`యశోద` సక్సెస్‌పై స్పందించిన సమంత.. ఆడియెన్స్ కి థ్యాంక్స్ చెబుతూ భావోద్వేగ సందేశం..

సమంత నటించిన `యశోద` చిత్రం థియేటర్లలో పాజిటివ్‌ టాక్‌ తో రన్‌ అవుతుంది. ఈ నేపథ్యంలో ఆడియెన్స్ కి థ్యాంక్స్ చెబుతూ సమంత ఓ ఎమోషనల్‌ నోట్‌ని పంచుకుంది.   

సమంత(Samantha) నటించిన లేడీ ఓరియెంటెడ్‌ మూవీ `యశోద`(Yashoda) గత శుక్రవారం విడుదలై విజయవంతంగా రన్‌ అవుతున్న విషయం తెలిసిందే. సమంత నటించిన తొలి పాన్‌ ఇండియా చిత్రం కావడం విశేషం. అన్ని ఏరియాల నుంచి సినిమాకి పాజిటివ్‌ టాక్ రావడంతో సమంత `యశోద` ఫలితంపై స్పందించింది. ఈ మేరకు ఆమె ఓ భావోద్వేగ సందేశాన్ని పంచుకుంది. 

సోషల్‌ మీడియా ద్వారా సామ్‌ ఓ థ్యాంక్స్ నోట్‌ని షేర్‌ చేసింది. ``యశోద` సినిమాపై మీరు చూపిస్తున్న ప్రేమకి, ఆదరణకు ధన్యవాదాలు. మీ ప్రశంసలు, మీరు ఇస్తున్న సపోర్ట్ చూస్తుంటే నాకు చాలా ఆనందంగా ఉంది. ఇది నాకు లభించిన గొప్ప గిఫ్ట్ గా భావిస్తున్నా. `యశోద` సినిమా ప్రదర్శిస్తున్న థియేటర్లలో మీ సంబరాలు చూశా. సినిమా గురించి మీరు చెప్పిన మాటలు విన్నాను. ఇంతటి ఆదరణ వెనక మా సినిమా టీమ్‌ అహర్నిశలు నిర్విరామంగా పడ్డ కష్టం ఉంది.

ఇప్పుడు నా మనసు గాల్లో తేలున్నట్టుగా ఉంది. `యశోద` మీ ముందుకు రావడానికి కారణమైన వాళ్లకి ఈ సందర్భంగా థ్యాంక్స్ చెప్పుకోవాలనుకుంటున్నా. నన్ను నమ్మి, ఈ సినిమాకి నన్ను తీసుకున్న నిర్మాత శివలెంక కృష్ణ ప్రసాద్‌కి ప్రత్యేక ధన్యవాదాలు. అలాగే ఇంత మంచి సినిమాని అందించిన దర్శకులు హరి, హరీష్‌లకు థ్యాంక్స్. ఈ కథ కోసం సెర్చ్ చేశారు. వారితో పనిచేయడం చాలా హ్యాపీగా ఉంది. 

నాతోపాటు ఈ సినిమాలో నటించిన వరలక్ష్మీ శరత్‌ కుమార్‌, ఉన్ని ముకుందన్‌, ఇతర నటీనటులు, సాంకేతిక నిపుణులు అందరితో పనిచేయడం ఎంతో సంతోషాన్నిచ్చింది. అందరికి వినయ పూర్వక కృతజ్ఞతలతో మీ సమంత` అని పేర్కొంది సామ్‌. ప్రస్తుతం సమంత థ్యాంక్స్ ఇంటర్నెట్‌లో చక్కర్లుకొడుతుంది. 

సమంత మెయిన్‌ లీడ్‌గా నటించిన `యశోద` చిత్రం వీకెండ్‌లో మంచి కలెక్షన్లు సాధించింది. సోమవారం నుంచి సగానికి పడిపోయాయి. దీనికితోడు సూపర్‌స్టార్‌ కృష్ణ మరణం సినిమాపై ప్రభావం పడింది. ఇప్పుడిప్పుడే మళ్లీ స్టేబుల్‌ అవుతుంది. అయితేశుక్రవారం నాలుగైదు సినిమాలు రిలీజ్‌ కావడంతో అది `యశోద`పై ప్రభావం పడే అవకాశం ఉందని ట్రేడ్‌ వర్గాల టాక్‌. మరి దాన్ని దాటుకుని యశోద నిలబడుతుందా అనేది చూడాలి. అయితే ఈ సినిమా రిలీజ్‌కి ముందే నిర్మాతకి టేబుల్‌ ప్రాఫిట్‌ కావడం విశేషం. థియేట్రికల్‌ రైట్స్ కి సంబంధించిన కలెక్షన్లు వస్తే అంతా సేఫ్‌లో ఉన్నట్టే.