సూపర్ స్టార్ కృష్ణ, శోభన్ బాబు ఇద్దరూ సమకాలీనులు. ఈ లెజెండ్రీ నటులు ఇద్దరూ తెలుగు చిత్ర పరిశ్రమ ఎదగడంలో పిల్లర్స్ గా నిలిచినవారే. ఇద్దరూ కలసి ఎన్నో చిత్రాల్లో నటించారు. ఇద్దరి మధ్య మంచి సాన్నిహిత్యం ఉండేదట. వీళ్ళిద్దరూ దాదాపు ఒకే సమయంలో చిత్ర పరిశ్రమలోకి అడుగుపెట్టారు.
శోభన్ బాబు అప్పటి ట్రెండుకి తగ్గట్లుగా కొన్ని పౌరాణిక చిత్రాల్లో నటించారు. కృష్ణ తనదైన పంథాలో వైవిధ్యమైన చిత్రాలు చేస్తూ వెళ్లారు. ఓ ఇంటర్వ్యూలో శోభన్ బాబుతో పోటీ ఎలా ఉండేది అని ప్రశ్నించగా.. శోభన్ బాబు నేను కలసి నాటకాలు కూడా వేశాం అని కృష్ణ అన్నారు.
నాకు గూఢచారి 116తోనే స్టార్ డమ్ వచ్చేసింది. అంటే అది నా మూడవ పిక్చర్. చాలా తక్కువ టైంలోనే నాకు స్టార్ స్టేటస్ వచ్చేసింది. కానీ శోభన్ బాబుకి అంత ఈజీగా స్టార్ స్టేటస్ రాలేదు. దాదాపు పదేళ్ల తర్వాత శోభన్ బాబుకి స్టార్ డమ్ వచ్చింది.
శోభన్ బాబు 1959లో ఇండస్ట్రీలోకి వచ్చారు. 1969లో శోభన్ బాబుకి మనుషులు మారాలి చిత్రంతో స్టార్ డమ్ వచ్చింది. ఈ మధ్యలో ఎన్నో చిత్రాల్లో నటించినా అంత గుర్తింపు రాలేదు.
మనుషులు మారాలి చిత్రం కూడా నేను చేయాల్సిన సినిమానే. నన్ను హీరోగా కంఫర్మ్ చేసి అడ్వాన్స్ కూడా ఇచ్చారు. కానీ నేను డేట్లు అడ్జెస్ట్ చేయలేక అడ్వాన్స్ తిరిగి ఇచ్చేశాను. దీనితో శోభన్ బాబుని బుక్ చేసుకున్నారు. ఆ విధంగా శోభన్ బాబు స్టార్ హీరో అయ్యారని కృష్ణ అన్నారు.
మనుషులు మారాలి చిత్రం తాను చేసి ఉంటే శోభన్ బాబు స్టార్ హీరో కావడం ఇంకా ఆలస్యం అయి ఉండొచ్చు అన్నట్లుగా తెలిపారు. కానీ చాలా మంది శోభన్ బాబు సన్నిహితులు చెప్పే విషయం ఏంటంటే.. శోభన్ బాబు తన సొంత బ్యానర్ లేకుండానే ఎదుగుతూ వచ్చారని అంటారు. మిగిలిన హీరోలంతా సొంత బ్యానర్స్ లో సినిమాలు చేశారు.