విద్యార్థులకు చదువు చెప్పాలంటే తప్పనసరిగా మంచి నైపుణ్యం కావాలి. అందువల్లే బోధనా నైపుణ్యాలు కలిగిన B.Ed అభ్యర్థులనే టీచర్లుగా నియమిస్తారు. అయితే బి.ఎడ్ లేకపోయినా టీచర్ గా మారవచ్చు... అది ఎలాగో తెలుసుకుందాం.
భారతదేశంలో, స్కూల్ టీచర్‌గా కెరీర్‌ను కొనసాగించడానికి బ్యాచిలర్ ఆఫ్ ఎడ్యుకేషన్ (B.Ed) తప్పనిసరి. విద్యార్థులకు ప్రభావవంతంగా ఎలా బోధించాలి, టీచింగ్ నైపుణ్యాన్ని ఎలా పెంపొందించుకోవాలో ఈ డిగ్రీ ద్వారా నేర్చుకుంటారు. బి.ఎడ్ చేసినవారే ప్రభుత్వ ఉపాధ్యాయులుగా పనిచేసేందుకు అర్హులు. అయితే బి.ఎడ్ లేకపోయినా ప్రభుత్వ ఉపాధ్యాయులుగా మారవచ్చు. అది ఎలాగో తెలుసుకుందాం.
ఇంటిగ్రేటెడ్ టీచర్ ఎడ్యుకేషన్ ప్రోగ్రామ్ (ITEP)
ఇంటిగ్రేటెడ్ టీచర్ ఎడ్యుకేషన్ ప్రోగ్రామ్ (ITEP) ద్వారా ఒకేసారి రెండు కోర్సులు పూర్తిచేయవచ్చు. అండర్ గ్రాడ్యుయేట్ చదువుతూనే టీచింగ్ లో శిక్షణ పొందవచ్చు. ఇంటర్మీడియట్ తర్వాత BSc, BCom, BA వంటి సాధాారణ డిగ్రీ కోర్సులతో పాటే B.Ed పూర్తిచేయవచ్చు.
ఈ కోర్సు ద్వారా ఓ సంవత్సర కాలాన్ని ఆదా చేయవచ్చు. సాధారణంగా డిగ్రీ చేయడానికి మూడేళ్లు, ఆ తర్వాత బిఎడ్ లో చేరి కోర్సు పూర్తిచేయడానికి రెండేళ్ళ సమయం పడుతుంది. అలాకాకుండా ఈ ఐటిఈపి ద్వారా కేవలం నాలుగేళ్లలో అటు డిగ్రీ, ఇటు బిఎడ్ పూర్తిచేయవచ్చు.
అయితే ITEPలో ప్రవేశం కోసం నేషనల్ కామన్ ఎంట్రన్స్ టెస్ట్ (NCET) వుంటుంది. ఇందులో అర్హత సాధించినవారే ITEP డిగ్రీకి అర్హులు. ప్రాథమిక స్థాయిలో విద్యాబ్యాసం చేయడానికి ఈ డిగ్రీ చేసినవారు అర్హులు. అయితే ఉన్నత స్థాయి విద్యా బోధన కోసం మాత్రం బి.ఎడ్ తప్పనిసరి.
పోస్ట్ గ్రాడ్యుయేట్ టీచర్లు (PGT) కావాలనుకునే వారికి సంబంధిత సబ్జెక్టులో పోస్ట్ గ్రాడ్యుయేట్ డిగ్రీ చాలా ముఖ్యం. ప్రభుత్వ పాఠశాలల్లో బోధనకు B.Ed అవసరం... అయితే అత్యుత్తమ ప్రతిభ కనబరిచే అభ్యర్థులకు మినహాయింపు ఉంది. ఇంటర్మీడియట్ సర్టిఫికేట్, గ్రాడ్యుయేట్ డిగ్రీతో పాటు ప్రతి సబ్జెక్ట్ లో కనీసం 60% మార్కులతో పోస్ట్ గ్రాడ్యుయేట్ డిగ్రీ ఉంటే మీరు టీచింగ్ కు అర్హులు కావచ్చు. PGT పరీక్షలలో ఉత్తీర్ణులైన తర్వాత మీరు ఉద్యోగంలో చేరవచ్చు. అయితే మూడు సంవత్సరాలలోపు B.Ed పూర్తి చేయాలి.
డిప్లోమా ఇన్ ఎడ్యుకేషన్ (D.Ed) చేసినవారు కూడా విద్యార్థులకు బోధించేందుకు అర్హులు. రెండేళ్ల ఈ కోర్సులో బి.ఎడ్ లో మాదిరిగానే అభ్యర్థులకు టీచింగ్ నైపుణ్యాన్ని పెంపొందించుకునే శిక్షణ ఇస్తారు. ఇంటర్మీడియట్ తర్వాత ఈ కోర్సులో చేరవచ్చు. అయితే డి.ఎడ్ అభ్యర్థులు ప్రాథమిక స్థాయిలో మాత్రమే విద్యాబోధనకు అర్హులు.
ప్రైవేట్ విద్యాసంస్థలు
ప్రభుత్వ పాఠశాలల్లో బోధనకు సాధారణంగా B.Ed అవసరం... కానీ ప్రైవేట్ విద్యాసంస్థలు ఈ ప్రమాణాలను పాటించవు. కాబట్టి బోధనపై మక్కువ కలిగి ఉంటే ప్రైవేట్ పాఠశాలల్లో టీచర్ గా చేరవచ్చు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి