షూ ఆకారపు ముక్కు.. వింత వేట
చిత్తడి నేలలో గంటల తరబడి కదలకుండా నిలబడి ఉండే ఈ పక్షిని చూస్తే తొలుత పక్షి అని నమ్మడం కష్టంగా అనిపిస్తుంది. భారీ ముక్కు, గంభీరమైన కళ్లు, డైనోసార్ను గుర్తుచేసే రూపం దీని ప్రత్యేకత. దీని ముక్కు అచ్చం ఒక పెద్ద షూ ఆకారంలో ఉండటం వల్లే దీనికి ‘షూబిల్’ అనే పేరు వచ్చింది. ఆఫ్రికాలోని ఉగాండా, దక్షిణ సూడాన్ వంటి ప్రాంతాల్లోని చిత్తడి నేలలు వీటి ఆవాసాలు. దాదాపు నాలుగైదు అడుగుల ఎత్తు పెరిగే ఈ పక్షి ముక్కు చాలా పెద్దదిగా ఉంటుంది.
ఓపికతో సాగే వేట, ఆహారం కోసం ఏం చేస్తుంది?
షూబిల్ భారీ ముక్కు కేవలం వింతగా కనిపించడానికి మాత్రమే కాదు, వేటలో కీలక పాత్ర పోషిస్తుంది . ఇది ప్రధానంగా ‘లంగ్ఫిష్’ అనే చేపలను వేటాడుతుంది. నీళ్లలో ఆక్సిజన్ తక్కువైనప్పుడు గాలి పీల్చుకోవడానికి ఈ చేపలు నీటిపైకి వస్తాయి. ఆ అవకాశం కోసం షూబిల్ ఓపికగా ఎదురు చూస్తుంది. చేప దగ్గరకు రాగానే ఒక్కసారిగా భారీ తలను ముందుకు విసురుతూ నీళ్లలోకి దూకి, ముక్కుతో చేపను గట్టిగా పట్టుకుంటుంది. కొన్నిసార్లు వేటలో శరీరం మొత్తం ముందుకు వరిగిపోతే, తిరిగి నిలబడటానికి రెక్కలను ఉపయోగిస్తుంది. ఇది కేవలం చేపలకే పరిమితం కాదు; క్యాట్ఫిష్, నీటి పాములు, కప్పలు, అవకాశం దొరికితే చిన్న మొసళ్లను కూడా వేటాడి తినేయగలదు.