోమేటిక్ అప్‌డేట్లను ఎల్లప్పుడూ ఆన్‌లో ఉంచుకోవడం మంచిది. ఒకవేళ అలా కుదరకపోతే, మీ స్మార్ట్‌ఫోన్ సెట్టింగ్స్ మెనూలోకి వెళ్లి మాన్యువల్‌గా అయినా అప్‌డేట్లు వచ్చాయో లేదో చెక్ చేసుకుని అప్‌డేట్ చేయండి.

పబ్లిక్ వైఫై వాడుతున్నారా? జాగ్రత్త

పబ్లిక్ వైఫై నెట్‌వర్క్‌లు వాడుకోవడానికి చాలా బాగుంటాయి. కానీ అవి అన్‌క్రిప్టెడ్ గా ఉంటాయి. అంటే మీ ఫోన్‌కు, ఇంటర్నెట్‌కు మధ్య జరిగే డేటా ట్రాఫిక్‌ను ఎవరైనా సులభంగా దొంగిలించడానికి ఇవి వీలు కల్పిస్తాయి. కాబట్టి, పబ్లిక్ నెట్‌వర్క్‌లలో ఉన్నప్పుడు బ్యాంకింగ్ యాప్‌లను ఓపెన్ చేయడం కానీ, ఎలాంటి వ్యక్తిగత సమాచారాన్ని టైప్ చేయడం కానీ అస్సలు చేయవద్దు.

ఒకవేళ మీరు రెగ్యులర్‌గా పబ్లిక్ వైఫై వాడాల్సి వస్తే, కచ్చితంగా ఒక వీపీఎన్ ఉపయోగించండి. ఇది మీ కనెక్షన్‌ను ఎన్‌క్రిప్ట్ చేసి సురక్షితంగా ఉంచుతుంది. మార్కెట్లో ఉచిత, పెయిడ్ వీపీఎన్ ఆప్షన్లు అందుబాటులో ఉన్నాయి. అసలు ఏమీ లేకపోవడం కంటే బేసిక్ వీపీఎన్ ప్రొటెక్షన్ ఉండటం చాలా ఉత్తమం.

అలాగే, ఫోన్‌కు వచ్చే అనుమానాస్పద లింకులతో జాగ్రత్తగా చూడాలి. ఈ రోజుల్లో ఫిషింగ్ మెసేజ్‌లు చాలా నిజమైన వాటిలా కనిపిస్తున్నాయి. డెలివరీ నోటిఫికేషన్లు, బ్యాంక్ అలర్ట్లు, లేదా మీరు నిజంగా వాడుతున్న సర్వీసుల పేరుతో ఇవి వస్తుంటాయి. చివరగా, యాప్‌లను ఎప్పుడైనా సరే అఫీషియల్ యాప్ స్టోర్ లేదా గూగుల్ ప్లే స్టోర్ నుండి మాత్రమే ఇన్‌స్టాల్ చేసుకోండి. అక్కడ తనిఖీలు పక్కాగా ఉంటాయి. అధికారిక స్టోర్ల వెలుపల లభించే యాప్‌లకు ఎలాంటి గ్యారెంటీ ఉండదు. మీ డేటాను దొంగిలించడానికి పాపులర్ యాప్‌ల లాగే ఉండే ఫేక్ వెర్షన్లను హ్యాకర్లు సృష్టిస్తుంటారు. కాబట్టి అఫీషియల్ స్టోర్‌లో యాప్ లేకపోతే, దాన్ని అస్సలు ఇన్‌స్టాల్ చేయకండి.