ఒకప్పుడు బస్ కండక్టర్గా జీవితం మొదలుపెట్టి, ఇప్పుడు ప్రపంచవ్యాప్తంగా కోట్లాది మంది అభిమానులను సంపాదించుకున్న రజినీకాంత్ ప్రయాణం అందరికీ స్ఫూర్తిదాయకం. చేతిలో చిల్లర పట్టుకుని బస్ ఎక్కిన ఆ కుర్రాడు, ఇప్పుడు భారత సినిమాకే అతిపెద్ద ఆస్తిగా మారారు.
సినిమా అంటే హీరో ఉండాలి, అదిరిపోయే ఎంట్రీ ఉండాలి. కానీ, ఇండియన్ సినిమా కింగ్, 'తలైవా' రజినీకాంత్ రియల్ లైఫ్ స్టోరీనే ఒక అద్భుతమైన సినిమా. ఇప్పుడు సోషల్ మీడియాలో ఒక పాత ఐడీ కార్డు తెగ చక్కర్లు కొడుతోంది. అది ఎవరితో కాదు.. ఇప్పటి తమిళ సూపర్ స్టార్.. ఒకప్పటి 'బెంగళూరు కుర్రాడు' శివాజీ రావ్ గైక్వాడ్.. బీఎంటీసీ బస్ కండక్టర్గా పనిచేసినప్పటి గుర్తింపు కార్డు!
25
వైరల్ అవుతున్న ఐడీ కార్డులో ఏముంది?
ఇప్పుడు వైరల్ అవుతున్న ఈ ఐడీ కార్డు నిజమైనదా లేక ఏఐ (AI) సృష్టించిందా అనే చర్చ పక్కన పెడితే, అందులోని సమాచారం మాత్రం రజినీ అభిమానులకు గూస్బంప్స్ తెప్పిస్తోంది. ఆ కార్డులో రజినీకాంత్ అసలు పేరు 'శివాజీ రావ్ గైక్వాడ్' అని స్పష్టంగా రాసి ఉంది. శ్రీనగర్ డిపో, రూట్ నంబర్ 10A బస్సులో పనిచేసిన ఈ 'మాస్' కండక్టర్కు 1971లో నెల జీతం ఎంతో తెలుసా? కేవలం 275 రూపాయలు! ఇప్పుడు కోట్లలో రెమ్యునరేషన్ తీసుకునే రజినీ, అప్పట్లో వందల కోసం టికెట్లు కొట్టేవారంటే నమ్మశక్యంగా లేదు.
35
విజిల్ వేయడంలోనూ ఓ స్టైల్!
అప్పట్లో బస్సులో టికెట్లు ఇచ్చేటప్పుడు రజినీ చూపించే స్పీడ్, ఆయన వేసే విజిల్ సౌండ్, ప్రయాణికులతో మాట్లాడే స్టైల్ కు ప్రత్యేకంగా అభిమానులు ఉండేవారట. "ముందుకు జరగండి సార్...", "చిల్లర ఇవ్వండి..." అని చెప్పడంలో కూడా ఒక సూపర్ స్టైల్ కనిపించేదట. ఈ శివాజీ కేవలం బస్సులకు పరిమితం అయ్యే వ్యక్తి కాదు, ప్రపంచాన్ని ఏలేవాడని.. ఆయన ప్రాణ స్నేహితుడు, డ్రైవర్ రాజ్ బహదూర్కు అప్పుడే అర్థమైంది, అందుకే రజినీకాంత్ ను హీరోగా ప్రయత్నాలు చేయడాని ప్రోత్సహించాడు.
ఈ రోజు రజినీకాంత్ ఎంత ఎత్తుకు ఎదిగినా, తన మూలాలను మాత్రం మర్చిపోలేదు. కొద్ది రోజుల క్రితం బెంగళూరులోని జయనగర్ డిపోకు సడెన్గా వెళ్లిన రజినీ, అక్కడి కండక్టర్లు, డ్రైవర్లతో కలిసి సరదాగా ముచ్చటించారు. ఆ క్షణంలో ఆయన సూపర్స్టార్ రజినీలా కాకుండా, కండక్టర్ శివాజీలా మారిపోయారు. అంతేకాదు, లోకేష్ కనకరాజ్ దర్శకత్వంలో వస్తున్న 'కూలీ' సినిమా పోస్టర్లో కండక్టర్ బ్యాడ్జ్ నంబర్ 1421 కనిపించడంతో, అది రజినీదే అని అభిమానులు కూడా సంబరపడ్డారు. కానీ ఆ తర్వాత ఆ నంబర్ దర్శకుడి తండ్రిదని తెలిసింది.
55
స్ఫూర్తికి మారుపేరుగా 'కండక్టర్'!
ఒక సాధారణ కండక్టర్గా కెరీర్ మొదలుపెట్టి, ఈ రోజు ప్రపంచవ్యాప్తంగా కోట్లాది మంది అభిమానులను సంపాదించుకున్న రజినీ ప్రయాణం ప్రతి ఒక్కరికీ స్ఫూర్తిదాయకం. చేతిలో చిల్లర పట్టుకుని బస్ ఎక్కిన ఆ కుర్రాడు, ఇప్పుడు భారత సినిమాకే ఒక పెద్ద ఆస్తి. ఈ వైరల్ ఐడీ కార్డు ఒక్క విషయాన్ని మళ్లీ నిరూపించింది - "కష్టపడితే మనిషి ఏదైనా సాధించగలడు, కానీ ఎంత ఎత్తుకు ఎదిగినా వచ్చిన దారిని మర్చిపోకూడదు." అని.
