Facts: దేశంలో ఎన్నో ప్రత్యేకతలు కలిగిన రైల్వే స్టేషన్లు ఉన్నాయి. అలాంటి వాటిలో నవాపూర్ రైల్వే స్టేషన్ ఒకటి. ఈ స్టేషన్ ఒకే సమయంలో మహారాష్ట్ర, గుజరాత్ రాష్ట్రాల్లో ఉంటుంది. కొన్ని అడుగులు నడిస్తే ఒక రాష్ట్రం నుంచి మరో రాష్ట్రంలోకి వెళ్లిపోవచ్చు.
నవాపూర్ రైల్వే స్టేషన్లో ఉన్న ఒక బెంచ్ ఈ స్టేషన్కు ప్రధాన ఆకర్షణ. ఆ బెంచ్ మధ్యలోనే మహారాష్ట్ర-గుజరాత్ రాష్ట్రాల సరిహద్దు వెళ్తుంది. బెంచ్ ఒక వైపున మహారాష్ట్ర, మరోవైపు గుజరాత్ అని రాసి ఉంటుంది. దీంతో ఇద్దరు వ్యక్తులు ఒకే బెంచ్పై పక్కపక్కనే కూర్చున్నా.. ఒకరు మహారాష్ట్రలో, మరొకరు గుజరాత్లో ఉన్నట్లుగా భావిస్తారు. ఈ అరుదైన అనుభవాన్ని చూసేందుకు చాలామంది ప్రయాణికులు ప్రత్యేకంగా ఈ స్టేషన్ను సందర్శిస్తుంటారు.
24
స్టేషన్లోని సౌకర్యాలు రెండు రాష్ట్రాల్లో విభజన
ఈ రైల్వే స్టేషన్లోని అన్ని విభాగాలు ఒకే రాష్ట్రంలో లేవు. టికెట్ కౌంటర్, రైల్వే పోలీస్ స్టేషన్ మహారాష్ట్రలోని నందుర్బార్ జిల్లా పరిధిలో ఉన్నాయి. అదే సమయంలో వెయిటింగ్ హాల్, మరుగుదొడ్లు, స్టేషన్ మాస్టర్ కార్యాలయం మాత్రం గుజరాత్లోని తాపీ జిల్లా పరిధిలో ఉన్నాయి. అందువల్ల ఒకే స్టేషన్లో పనిచేసే ఉద్యోగులు, ప్రయాణికులు రెండు రాష్ట్రాల పరిధిలోని ప్రాంతాలను ఉపయోగిస్తుంటారు.
34
రెండు రాష్ట్రాల నిబంధనలు కూడా..
ఈ స్టేషన్లో మరో ఆసక్తికర విషయం ఏమిటంటే.. రెండు రాష్ట్రాల చట్టాలను దృష్టిలో పెట్టుకుని కొన్ని నిబంధనలు అమలు చేస్తారు. గుజరాత్లో ఆల్కహాల్ నిషేధం అమల్లో ఉండటంతో స్టేషన్ పరిసరాల్లో ఆల్కహాల్ వినియోగాన్ని అనుమతించరు. మరోవైపు మహారాష్ట్రలో గుట్కా, పాన్ మసాలాపై పరిమితులు ఉండటంతో వాటి వినియోగంపైనా జాగ్రత్తలు తీసుకుంటారు. రెండు రాష్ట్రాల నిబంధనలను గౌరవించేలా స్టేషన్ నిర్వహణ ఉంటుంది. అలాగే ప్రయాణికుల సౌకర్యం కోసం స్టేషన్లో ప్రకటనలను హిందీ, మరాఠీ, గుజరాతీ భాషల్లో వినిపిస్తారు. దీంతో రెండు రాష్ట్రాల ప్రజలు ఎలాంటి ఇబ్బంది లేకుండా ప్రయాణించగలుగుతున్నారు.
నవాపూర్ రైల్వే స్టేషన్ ఫొటోలు ఇటీవల సోషల్ మీడియాలో విస్తృతంగా వైరల్ అయ్యాయి. ఒకే స్టేషన్ రెండు రాష్ట్రాల్లో ఉండటం, ఒక బెంచ్ రెండు రాష్ట్రాలను కలపడం వంటి విశేషాలు నెటిజన్లను ఆకట్టుకున్నాయి. నవాపూర్ స్టేషన్ మొత్తం సుమారు 800 మీటర్ల పొడవు ఉంటుంది. అందులో దాదాపు 500 మీటర్లు గుజరాత్లో, మిగిలిన 300 మీటర్లు మహారాష్ట్రలో ఉన్నాయి.
