గేమ్ ఛేంజర్ పై పుండు మీద కారం, సంక్రాంతి సినిమాలకు పుష్ప 2 దెబ్బ.. రీలోడెడ్ తో అల్లు అర్జున్ ప్లాన్

టాలీవుడ్ లో సంక్రాంతికి మూడు బడా చిత్రాలు రిలీజ్ అయ్యాయి. రాంచరణ్ గేమ్ ఛేంజర్, బాలయ్య డాకు మహారాజ్, వెంకటేష్ సంక్రాంతికి వస్తున్నాం చిత్రాలు సంక్రాంతి బాక్సాఫీస్ వద్ద పోటీ పడ్డాయి. గేమ్ ఛేంజర్ చిత్ర పరిస్థితి దారుణంగా ఉంది. తొలి రోజు నుంచే మిక్స్డ్ టాక్ మూటగట్టుకున్న ఈ చిత్రం నష్టాల బాటలో పయనిస్తోంది. ఇక డాకు మహారాజ్, సంక్రాంతికి వస్తున్నాం చిత్రాలు మాత్రం ప్రేక్షకుల ఆదరణతో వసూళ్ల ప్రభంజనం సృష్టిస్తున్నాయి. 

అంతకు ముందే డిసెంబర్ లో విడుదలైన అల్లు అర్జున్ పుష్ప 2 ఇంకా థియేటర్స్ లో కొనసాగుతోంది. సంక్రాంతి చిత్రాలకు ధీటుగా, పుష్ప 2 వసూళ్ళని ఇంకాస్త పెంచేలా చిత్ర యూనిట్ భారీ ప్లాన్ వేసింది. పుష్ప 2 చిత్రంలో మరో 20 నిమిషాల ఎక్స్ట్రా ఫుటేజ్ యాడ్ చేస్తూ రీలోడెడ్ పేరుతో ప్రదర్శించబోతున్నారు. శుక్రవారం రోజు నుంచి రీ లోడెడ్ వెర్షన్ లో 20 నిమిషాల ఎక్స్ట్రా ఫుటేజ్ యాడ్ చేయనున్నారు. ఇది సంక్రాంతి చిత్రాలకు పెద్ద దెబ్బ అనే చెప్పొచ్చు. 

పుష్ప 2 రీలోడెడ్ వల్ల సంక్రాంతి చిత్రాల వసూళ్లకు ఎంతోకొంత గండి తప్పదని ట్రేడ్ విశ్లేషకులు అంచనా వేస్తున్నారు. ముఖ్యంగా గేమ్ ఛేంజర్ చిత్రానికి పుష్ప 2 రీ లోడెడ్ పుండు మీద కారం చల్లినట్లే అని భావిస్తున్నారు.సంక్రాంతి చిత్రాలకు పుష్ప 2 రీ లోడెడ్ దెబ్బ కొట్టడమే కాదు అల్లు అర్జున్ ఫ్యాన్స్ సహనానికి పరీక్ష కూడా అని చెప్పొచ్చు. 

అదెలాగో చూద్దాం. ఆల్రెడీ పుష్ప 2 రన్ టైం దాదాపు 3 గంటల 20 నిమిషాల వరకు ఉంది. ఇప్పుడు రీ లోడెడ్ పేరుతో మరో 20 నిమిషాలు అదనంగా యాడ్ చేస్తున్నారు. అంటే దాదాపు 3 గంటల 40 నిమిషాల రన్ టైం అవుతుంది. ఇంటర్వెల్ తో కలిపి ఆడియన్స్ దాదాపు 4 గంటలు థియేటర్స్ లో ఉండాల్సి ఉంటుంది. ఇది నిజంగా ఆడియన్స్ సహనానికి పరీక్షే అని చెప్పొచ్చు. 

ఇప్పటికే పుష్ప 2 చిత్రం బాహుబలి 2 అంతటి భారీ విజయంగా రికార్డులు సృష్టించింది. దాదాపు పుష్ప 2 వసూళ్లు 2000 వేల కోట్లకి చేరువయ్యాయి. ఈ చిత్రంతో అల్లు అర్జున్ తిరుగులేని పాన్ ఇండియా స్టార్ గా ఎదిగారు.