Gold in Ocean: సముద్రంలో ఎంత బంగారం ఉందో తెలుసా? ఆ బంగారాన్ని ఎందుకు వెలికితీయడం లేదు?

Gold in Ocean: మన భూమి మీదే కాదు.. సముద్రంలో కూడా బంగారం ఉందని శాస్త్రవేత్తలు చెబుతున్నారు. సముద్రంలో ఎంత బంగారం ఉందో తెలుసుకుంటే మీరు ఆశ్చర్యపోతారు. ఆ బంగారాన్ని ఎందుకు బయటికి తీయడం లేదు? 

సముద్రంలో బంగారం

సముద్రం అంటే ప్రతి ఒక్కరికీ గుర్తొచ్చేది అందమైన బీచ్, ఎగసిపడుతున్న అలలు, చేపలు గుర్తొస్తాయి. కానీ మన కంటికి కనిపించకుండా కిలోల కొద్దీ బంగారం కూడా ఆ సముద్రంలో దాగి ఉంది. ప్రపంచంలోని అన్ని సముద్రాల్లో సుమారు 2 కోట్ల టన్నుల బంగారం ఉందని శాస్త్రవేత్తలు అంచనా వేసి చెబుతున్నారు. మరి ఆ బంగారాన్ని బయటికి తీస్తే సరిపోతుంది కదా.. అనే సందేహం వస్తుంది. కానీ అలా బంగారం తీయడం అంత సులువు కాదు. సముద్రంలో ఉన్న బంగారం ఘన రూపంలో అంటే ముక్కల రూపంలో ఉండదు. అది సముద్ర నీటిలో చాలా చిన్న చిన్న కణాలుగా కరిగిపోయి ఉంటుంది. అందుకే దాన్ని బయటకు తీయడం అంత సులువు కాదు. ఆ బంగారాన్ని తీయడం ఇప్పటి వరకు ఎవరికీ సాధ్యం కాలేదు. ఒక లీటర్ సముద్ర నీటిలో ఉండే బంగారం పరిమాణం చాలా స్వల్పంగా ఉంటుంది. కంటికి కనిపించని స్థాయిలో ఉండే ఈ బంగారాన్ని వేరు చేయాలంటే గ్యాలన్ల కొద్ది నీటిని శుద్ధి చేయాలి. దాని కోసం భారీ యంత్రాలు, అధునాతన సాంకేతికత, వేల కోట్ల రూపాయలు అవసరం అవుతుంది. అందుకే సముద్రంలో బంగారం ఉన్నా దాన్ని అలాగే వదిలేశారు.

బంగారాన్ని ఎందుకు తీయడం లేదు?

ఇప్పుడు సాంకేతిక పరిజ్ఞానం కూడా ఆధునికంగా ఉంది. అయినా కూడా ఈ సమస్యకు పూర్తి పరిష్కారం లేకుండా పోయంది. సముద్రం నుంచి బంగారం తీయాలంటే... ఆ బంగారం విలువ కన్నా ఎక్కువ డబ్బు ఖర్చు చేయాల్సి వస్తుంది. అంటే ఖర్చు ఎక్కువ.. వచ్చే లాభం చాలా తక్కువ. అందుకే ఏ దేశం కూడా సముద్రంలోని బంగారాన్ని వెలికితీసే ప్రయత్నం చేయడం లేదు. అలాగే సముద్రంలోంచి బంగారం తీసే ప్రక్రియ మొదలుపెడితే సముద్ర జీవులపై కూడా ప్రభావం పడే అవకాశం ఉంది. కోట్ల లీటర్ల సముద్ర నీటిని శుద్ధి చేయడం వల్ల చేపలు, పగడపు దిబ్బలు, సముద్ర మొక్కలు వంటి జీవ వ్యవస్థకు నష్టం కలుగుతుంది. దుకే శాస్త్రవేత్తలు కేవలం బంగారం కోసం ప్రకృతిని ప్రమాదంలోకి నెట్టకూడదని చెబుతున్నారు. అయితే తక్కువ ఖర్చుతో పర్యావరణానికి హాని కలగకుండా బంగారాన్ని వేరు చేసే కొత్త పద్ధతులపై పరిశోధనలు జరుగుతున్నాయి.

శాస్త్రవేత్తలకే సవాలు

సాంకేతికత బాగా అభివృద్ధి చెందిన ఈ రోజుల్లో కూడా సముద్రం నుంచి బంగారం ఎలా తీయాలో తెలియక శాస్త్రవేత్తలు తలలు పట్టుకుంటున్నారు. కొత్త యంత్రాలు, కొత్త శాస్త్రీయ పద్ధతులు అందుబాటులోకి వస్తే సముద్ర నీటిలోని బంగారాన్ని సులభంగా వేరు చేయవచ్చు. ప్రస్తుతం మాత్రం అది సాధ్యం కాలేదు. అందుకే ప్రపంచంలోని సముద్రాల్లో కోట్ల టన్నుల బంగారం ఉన్నప్పటికీ, అది మనకు ఉపయోగపడడం లేదు. భూమిపై ఉన్న బంగారు గనుల నుంచి బంగారం తీయడం సులువగా ఉన్నప్పటికీ సముద్రం నుంచి మాత్రం తీయలేకపోతున్నాము. సముద్రంలోని బంగారం మాత్రం శాస్త్రవేత్తలకు పెద్ద సవాలుగానే మిగిలిపోయింది.