టాలీవుడ్ లో భారీ ఫ్యాన్ బేస్ కలిగిన హీరోలు ఎవరంటే మహేష్ బాబు, పవన్ కళ్యాణ్. ఇది ఎవరైనా ఒప్పుకోవాల్సిన నిజం. ఈ ఇద్దరు హీరోల బాక్సాఫీస్ రికార్డ్స్ అందుకు నిదర్శనం. అదే సమయంలో ఈ హీరోల ఫ్యాన్స్ పరస్పరం పోటీ పడుతూ ఉంటారు. ఇక మహేష్ బర్త్ డే సందర్భంగా ఫ్యాన్స్ అరుదైన రికార్డు నమోదు చేయగా... దాన్ని బీట్ చేయాలని పవన్ ఫ్యాన్స్ కంకణం కట్టుకున్నారు.
కరోనా కారణంగా గత రెండేళ్లు మహేష్ బర్త్ డే వేడుకలు ఫ్యాన్స్ జరుపుకులేకపోయారు. దీంతో ఈ ఏడాది భారీగా ప్లాన్ చేశారు. సామాజిక సేవా కార్యక్రమాలతో పాటు స్పెషల్ ఈవెంట్స్ జరపాలని పూనుకున్నారు. ముఖ్యంగా మహేష్ కెరీర్ లో ఆల్ టైం బ్లాక్ బస్టర్స్ గా ఉన్న ఒక్కడు, పోకిరి చిత్రాల స్పెషల్ షోస్ వరల్డ్ వైడ్ ప్రదర్శన చేయాలని నిర్ణయించారు.
దీని కోసం నెలరోజు కసరత్తులు చేసిన మహేష్ ఫ్యాన్స్ తెలుగు రాష్ట్రాలతో పాటు, రెస్ట్ ఆఫ్ ఇండియా, ఓవర్సీస్ లో రెగ్యులర్ మూవీలా షోస్ ఏర్పాటు చేశారు. ఈ ప్రత్యేక ప్రదర్శనలకు విశేష స్పందన దక్కింది. ముఖ్యంగా పోకిరి ఆడుతున్న థియేటర్స్ కి ఫ్యాన్స్ పోటెత్తారు. వరల్డ్ వైడ్ పోకిరి సినిమా 375 షోస్ వేసినట్లు సమాచారం.
అలాగే యావరేజ్ గా 70 నుండి 80 శాతం ఆక్యుపెన్సీ నమోదైంది. ట్రేడ్ వర్గాల లెక్కల ప్రకారం పోకిరి ఏకంగా రూ. 1.72 కోట్ల వరల్డ్ వైడ్ గ్రాస్ రాబట్టినట్లు ట్రేడ్ వర్గాలు రిపోర్ట్ చేశాయి. ఎప్పుడో 15 ఏళ్ల క్రిందట విడుదలైన మూవీ రీరిలీజ్ కి ఒక్కరోజు అంత మొత్తంలో వసూలు చేయడం అరుదైన విషయంగా పరిగణిస్తున్నారు.
మహేష్ చిత్రాల స్పెషల్ షోస్ ద్వారా వసూలైన మొత్తాన్ని ఛారిటీ కోసం ఖర్చు చేయనున్నారు. పోకిరి సక్సెస్ పవన్ కళ్యాణ్ ఫ్యాన్స్ లో మంట రేపింది. ఇక పవన్ ఫ్యాన్స్ తిక్క గురించి చెప్పాల్సిన అవసరం లేదు. ఎందులోనైనా మా హీరోనే గొప్పని చెప్పుకునే వీరు.. పోకిరి రికార్డ్స్ బ్రేక్ చేయాలని పూనుకున్నారు.
సెప్టెంబర్ 2 పవన్ బర్త్ డే నేపథ్యంలో జల్సా చిత్ర ప్రదర్శన చేయాలి అనుకుంటున్నారు. ఈ చిత్రాన్ని రికార్డు స్థాయిలో ప్రత్యేక ప్రదర్శనలు చేసి భారీ మొత్తంలో వసూళ్లు సాధించాలని గట్టి సంకల్పంతో ఉన్నారు. దీని కోసం సోషల్ మీడియాలో పిలుపునిచ్చారు. ఫ్యాన్స్ అసోసియేషన్స్ ద్వారా గ్రూప్స్ లో విషయాన్ని షేర్ చేస్తున్నారు.
మహేష్ ఫ్యాన్స్ పోకిరి చిత్రాన్ని ఓ రేంజ్ లో సక్సెస్ చేసి పవన్ ఫ్యాన్స్ కి మెంటల్ తెప్పించారు. ఒకరంగా చెప్పాలంటే వాళ్ళను రెచ్చగొట్టారు. దీనితో వాళ్ళు తొడ కోసుకున్నారు, మనం కోసుకోవాల్సిందేనని ఫిక్స్ అయ్యారు. ఒక విధంగా పవన్ ఫ్యాన్స్ వెర్రెత్తిపోయున్నారు. ఈ క్రమంలో వాళ్ళు ఈ స్థాయి రికార్డు నమోదు చేస్తారో చూడాలి.
అలాగే ఆగస్టు 22 చిరంజీవి బర్త్ డే కాగా.. మెగా ఫ్యాన్స్ ఇదే తరహా షోస్ ప్లాన్ చేస్తున్నట్లు సమాచారం. చిరంజీవి ఆల్ టైం హిట్ చిత్రాల ప్రత్యేక ప్రదర్శనకు ప్రణాలికలు వేస్తున్నారు. టాలీవుడ్ స్టార్ హీరోల ఫ్యాన్స్ మధ్య నెలకొన్న ఈ వాతావరణం ఒకింత థియేటర్స్ ఓనర్స్, సమాజానికి మంచే చేస్తుంది.