సూట్ లేకుండానే సాధారణ డ్రెస్ లో ట్రంప్ ను కలిసిన జెలెన్ స్కీ ... కారణమేంటో తెలుసా?

ఉక్రెయిన్ అధ్యక్షుడు జెలెన్‌స్కీ, డొనాల్డ్ ట్రంప్‌ను వైట్ హౌస్‌లో కలిశారు. ఈ సమావేశంలో యావత్ ప్రపంచాన్ని విస్మయానికి గురిచేసే ఘటన చోటుచేసుకుంది. దేశాధినేతల మధ్య వాగ్వాదమే కాదు జెలెన్ స్కీ డ్రెస్సింగ్ కూడా చర్చనీయాంశంగా మారింది.     

Trump and Zelensky

ఉక్రెయిన్ అధ్యక్షుడు వోలోడిమిర్ జెలెన్‌స్కీ శుక్రవారం వైట్ హౌస్‌లో అమెరికా అధ్యక్షుడు డొనాల్డ్ ట్రంప్‌ను కలిశారు. అరుదైన ఖనిజాలకు సంబంధించిన ఒప్పందంపై సంతకం చేయడానికి వచ్చిన జెలెన్‌స్కీ, అమెరికా అధ్యక్షుడు డొనాల్డ్ ట్రంప్‌తో ఓవల్ కార్యాలయంలో చర్చలు జరిపారు.

ట్రంప్ - జెలెన్‌స్కీ మధ్య జరిగిన ఈ సమావేశం వివాదాస్పదం అయ్యింది. ఉక్రెయిన్ కాల్పుల విరమణను జెలెన్‌స్కీ కోరుకోవడం లేదని ట్రంప్ తీవ్రంగా విమర్శించారు. అమెరికా చేస్తున్న సహాయానికి కృతజ్ఞతతో ఉండాలని కూడా అన్నారు. దీంతో జెలెన్‌స్కీ అసహనంగా వైట్ హౌస్ నుంచి వెళ్లిపోయారు.

Trump and Zelensky

ఈ సమావేశంలో చర్చలు ప్రారంభించడానికి ముందు, జెలెన్‌స్కీ ధరించిన దుస్తులు చర్చనీయాంశంగా మారాయి. అమెరికాలోని అత్యున్నత కార్యాలయమైన వైట్ హౌస్‌లో జరిగిన సమావేశానికి సూట్ ఎందుకు వేసుకొని రాలేదని ఒక విలేకరి జెలెన్‌స్కీని ప్రశ్నించారు.

"మీరు ఎందుకు సూట్ వేసుకోలేదు? మీ దగ్గర సూట్ ఉందా?" అని విలేకరి అడిగారు. అమెరికా అధ్యక్షుడు డొనాల్డ్ ట్రంప్, ఉపాధ్యక్షుడు జె.డి. వాన్స్ మరియు ఇతర సీనియర్ అధికారులు కూడా అప్పుడు ఉన్నారు. "మీకేమైనా సమస్య ఉందా?" అని జెలెన్‌స్కీ విలేకరిని ప్రశ్నించారు. 

Trump and Zelensky

2022లో మొదలైన రష్యా-ఉక్రెయిన్ యుద్ధం ముగిసిన తర్వాత తాను కూడా సూట్ వేసుకుంటానని జెలెన్‌స్కీ అన్నారు. "ఈ యుద్ధం ముగిసిన తర్వాత నేను సూట్ వేసుకుంటాను. బహుశా అది మీ సూట్ లాగే ఉండొచ్చు. ఒకవేళ దానికంటే బాగుండొచ్చు. నాకు తెలీదు, చూద్దాం. ఏదైనా చౌకైనది కూడా కావొచ్చు. ధన్యవాదాలు" అని జెలెన్‌స్కీ అన్నారు. ఈ సందర్భంగా ట్రంప్ కలగజేసుకుని జెలెన్‌స్కీ దుస్తులు తనకు నచ్చాయని అన్నారు.

Trump and Zelensky

ఉక్రెయిన్ అధ్యక్షుడు జెలెన్‌స్కీ ఇలా సూట్ వేసుకోకుండా ఇతర దేశాల అధినేతలను కలవడం ఇదే మొదటిసారి కాదు. ఇంతకు ముందు ఇతర దేశాల అధినేతలతో జరిగిన సమావేశాల్లోనూ, 2023లో ఐక్యరాజ్యసమితి సాధారణ సభలో ప్రసంగించేటప్పుడు కూడా జెలెన్‌స్కీ సూట్ లేని దుస్తులనే ధరించారు.

అయితే, చాలా మంది సోషల్ మీడియా యూజర్లు, ట్రంప్ యొక్క సన్నిహిత సహచరులలో ఒకరైన బిలియనీర్ ఎలోన్ మస్క్ గురించి మాట్లాడారు, అతను క్యాబినెట్ సమావేశాలకు టీ-షర్టు మరియు బేస్ బాల్ టోపీలో వెళ్తాడని గుర్తుచేస్తున్నారు. అలాంటప్పుడు జెలెన్ స్కీ దస్తులపై అభ్యంతరం ఏంటని ప్రశ్నిస్తున్నారు