శివలింగం వేరు.. జ్యోతిర్లింగం వేరు అని మీకు తెలుసా.. ప్రతి శివాలయంలో ఉండేది జ్యోతిర్లింగం కాదు. కాశీ, శ్రీశైలం, వంటి పుణ్యక్షేత్రాల్లో ఉండేవి మాత్రమే జ్యోతిర్లింగాలు. ఇలాంటివి మన దేశంలో మొత్తం 12 జ్యోతిర్లింగాలున్నాయి. మరి శివలింగం, జ్యోతిర్లింగంలలో ఏది శక్తివంతమైనదో ఇప్పుడు తెలుసుకుందాం..
ప్రతి ఊరిలో శివాలయం ఉండాలని హిందూ ధర్మంలో ఉంది. చిన్నదో, పెద్దదో శివాలయం ఉండకుండా ఏ ఊరు ఉండదు. అలాంటి ఊర్లేమైనా ఉంటే వాటిని శ్మశానంగా చూసేవారు. అందుకే పూర్వం రాజులు, చక్రవర్తులు ఊరూరా శివాలయాలు నిర్మించేవారు. శాతవాహనులు, చోళులు, పాండ్యులు, విజయనగర రాజులు ఇలా ఎంతో మంది వారి పరిపాలనా కాలంలో అనేక ఆలయాలను నిర్మించారు. శివలింగాలను వివిధ రకాల వస్తువులతో తయారు చేస్తారు. ఎక్కువగా నల్ల రాతితో చేస్తారు. ఉత్తర భారత దేశంలో పాలరాయిని కూడా ఉపయోగిస్తారు. ఇళ్లలో పూజించే శివలింగాలను వారి ఆర్థిక స్థితి మేరకు బంగారం, వెండి, రాగి, మట్టితోనూ తయారు చేయించి పూజిస్తుంటారు.
శివలింగం అంటే హిందూ ధర్మంలో శివుని ప్రతిరూపం. ఇది శివుని నిరాకార స్వరూపాన్ని సూచిస్తుంది. శివలింగం సాధారణంగా ప్రతి శివాలయంలో కనబడుతుంది. ఇవన్నీ ప్రతిష్ఠించిన విగ్రహాలు. శివలింగాలను పూజించడం ద్వారా భక్తులు శివుని అనుగ్రహం పొందుతారు. శివలింగం ఎంత పరిమాణంలోనైనా ఉండవచ్చు. అది చిన్నదైనా, పెద్దదైనా శివలింగమే. ఇది శివుని నిర్వికల్ప, నిరాకార, నిర్గుణ స్వరూపాన్ని సూచిస్తుంది.
జ్యోతిర్లింగం అంటే ఆకాశంలో వెలుగుతో ఉన్న లింగం అని అర్థం. హిందూ పురాణాల ప్రకారం, శివుడు స్వయంగా వెలిగించిన అద్భుతమైన శక్తి కేంద్రం జ్యోతిర్లింగం అని చెబుతారు. జ్యోతిర్లింగాలు చాలా శక్తివంతమైనవి. శక్తి కేంద్రాలుగా వెలుగొందే ఈ క్షేత్రాలకు వెళితే మనలో ఉండే నెగిటివిటీ పోయి పాజిటివ్‌ వైబ్రేషన్‌ పెరుగుతాయని పండితులు చెబుతారు. ఈ జ్యోతిర్లింగాలను దర్శించడం ద్వారా భక్తులు శివుడిని ప్రత్యక్షంగా చూపినట్లు భావిస్తారు.
జ్యోతిర్లింగాలు 12 ఉన్నాయి. అవి భారతదేశంలోని వివిధ ప్రాంతాల్లో ఉన్నాయి.
1. రామనాథస్వామి లింగం - రామేశ్వరం
2. శ్రీశైల క్షేత్రం (మల్లి కార్జున లింగం) - శ్రీశైలం
3. భీమశంకర లింగం - భీమా శంకరం
4. ఘృష్ణేశ్వర జ్వోతిర్లింగం - ఎల్లోరా గుహలు
5. త్రయంబకేశ్వర లింగం - త్రయంబకేశ్వరాలయం (త్రయంబకేశ్వర్, నాసిక్)
6. సోమనాథ లింగం - సోమనాథ్
7. నాగేశ్వర లింగం - దారుకావనం (ద్వారక)
8. ఓంకారేశ్వర-అమలేశ్వర లింగాలు - ఓంకారక్షేత్రం
9. మహాకాళ లింగం - ఉజ్జయిని
10. వైద్యనాథ జ్వోతిర్లింగం - చితా భూమి (దేవఘర్)
11. విశ్వేశ్వర లింగం - వారణాశి
12. కేదార్‌నాథ్‌ ఆలయం
అత్యంత శక్తివంతమైన జ్యోతిర్లింగం
12 జ్యోతిర్లింగాలలో వారణాశిలోని కాశీ విశ్వనాథ్ జ్యోతిర్లింగం అన్నింటికంటే శక్తివంతమైన, పవిత్రమైన జ్యోతిర్లింగంగా భక్తులు నమ్ముతారు. భారతదేశంలోని పురాతన, పవిత్రమైన నగరాల్లో కాశీ ముఖ్యమైనదని విశ్వాసం. విశ్వనాథుడు విశ్వానికి అధిపతిగా పురాణ కథల్లో ఉంది. కాశీ విశ్వనాథ ఆలయాన్ని ఒక్కసారి సందర్శించి, గంగాస్నానం చేస్తే గత జన్మ పాపాలు పోతాయని ప్రజల విశ్వాసం.
ఏది పవర్ ఫుల్
శక్తి పరంగా చూస్తే జ్యోతిర్లింగాలు అత్యంత శక్తివంతమైనవిగా పరిగణిస్తారు. ఎందుకంటే జ్యోతిర్లింగాలను సాక్షాత్తు శివుడే వెలిగించాడని నమ్ముతారు. ఆ క్షేత్రాలు పరమ శివునికి ప్రతి రూపాలని నమ్ముతారు. పురాణాల ప్రకారం జ్యోతిర్లింగాల పూజ, యాత్రలు చేసిన భక్తులు అద్భుతమైన అనుభవాలు పొందారు. ఈ ఉదంతాలు కథల రూపంలో అందుబాటులో ఉన్నాయి. శివలింగం, జ్యోతిర్లింగం రెండింటికీ శక్తి ఉన్నప్పటికీ జ్యోతిర్లింగాలు ఎక్కువ పవర్‌ఫుల్‌.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి