Nagarjuna: నెల్లూరు డిస్ట్రిబ్యూటర్ హరి కన్నుమూత.. మా కుటుంబం ఓ పిల్లర్ ని కోల్పోయింది, నాగార్జున ఎమోషనల్

టాలీవుడ్ ప్రముఖ డిస్ట్రిబ్యూటర్ జి.హరి మరణించారు. పిన్న వయసులోనే ఆయన మరణించడంతో చిత్ర పరిశ్రమలో విషాదం నెలకొంది. అక్కినేని నాగార్జున హరి మరణం పట్ల సంతాపం తెలిపారు. 

టాలీవుడ్ లో విషాదం

తెలుగు చిత్ర పరిశ్రమలో విషాదం చోటు చేసుకుంది.. నెల్లూరుకి చెందిన ప్రముఖ డిస్ట్రిబ్యూటర్ గుజ్జలపూడి హరి(46) ఆదివారం రోజు తుదిశ్వాస విడిచారు. పిన్న వయసులో ఆయన ఆకస్మిక మరణం సన్నిహితులని, కుటుంబ సభ్యులని విషాదంలోకి నెట్టేసింది. టాలీవుడ్ ప్రముఖులు, హరి గురించి తెలిసిన వాళ్ళు దిగ్భ్రాంతి వ్యక్తం చేస్తున్నారు.

గుండెపోటుతో డిస్ట్రిబ్యూటర్ మృతి

హరి గుండెపోటు కారణంగా మరణించినట్లు కుటుంబసభ్యులు తెలిపారు. హరి దశాబ్దాలుగా నెల్లూరులో డిస్ట్రిబ్యూటర్ గా కొనసాగుతున్నారు. అన్నపూర్ణ స్టూడియోస్, శ్రేష్ఠ్ మూవీస్, శ్రీ వెంకటేశ్వర క్రియేషన్స్, వైజయంతి మూవీస్ లాంటి ప్రధాన సంస్థల సినిమాలని హరి నెల్లూరులో రిలీజ్ చేశారు. హరికి సొంత బ్యానర్ కూడా ఉంది. నిర్మాతగా కూడా రాణించారు. హరి వెంకటేశ్వర పిక్చర్స్ బ్యానర్ పై విశాల్ డబ్బింగ్ సినిమాలని తెలుగులో రిలీజ్ చేశారు.

నాగార్జున ఎమోషనల్ కామెంట్స్

అక్కినేని ఫ్యామిలీతో హరికి ప్రత్యేక అనుభందం ఉంది. దీనితో నాగార్జున హరి మరణ వార్త విని దిగ్భ్రాంతికి గురయ్యారు. హరితో తమ కుటుంబానికి 25 ఏళ్లుగా పరిచయం ఉంది అని నాగార్జున తెలిపారు.. మా కుటుంబానికి పిల్లర్ లా నిలిచిన వ్యక్తి హరి అని నాగార్జున అన్నారు. ఆయన లేని లోటు భర్తీ చేయలేనిది అని నాగార్జున ఎమోషనల్ కామెంట్స్ చేశారు.