నయనతార భర్త సినిమాతో త్రిషకి షాక్.. కాజల్ కి గోల్డెన్ ఛాన్స్ ?

నయనతార భర్త విగ్నేష్ శివన్ దర్శకుడిగా మంచి గుర్తింపు పొందిన సంగతి తెలిసిందే. ఇప్పటికే విగ్నేష్ తమిళంలో పలు చిత్రాలకు దర్శకుడిగా, రచయితగా వ్యవహరించారు. విగ్నేష్ చివరగా 'కన్మణి రాంబో ఖతీజా' అనే చిత్రాన్ని తెరకెక్కించారు. నయనతార, సమంత , విజయ్ సేతుపతి నటించిన ఈ చిత్రం నిరాశపరిచింది.  

అయితే విగ్నేష్ తన తదుపరి చిత్రంతో ఒక స్టార్ హీరోని డైరెక్ట్ చేసే అవకాశం దక్కించుకున్నారు. తలా అజిత్ 62వ చిత్రాన్ని విగ్నేష్ తెరకెక్కించబోతున్న సంగతి తెలిసిందే. ఇప్పటికే ప్రీ ప్రొడక్షన్ కార్యక్రమాలు వేగంగా జరుగుతున్నాయి. ఈ చిత్రంలో ముందుగా విగ్నేష్ సతీమణి నయనతారనే హీరోయిన్ గా నటిస్తుందని వార్తలు వచ్చాయి. కానీ అది జరగలేదు. గతంలో నయన్, అజిత్ ఆరంభం, విశ్వాసం లాంటి హిట్ చిత్రాల్లో నటించారు. 

ఇక ఈ చిత్రంలో అజిత్ కి జోడిగా త్రిష పేరు తెరపైకి వచ్చింది. త్రిష అజిత్ సరసన నటించిన ఆల్మోస్ట్ కంఫర్మ్ అని తమిళనాట వార్తలు వినిపించాయి. కానీ త్రిషకి ఊహించని షాక్ ఎదురైంది. ఈ చిత్రం నుంచి కొన్ని కారణాల వల్ల త్రిషని తప్పించారని అంటున్నారు. 

త్రిషకి బదులుగా అజిత్ 62 కోసం చందమామ కాజల్ అగర్వాల్ ని ఎంపిక చేసినట్లు లేటెస్ట్ న్యూస్. అయితే చిత్ర యూనిట్ ఇంకా అధికారికంగా ప్రకటించలేదు. ఒక వేళ కాజల్ కి ఈ ఆఫర్ దక్కితే మరో క్రేజీ చిత్రం ఆమె బుట్టలో పడ్డట్లే. 

ప్రస్తుతం కాజల్.. కమల్ హాసన్ సరసన ఇండియన్ 2 చిత్రంలో నటిస్తోంది. పోస్ట్ ప్రెగ్నన్సీ తర్వాత రీ ఎంట్రీ లో కూడా చందమామని అద్భుతమైన అవకాశాలు వరిస్తున్నాయి. 

అజిత్ ఈ సంక్రాంతికి 'తెగింపు' అనే చిత్రంతో ప్రేక్షకులని పలకరించబోతున్నారు. హెచ్ వినోద్ దర్శకత్వంలో ఈ చిత్రం తెరకెక్కింది. విగ్నేష్ శివన్.. అజిత్ తో ఎలాంటి చిత్రం తెరకెక్కిస్తారు అనే అభిమానులు అంతా ఎదురుచూస్తున్నారు.